العودة   مصر موتورز مجتمع السيارات > منتديات السيارات العامة > منتدى السيارات العام

منتدى السيارات العام المنتدى الرئيسي بالموقع ، حيث يحتوي على كل المواضيع العامة عن السيارات نقاشات المنتدى اخبار السيارات فى مصر والخليج والعالم


إضافة رد
 
أدوات الموضوع
  #1  
قديم 13-10-2011, 12:35 PM
kimotop kimotop غير متواجد حالياً
 
تاريخ التسجيل: Oct 2011
المشاركات: 64
kimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to behold
Post الاستعدادات قبل الذهاب لسوق العربيات - دروس وعبر -

السلام عليكم

طول عمري بسمع عن سوق العربيات الي في مدينة نصر وكان نفسي اروحه من زمان ، لان تقريبا كل الناس الي اعرفها رحوه و يمكن معظم الناس المهتمة بمجال العربيات رحوه الا انا وبعدين قلقت على نفسي ازاي مرحش سوق العربيات المشهور دا وبعدين يجي يوم ابني يسألني روحت سوق العربيات يا بابا اقوله ايه ؟ مرحتش ويبقى شكلي وحش قدامه !

وفي يوم من الايام جه واحد صاحبي وقالي انا رايح سوق العربيات علشان والده عايز عربية فنازل يشوفله عربية من اتنين يا اما لادا يا اما هيونداي اكسل ؟!!!
مش فاهم ايه وجه المقارنة خصوصا ان العربيتين متشاااابهين جدا في كل حاجة ههههههههههههههههههههه بس مش مهم المهم اروح .

رحنا بعربية صاحبي و اساسي طبعا ركنا عند اخر ساعة فطرنا وشربنا الساقع وانبسطنا ، و في اليوم دا بس عرفت ليه اسمه اخر ساعة ، لان بعد كدا اليوم ساعاته كلها اختلفت !

الكلام دا كان من شهرين تلاتة كدا يعني في عز الصيف والمهم وصلنا هناك و من بداية الدخول كدا تلاقي صف عربيات كبابيتها .... كبوتاتها .... جمع كبوت ايه ؟
المهم كل العربيات فاتحة الكبوتس بتاعها و صاحب العربية واقف جنبها . ومن هنا تبدأ القصة

التوقيت : صيف 2011 الساعة ال 9 صباحا يوم الاحد
المكان : مدينة نصر - سوق العربيات
المهمة : شراء سيارة مستعملة
التفاصيل :
ركنا العربية ونزلنا وانا قاعد اتفرج وبقول لصاحبي ايه يا عم الزحمة دي قالي امال لو جيت يوم الجمعة بقى هتقول ايه ؟
وبعدين لقيت واحد بيبيع طواقي من بتاعة البلاج ماشي و شمسيات في المكان وناس قاعدة فعلا حاطة تربيزات تحت شماسي وكراسي بلاج و تحس كدا بروح البلاج باستثناء حاجة بسيطة جدا وهي البحر

المهم بعد ما ركنا بعيد رجعنا على رجلنا علشان ندخل السوق نفسه لان من برة العربيات الي واقفة دي مجرد زي جدار عازل كدا عن السوق وبيقوفوا برة وبيوقفوا الشارع علشان ميدفعوش تمن تاجير المكان جوة السوق - دي معلومات من صاحبي -

الصراحة انا كنت مبسوط جدا وانا ماشي وكل شوية نقابل عربية في طريقنا و نفط جوة كبوتها احنا الاتنين ال يعني بنفهم في الميكانيكا ولا بنفهم في اي حاجة بنفضل نتفرج بس على اي حاجة وخلاص وكانت اكتر عربيات بتخنقنا العربيات الجديدة زي كيا سيراتو مثلا لانها مقفلة ومبنلقيش حاجة نتفرج عليها

