العودة   مصر موتورز مجتمع السيارات > سوق السيارات فى مصر موتورز > سيارات مستعملة للبيع > مطلوب شراء

مطلوب شراء اذا كنت تبحث عن سيارة مستعملة فى مصر ضع طلب شراء سيارة مستعملة هنا


إضافة رد
 
أدوات الموضوع
  #1  
قديم 12-02-2013, 02:48 AM
Muhammad.Mojahed Muhammad.Mojahed غير متواجد حالياً
 
تاريخ التسجيل: Feb 2013
المشاركات: 28
Muhammad.Mojahed is on a distinguished road
عاجل عايز عربية للأسرة في حدود 27000 ل 32000

السلام عليكم

عايز عربية للأسرة في حدود 27000 ل 32000

ناس كثيرة بتقوللي الشاهين ، عشان بتستحمل و بتشيل و بتنفع في السفر و قطع غيرها رخيصة

و لقيت سعرها في الرنج ال أنا عايزه تقريبا ، و كان قدامي شاهين 2006 ب 34 ألف بس إتباعت ، و قدامي دلوقتي واحدة 99 ب 32000 و لسة ماشفتهاش بس صاحبها قاللي العفشة فيها شواية شغل من الوقفة ، لأنه بيقول إنه كان ركنها 8 سنين عشان بيسافر ، و مرشوشة بره

و ناس قالتلي الهيوندي اكسيل ، خفيفة في السواقة عن الشاهين

و لقيت هنا في المنتدي الكيا سيفيا ، كبيرة و شكلها حلو ، بس مش عارف بقى في ما بعد البيع ، قطع غيار و صيانة

و أنا أول مرة أشتري عربية أصلا ، وحتى لسه مش باعرف أسوق :D

يعني أنا عايز سيارة للأسرة ، تنفع في السفر ، قطع غيارها و تصليحها سهل

فعايز نصيحتكم في الموديل و النوع المناسب لي ، و إزاي أشتري عربية و أعمل إيه و أكشف عليها عند بنزينة ولا ميكانيكي ، و أهم حاجة أهتم بها

و جزاكم الله خيرا
رد مع اقتباس
  #2  
قديم 12-02-2013, 08:22 AM
Muhammad.Mojahed Muhammad.Mojahed غير متواجد حالياً
 
تاريخ التسجيل: Feb 2013
المشاركات: 28
Muhammad.Mojahed is on a distinguished road
افتراضي رد: عايز عربية للأسرة في حدود 27000 ل 32000

و برده يا ريت تفيدوني في الناحية القانونية ، إزاي أتأكد إن العربية ديه مش مسروقة مثلا
رد مع اقتباس
  #3  
قديم 12-02-2013, 03:16 PM
ahmed oka ahmed oka غير متواجد حالياً
 
تاريخ التسجيل: Jan 2013
المشاركات: 10
ahmed oka is on a distinguished road
افتراضي رد: عايز عربية للأسرة في حدود 27000 ل 32000

بص يا باشا موجود عربيه هيونداي اكسيل عربيه ناعمه اوووووي و جميله و عائليه وواسعه و اعتماديه اوي و بصراحه عمرها ما زعلتني .. لونها نبيتي و رشه من برا نضافه بس و موفره في البنزين اوي و ثبات عالي و 1300 cc و خليجي كمان موديل 94 و سبب البيع اني عاوز اغير مش اكتر
رد مع اقتباس
  #4  
قديم 12-02-2013, 03:23 PM
zing0 zing0 غير متواجد حالياً
هواياتي: Kung Fu - Reading
 
تاريخ التسجيل: Nov 2011
الموقع: القاهرة
المشاركات: 1,488
zing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond reputezing0 has a reputation beyond repute
افتراضي رد: عايز عربية للأسرة في حدود 27000 ل 32000

أنا من رأيى: الشاهين
حضرتك ممكن تشوف مميزاتها و عيوبها على جوجل, إكتب : مميزات و عيوب السيارة شاهين, هتلاقى مليوووون موضوع عنها, و ياما ناس شكرت فيها و ياما ناس شتمت فيها.

وجهه نظرى إنها قوية عن الأكسيل, و عالية عن الأرض ( و دى طبعاً مع شوارعنا المكسرة و إللى مطباتها أكتر من عربياتها بتكون أفضل), و قطع غيارها و صيانتها مش هتقرفك خاصة إنك لسة مبتدئ.

