احنا مين و أنتو مين؟؟مش

[fares tany]

موضوع خطير جداً و بيتزايد...لازم لما تكلم حد تصنفه و يصنفك...لازم يحطك تحت بند و انت تدخله فى ملف ..مينفعش انكم تتكلموا بتجرد..فقط مناقشة موضوعية..لازم فى مصر تدخل جروب اما انك اسلامى او متاسلم او ليبرالى أو علمانى او الحادى أو الموضة الجديدة مكفراتى على وزن (مسحراتى) لو كلمته فى السياسة يقولك انت علمانى لو كلمته فى الدين يقولك انت متزمت رجعى تكفيرى لو كلمته فى الاقتصاد يقولك انت اشتراكى شيوعى ...لما تقول لحد على حقيقة اقتصادية يقولك يعنى انا جاهل !!! و لما تقوله على حقيقة دينية يقولك يعنى انا كافر؟؟؟ و لو كلمته فى السياسة يقولك انت حاجة من اتنين من بتوع الثورة اللى خربوها او انت فلول...و لما يكلمك لازم يقول مأنتوأ عملتوا على اساس ان احنا المعسكر المنافس او العدو الخطر!! احنا مين و أنتو مين؟؟مش المصريين ...يا ناس... يا قوم ...يا شعب....يا رفيق...يا أخ ...يا زميل يا اهلى و عشيرتى ...فى حاجات كتير فى النص وألف درجة بين الابيض و الاسود...وفى خطوط تقاطع مش بس توازى ممكن نتكلم و نختلف و نفضل برضه متحضرين