المهم وصلنا لاول واحد عارض عربية هيونداي اكسيل وكان جوة السوق والعربية الصراحة حلوة جدا كان لونها فيراني و صالونها نضيف جدا ومن برة مفيهاش تجاريح و تحس انها نضيفة فصاحبي قال يااااه هي دي ، و بعدين واحنا واقفين بنتفرج عليها واذ بصاحبها جه وهو كالتالي
راجل لابس جلبية بلدي مبقعة و معفنة و لا طويل ولا قصير و اكثر ما يميزه لابس كاب ومش مدخلة في دماغه يعني حاطه كدا بس - بواب بواب يعني -
فصاحبي قاله انت صاحب العربية ؟
الراجل بصله باشمئزاز كدا ! وقاله ايوة - لاحظ الراجل هو الي بيبص لصاحبي باشمئزاز ! -
المهم بعد مفاوضات في السعر و الي الراجل منزلش ولا شلن صاحبي قاله طب هات رقم تليفونك هنبص بصة وبعدين لو في نصيب هتصل بيك
الراجل بنظرة اشمئزاز اكتر من الاولانية قاله رقمي مش هيفيدك بحاجة .
نسيت اقولكم ان صاحبي دا ابن ناس اوي ولما لقى نظرات الاشمئزاز نازلة عليه بدأ وشه يحمر وانا عارفه لما وشه بيحمر بيتحول ل " مجنون مان " وياما ياما عملنا مشاكل بسبب عصبيته وهو دلوقت قدام راجل بيخنق عليه بقى .

رحت بسرعه قافش في دراع صاحبي وشاده وقولتله يلا يا ابني سيبك منه لكن مفيش فايدة وراح للراجل برضو وقاله هي بقى كبرت في دماغي وهاخد رقمك المهم الراجل بص على صاحبي لقى بوادر " مجنون مان " بتظهر قاله خد يا استاذ الرقم اهو .

مشينا من عند الراجل ورحنا لواحد تاني عارض لادا وكان شاب صغير كدا المهم قالنا سعر اقل بكتير من العادي فقلنا لقطة ، وبعدين اسمك ايه يا ابني قال اسم لا موجود في رخصة العربية ولا توكيلها ولا اي حاجة
طب انت هتبيع بصفتك ايه ؟
قال هبيع بصفتي شغال عند الراجل الي بيبيع العربية .
ومرت دقائق صمت محاولين استيعاب الي الواد دا بيقوله لكن في الاخر وصلنا لحقيقة واحدة فقط الا وهي ان العربية مسروقة والواد بيبيعها واول ما كشفناه اخدها وجري !!

وبعدين لقينا من بعيد كدا عربية لادا واقفة لوحدها والشنطة مفتوحة وفي رجلين مدلدلة من الشنطة ولما قربنا لقينا جوة واحد قاعد بيضرب جوان بنجو واخر حلاوة .
تنحت برهة من الزمن لكن مشيت بسرعة قبل ما ياخد باله مننا و يعزم علينا ولا حاجة ونقعد كلنا جوة الشنطة ههههههههههههههههه .

مرت ساعتين على هذا الحال وانا اكتسبت هواية جديدة ان اي عربية كبوتها مفتوح اجري انط جوة الكبوت اتفرج على اي حاجة جوة

بدأت الشمس تتوسط كبد السماء و تقريبا كدا شمس السوق غير اي شمس تانية وهنا بس عرفت ليه في واحد بيبيع طواقي بلاج وفهمت السر ورا الشمسيات الي مالية السوق

بدأت احس بالعطش الشديد و السخونة في جسمي وهنا اصبح الهدف " ازازة مية " فضلت ابص يمين وشمال علشان الاقي كشك اشتري منه اي حاجة ساقعة و ازازة مية لكن اقرب كشك على بعد من هنا لليبيا مثلا و لازم اعدي الصحراء الغربية علشان اوصل وهوصل بسحف وانا بقول مييية مييية ، واذ بملاك الرحمة راجل بيبيع ازايز مية في كرتونة وبيلف في السوق
في الاول افتكرته سراب لكن لما قربت منه لقيته حقيقه ولاول مرة في حياتي ابقى نفسي ابوس بائع جائل .
اشتريت منه مية بالسعر الي قالي عليه و اخدتها وفتحتها على طول وحاولت اشرب ولكن اكتشفت ان المية مجمدة ومفيش ولا نقطة مية نازلة وهنا تقدر تفهم المعنى الحرفي " للزل "