ما شاء الله المبلغ إللى معاك ممكن يجيب حاجه باور و تكييف و موديل أعلى من سنة 2000
بس المهم (الحـــــــــاله)

لفحص السيارة, حضرتك لاااااااااازم تتفق مع سمكرى بس يكون أمين و عنده ضمير علشان يكشف على الدواخل و بالمرة يكشف على الميكانيكا و الكهربا و ..... (بس الأهم إنه يكون خبرة و أمين علشان "ما يبيعكش" لصاحب العربية) و برضه حضرتك ممكن تأخد فكرة عن شوية حاجات بيكشف عليها علشان تفهم إذا كان الصنايعى بيبيعك و لا فعلاً عنده ذمه.

فيه مليييييييييييون موضوع على جوجل بعنوان: خطوات شراء سيارة مستعملة

على سبيل المثال:

كيفية شراء سيارة مستعملة؟

ازاى تشترى سيارة مستعملة،، وانت ميح ومش عارف حاجة ،، ومن غير مايضحك عليك


مراحل شراء السيارة المستعملة

اولاً الخطوة الاولى : مرحلة الدراسة
1-حدد نوع و ماركة العربية من حيث مناسبتها لآحتياجاتك و ميزانيتك وذلك بترتيب عوامل اختيار نوع العربية
أ- هاتش باك ولا سيدان (بشنطة)
هل تحتاج لمساحات داخلية كبيرة -هل سفرياتك كتير و فيها شنط كبيرة
ب-موتور كبير ولا صغير
استخدامك اكتر جوة البلد ولا برة البلد فى سفريات ذات سرعات عالية و طويلة
عنصر توفير البنزين مهم بالنسبالك ولا لا
عدد الاشخاص اللى معاك فى العربية دايماً كتير ولا قليلين ولا فى معظم الاحوال لوحدك
ج-اسعار قطع الغيار
سعر قطع غيار غالى ... مع .. عمر افتراضى كبير ....(ممتاز - بس على حسب ميزانيتك )
سعر قطع غيار رخيص ... مع .. عمر افتراضى قليل ....(جيد - بالنسبة لميزانيتك لآن العربية مش هاتقف عشان قطعة غيار او اكسسوار مطلوبة )
سعر قطع غيار غالى ... مع .. عمر افتراضى قليل ....(سيىء)
د- قطع الغيار متوفرة فى التوكيل و خارج التوكيل يبقى عظيم

و-اماكن الصيانة
- شغل توكيلات فقط (مكلف -مريح- لا يستغرق وقت طويل )
-معظم الميكانيكية بيفهموا فيها (ممتاز)
-لها ناس معينة (تبقى تعرفهم الاول )

بعد الخطوة دى هاتبقى حددت و عرفت
ماركة العربية -نوع العربية- الموتور -شغل العربية بيبقى فين و اسعارة اية

ثانياً الخطوة الثانية : مرحلة التحديد
يجب ان تحدد موديل العربية (السنة ) اللى انت عايز تشتريها و ذلك من خلال
أ- ما هى افضل الموديلات لهذا النوع - يعنى سنة كام كان من افضل الموديلات اللى نزلت فى النوع دة
ب-معرفة السعر المتوسط لهذا الموديل (السنة ) من خلال متابعة الاعلانات و الاتصال المباشر و السوق
ج- هل الموديل دة متناسب فى متوسط سعرة مع ميزانيتك ولا لأ ..لو كان اعلى أنزل للسنة اللى قبلية و هكذا
د-تنزل السوق مرة (ليس للشراء ابداً) و لكن للفرجة و معرفة أخر سعر للموديل دة بعد شوية فصال صغيرين (وعلى كدة تحدد المتوسط السعرى الفعال لهذا الموديل ) يعنى مش مجرد كلام اعلانات

بعد الخطوة دى هاتبقى حددت و عرفت
موديل العربية (السنة ) بالظبط اللى عايز تشتريها و كمان متوسط السعر اللى فى السوق للموديل دة