قعدت امصمص في بق الازازة واضربها بالبوكس علشان اكسر التلج وتسيح شوية وكانت كل فترة كدا تنزلي بقين مية على غرار " بلوا الشفايف بس " من فيلم عنترة

شوية والظهر اذن و رحنا على الجامع علشان نصلي و هنا بقى دخلت اتوضى وحسيت ان اتكتبلي عمر جديد و دخلنا صلينا ولاول مرة يبقى حلم حياتي انام في الجامع .

الغريب ان صاحبي كان عنده نشاط غريب بعد ما صلينا قالي يلا بينا وشدني بالعافية طلعني من الجامع و استأنفنا رحلة البحث عن السيارة لكن هنا بقى هوياتي اتغيرت وبدل ما كنت ببص في كبوت العربية بقيت اعمل نفسي بتفرج على صالونها وادخل علشان اقعد شوية .

وفيييييييين لقينا واحد قاعد جوة عربية اكسل لكن هاتش باك و كان راجل قرفان من نفسه من الناس الي بتقعد تفاصل معاه
المهم قربنا من العربية والصراحة العربية عجبتني جدا لدرجة اني قولت لصاحبي لو مش هتاخدها هاخدها انا لانها كانت متظبطة تمام

المهم قربنا من الراجل وقعد صاحبي يتفاوض معاه وانا بلف اتفرج على العربية وبعدين لقيت واحد ابن حلال جه جنبي وقالي بمنتهى الوضوح و المباشرة يا استاذ متاخدش العربية دي
قولتله ليه يا جميل
قالي دي عربية " ...ها تقيلة في البيع "
الصراحة دا اجمل مصطلح سمعته في حياتي عن العربيات و خطفني كدا شوية و من بعدها نظرتي اتغيرت للعربية خالص ، بل لكل العربيات وبدأت احس ان العربيات ليها جسم زيننا كدا مكون من راس و بطن وصدر ورجلين و ...

المصطلح عجبني جدا وبعدين روحت لصاحبي وقولتله العربية دي " ...ها تقيلة في البيع " والغريب انه مستغربش واتاري المصطلح دا شائع جدا وبقيت امشي اسأل الناس بقى عن اي عربية ، هي العربية دي " ...ها تقيلة في البيع ؟ " ولا ايه
ومحدش استغربني اطلاقا وكانوا بيرودا عادي جدا !!
المهم في الاخر صاحبي خد كام نمرة تليفون اصحاب العربيات الي عجبته علشان يحدد معاهم معاد وياخد الميكانيكي معاه
ولما لقاني خلاص بفصل شحن منه واتحرقت وبقى لوني زنجي من الشمس الي وخداني بالحضن من ساعة ما رحت .
قررنا نروح .

الدروس المستفادة :
شوفنا عربيات كتير وقابلنا ناس كتير منهم الحرامي والنصاب والكداب والحالف بالكذب والمخادع والرخم والتلم وقليل الذوق
وشوفنا ابن الناس والصادق والامين و اللذيذ و المحترم

من الاخر هتشوف في سوق العربيات كل فئات الناس واوعى اوعى اوعى تنخدع بشكل او موديل العربية
برغم ثقافتنا المحدودة في العربيات الا اننا اكتشفنا عربيات كتير متسواش حاجة لكن صاحبها مظبطها شكلا وهي ممكن تكون مقلوبة .
وشوفنا عربيات من برة شكلها تعبان لكن اساسيتها تمام التمام

الي بيميز سوق العربيات انها اغلى سلعة والمكاسب فيها بتتعد بالالف علشان كدا الكداب بيكدب بضمير والنصاب بينصب بضمير فخلي عينك في وسط راسك وانت بتشتري ومتعتمدش بس على رأي الميكانيكي الي جاي معاك لان في ناس بتبيع بتدي للميكانيكي فلوس وانت مش واخد بالك علشان يلبسك العربية ولو مش معرفة جامدة ممكن يبيعك .

واخيرا
لو في الصيف خد معاك شمسية او البس كاب وجركن مية هههههههههههههههه
ولو في الشتا تقل لان الجو هناك صحراااااااااوي .
خلي بالك من اجراءات البيع والشراء هناك و الاسامي الموجودة في الرخصة او التوكيل .
يستحسن متاخدش معاك فلوس هناك والعربية الي تعجبك خلص فيها برة السوق .
لو انت الي بتبيع خليك مبتسم واتحمل الناس و حط حد ادنى للسعر من غير ما ترخم على الناس لان بجد بجد في هناك عربيات جميلة جدا و ممتازة لكن على رأي الناس " تغور من وش صاحبها "

وشكرا
رد مع اقتباس
  #2  
قديم 13-10-2011, 01:17 PM
تامر ديزل تامر ديزل غير متواجد حالياً
 
تاريخ التسجيل: Jul 2011
المشاركات: 1,725
تامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond reputeتامر ديزل has a reputation beyond repute
افتراضي رد: الاستعدادات قبل الذهاب لسوق العربيات - دروس وعبر -

تسلم ايدك يا كيمو
وبجد مش عارف اقولك ايه ؟ الموضوع ده تحت شعار تقرأ وكانك في الملعب
موضوع تحفه تحفه تحفه
وخصوصا الراجل اللي مدلدل رجليه من شنطة العربيه
رد مع اقتباس
  #3  
قديم 13-10-2011, 05:23 PM
kimotop kimotop غير متواجد حالياً
 
تاريخ التسجيل: Oct 2011
المشاركات: 64
kimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to beholdkimotop is a splendid one to behold
افتراضي رد: الاستعدادات قبل الذهاب لسوق العربيات - دروس وعبر -


المشاركة الأصلية كتبت بواسطة تامر ديزل مشاهدة المشاركة

تسلم ايدك يا كيمو
وبجد مش عارف اقولك ايه ؟ الموضوع ده تحت شعار تقرأ وكانك في الملعب
موضوع تحفه تحفه تحفه
وخصوصا الراجل اللي مدلدل رجليه من شنطة العربيه
ههههههههههههههههههههههههه ههههههههههه
اشمعنى الراجل الي مدلدل رجليه

على العموم الف شكر على مشاركتك اسعدتني كثيرا
رد مع اقتباس
  #4  
قديم 13-10-2011, 05:45 PM
الصورة الرمزية AbOnOrA
AbOnOrA AbOnOrA غير متواجد حالياً
Aِِbo(Nora&Islam&Judy)
Wael Magdy Salah
من انا؟: ابو نورا واسلام
التخصص العملى: IT Consultant
هواياتي: Computers, Automotives
 
تاريخ التسجيل: May 2008
الموقع: ام الدنيا مصر
المشاركات: 17,076
AbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond reputeAbOnOrA has a reputation beyond repute
افتراضي رد: الاستعدادات قبل الذهاب لسوق العربيات - دروس وعبر -



والله ياكيمو ده اجمل موضوع قريتة عن سوق السيارات ويمكن اجمل واظرف موضوع اقراه من اسابيع

تسلم ايدك
__________________



اخر موضوعاتى
قريباً تقرير وتجربة اداء دايهاتسو تريوس * تويوتا راش

رد مع اقتباس
  #5  
قديم 13-10-2011, 06:10 PM
alshura alshura غير متواجد حالياً
من انا؟: غريب الدار على دار زمانى القاسى وظلمنى
هواياتي: رحال
 
تاريخ التسجيل: Mar 2011
الموقع: شيكاغو امريكا
المشاركات: 60
alshura has a spectacular aura aboutalshura has a spectacular aura about
مميز رد: الاستعدادات قبل الذهاب لسوق العربيات - دروس وعبر -

ماشى ياعم كيمو كتر الف خيرك سلتنا شويه وحطيت الابتسامه من على شفايفنا الموضوع جميل و ياريت الناس تعمل باللى فيه
رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML متاحة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 12:02 PM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017