ثالثاً الخطوة الثالثة : مرحلة النزول للشراء
عربيات تستحق النزول إذا كانت فى اعلان او الفرجة اذا كانت فى السوق
1- الحالة
-فابريقة (دهان مصنع).... بالكامل.... (ممتاز)
-فابريقة داخل فقط (تحت سنة 2000 ) .....(جيد)
-لا يوجد اى دهان فابريقة فى اى سنة (يعنى راشة برة و جوة ) ....... (سىء)
2-السعر
-اعلى من المتوسط اللى انت طلعتة ........(ممتاز)
-فى المتوسط اللى انت طلعتة ........(جيد)
-اقل من المتوسط اللى انت طلعتة ........(سىء)
3-الكماليات
هى الكماليات المتعارف عليها فى هذا الموديل من هذة السنة ولا يحبذ اى اضافات اخرى
4-الموتور
هو السعة اللترية (ال cc ) المتعارف علية فى هذا الموديل من هذة السنة
5-اللون
من الالوان اللى كانت متواجدة فى هذا الموديل من هذة السنة
يعنى مفيش 128 فى اوائل التسعينات فضى او 127 ذهبى ولا لانسر موف ..مثلاً
6-الرخصة
أ- رخصة أة بس بشروط
بأسم المالك ومش المهم فيها أد اية المهم طالعة لمدة اد اية
3 سنين .... (ممتاز)
سنة واحدة ...(واحنا دلوقتى فى اخرها ).... (جيد)
سنة واحدة ...(واحنا دلوقتى فى اولها ).... (غير جيد)
ب-توكيل .....(سىء)
7-عدد الكيلو مترات
يكون متناسب مع عمر العربية بمتوسط من 17 الف كم الى 20 الف كم فى السنة الواحدة
عدد كيلومترات مظبوط مع المعدل المذكور ........(ممتاز)
عدد كيلومترات اقل مع المعدل المذكور ........(جيد)
عدد كيلومترات اقل بكتير من المعدل المذكور ........(غير جيد)
عدد كيلومترات اكبر من المعدل المذكور ........(سىء)

بعد الخطوة دى هاتكون قررت تنزل ولا لأ عشان تشوف العربية دى او قررت تتفرج عليها و تفحصها

رابعاً الخطوة الرابعة : مرحلة فحص العربية للشراء

من الخارج : خد لفة حوالين العربية ولاحظ الاتى

1-طلاء السيارة
-طلاء السيارة متناسب مع العمر للموديل ولا يوجد اى اجزاء لامعة اكثر من التانية
2-ملاحظة الخدوش الاحتكاكات
-وجودها فوق سنة 2000 (جيد)
-عدم وجودها فوق سنة 2000 (غير جيد)
-عدم وجودها تحت سنة 2000 (سىء)

3-الصدمات و الحوادث
ملاحظة اى فوارق بين الخطوط -بين الفوانيس و الرفارف-بين الباب و الحلق بتاعة -بين باب الشنطة و حلق الشنطة -بين الزوايا فى اركان العربية -طبقات عالية شوية فى الدهان عن الباقى -فوارق بين الاكصدام و جسم العربية
4-الزجاج
اى فوارق بين كاوتش الزجاج و الحلق اللى بيركب فية -كاوتش الزجاج جديد و اسود ولا قديم من عمر العربية -فى كتابة على اسفل الزجاج (اصلى ولا اتغير) -نقر متسابة (يبقى احسن) ولا كلة مية واحدة و بيلمع (قلق) -فى زجاج الابواب سيف الزجاج اللى فى الباب بالعرض قافل على الزجاج ولا مفارق (يبقى اتفك قبل كدة )-الزجاج لابس فى المجرى بتاعتة ولا مفارق
5-الاكسسوارات
المرايات -الشبكة الامامية -الفوانيس -الاشارات-المساحات-الأريال -فبر الاكصدام
كلها طبيعية للموديل دة ولا فيها افتكاسات فتسيبك منها احسن
6-الكاوتش
مناسب لعمر العربية .....(ممتاز)
تفاصيلة ممسوحة شوية بالنسبة لعمر العربية .....(جيد)
تفاصيلة بارزة وواضحة وشكلة لسة جديد .....(غير جيد)
تفاصيلة ممسوحة اوى وشكلة قديم .....(سىء) وتخصم تمنة من سعر العربية فى متوسط الفين ج

7-الفوانيس
نضيفة و شفافة .......(ممتاز)
متناسبة مع عمر العربية...... (جيد)
مغببة و مشبرة ..........(سىء)
8-السقف
نفس درجة و لون العربية كلها ......(ممتاز)
اسواء من العربية بوجة عام ........(جيد)
احسن من العربية بوجة عام ........(غير جيد)
غير مستوى و فية اى التواءات ....(سىء)
9-العتب
دة الجزء اللى تحت الابواب ... حط ايدك تحتية و خد سحبة كدة بطول العربية
سليم و مستوى .......(ممتاز)
فية حتت متاكلة و اماكن محببة كدة ( سىء) علامة صداء (برومة موجودة اسفل العربية )
10-الكارتيرات
دة الجزء اعلى العجل و اللى لافف حوالين الكاوتش من فوق .. ملاحظة عدم وجود اى اثر
صدأ(برومة)-حتت متاكلة -أثر لحامات -اى التواءات -اثر لحاجة زى الزيت منشعة فى المنطقة دى
11-المساعدين
وقوف السيارة كلها على خط افقى واحد (يعنى مفيش جهة اعلى من التانية لا ورا ولا قدام)
غند الضغط على ركن من اركان العربية بتطلع تانى لفوق بنعومة و ثبات (غير متقطع فى الطلوع )
عدم وجود اى اثر لزيت او تنضيف حديث ليهم ( بيبقوا فوق العجل و ماسكين العجل بالعربية على شكل عمود رفيع رأسى )

14- نظرة بسيطة على اسفل السيارة
عدم وجود اى اثر لأنخفاضات او ألتواءات
عدم وجود صداء (برومة )
عدم وجود اى اثار لزيوت او شحومات قديمة
علبة الشكمان سليمة و مش مصدية و مفهاش لحا مات و خصوصاً فى المناطق الضيقة اللى بتوصل جزء للآخر

من الداخل : بعد ما خدت لفة حوالين العربية ... افتح الباب و ادخل عشان تقعد فيها ..بس سيب الباب مفتوح و انت بتقعد
لو لاحظت ان سفل ضلفة الباب بينزل لتحت (بيقرب من الارض ) كتير وانت بتقعد فى العربية يبقى العفشة ضعيفة و المساعدين تعبانين ...
-لاحظ كاوتش الباب و حالتة
-لاحظ حلق الباب كلة (اى صداء -خبطات -لحامات -التواءات )
-لاحظ القايم (على يمينك اللى واصل بين اسفل العربية و السقف )
اى التواءات -اثر لحام قديم -فوارق بينة و بين السقف ......علامة سيئة جداً
خلاص اقفل الباب و خش العربية اقعد فيها
-فرش الصالون
وجود فرش اضافى ...... (غير جيد) شيلة و بص تحتية
الفرش الاصلى متناسب مع عمر العربية .......(ممتاز)
الفرش الاصلى اقل من عمر العربية مع وجود فرش اضافى .......(جيد)
الفرش الاصلى وحش و متبهدل .......(سىء)
-فبر التابلوة
فبر التابلوة متناسب مع عمر العربية (ممتاز)
فبر التابلوة بيلمع...... (غير جيد)
فبر التابلوة وحش و مشقق (سىء)

-فرش الصالون ..اى اثر لخياطات او ترقيعات او حتت متاكلة و شوف الدواسات و فرش الابواب و الحالة العامة لكل التنجيد الداخلى و مقايستة بعمر العربية ومناسبتة لنمط شخصية البائع
-السقف الداخلى ..ملاحظة اى فوارق او هبوطات او اثار فك و تركيب فى كل السقف و التقائة بالجوانب اللى شاية السقف كلة
-الدواسات اصلية ولا لأ و هل فى تحتها اى تأكلات او اثار لآحتكاكات مستديمة
-الجزء اسفل التابلوة
متقفل كويس و علية تراب ....( ممتاز)
متقفل كويس ....( جيد)
مفارق و فية اثار فك و تركيب ....( سىء)
مفتوح و فية اسلاك واضحة ......(سىء جداً) مؤشر لحالة الكهربا العامة فى العربية
-لوحة العدادات
اى فوارق بين الزجاج بتع العدادات و التابلوة .....(سىء)
-درج التابلوة
نضيف و متقفل من اخرة كويس ....(ممتاز)
مليان حاجات و مكركب ....(غير جيد)
ضهرة واقع و متبهدل من جوة ...(سىء)
-فرامل اليد ..... وانت قاعد جوة العربية شد فرامل اليد للآخر ولاحظ الاتى
فرامل اليد بتتطلع بصعوبة وبتقف ببطىء فى الاخر ......(ممتاز)
فرامل اليد بتتطلعبراحة و بتصد فى الاخر بنعومة (غير جيد)
فرامل اليد بتتطلع مرة واحد بسهولة و بتصد فى الاخر مرة واحدة (سىء)

انزل من العربية وروح شوف الشنطة
افتح الشنطة ولاحظ بتتطلع لفوق ازاى (بسهولة بتترفع لوحدها -بصعوبة -بتقع تانى )
شيل فرش الشنطة و بص تحت الفرش
لاحظ اى .. صداء (برومة -انخفاضات -اثر لحامات -شحومات -زيوت) كل دى علامات سيئة
بص على اركان الشنطة اللى خلف الفوانيس الورانية
لاحظ اى اثار لفك و تركيب -اسلاك بارزة -خبطات (مسمعة جوة )
شوف حالة الاستبن
استبن اصلى ......(ممتاز) ساعات بيبقى اصغر من كاوتش العربية العادى (بعض العربيات )
استبن بحالة كويسة .....(ممتاز)
استبن حالتة اسواء من حالات الكاوتش اللى متركب فى العربية ......( سىء)

حالة الموتور :
تعالا قدام الكابوت ..افتحة ..
1-اللون و الشكل
ملاحظة لون داخل الموتور (حوض الموتور) نفس لون العربية ولا لآ
-نفس لون و درجة العربية ...(ممتاز)
-اقل من درجة لون العربية (فى اللمعان )....(جيد)
-متبهدل كتير عن العربية ...(سىء)
2-الحالة العامة
ملاحظة الاركان الجانبية فوق و تحت -الوصلات -عدم وجود اى اثار نشع زيت فوق و تحت -
مستوى السوائل فى مختلف العلب -عدم وجود اى اثار لحامات او شروخ او تغطيات -البطارية عليها شحم او املاح (بيضاء) - السيور ناعمة و مش ناشفة ولا مشققة -عناصر تركيب الفوانيس من ورا ثابتة و مش مفكوكة قبل كدة -علبة الريداتير مش مصدية -وش الموتور (السدر) من الناحية المتصلة بالكابينة العزل فيها ماسك نفسة و مش واقع و مفيش اجزاء مصدية الاجزاء فوق العجل(العلب) مفيش فيها لحامات ولونها ذى الباقى -الخط العرضى اعلى حوض الموتور مستوى و افقى

اطلب من البائع يدور العربية و انت واقف قدام الموتور ولاحظ الاتى
-فى صوت قفشة فى التدوير ولا دارت بنعومة
-صوت الموتور نغمة واحدة ولا فيها تقطيعة او ذبذبة
-فى صوت ورة او صفارة صغيرة
-اطلب منة يزود بنزين و شوف .. الصوت بيعلى على وتيرة واحدة ولا بيقطع و فى اصوات تانية دخلت فى الموضوع
ابعد عن العربية فى اتجاة عمودى ...وشوف فى اى دخان او بخار طالع مهما كان مش ملحوظ فى زغلله و (ظاهرة السراب) يعنى حرارة طالعة اعلى الموتور ولا لأ
ارجع تانى للعربية ..شامم اى ريحة
شوف مروحة الرياتير اشتغلت ولا لسة
حط ايدك على الريداتير ... تستحمل تحط ايدك ثانية واحدة ولا بقى سخن و مولع جداً
اطلب من صاحب العربية يلف الدركسيون للآخر مرة يمين ومرة شمال
- ما سمعتش اى صوت و انت واقف فوق الموتور ...(ممتاز)
- سمعت صوت طقطقة او صفارة خفيفة اوى ........(سىء)

ارجع ورا العربية و حط ايدك قدام فتحة الشكمان
سد بأيدك فتحة الشكمان لمدة ثانية واحدة ..لقيت ممانعة و قوة بتبعد ايدك جامد يبقى...( ممتاز)
....شيل ايدك و بص فيها
ايدك نضيفة و معلهاش اى حاجة ..(ممتاز)
مفيش اى حاجة بس فى اى حاجة ولو بسيطة بتطلع من الشكمان سواء (مياة -رزاز-نقط سوداء -دخان بسيط) .....(غير جيد)
فى اى اثار لنقط سوداء على ايدك ...(سىء)
ادخل جوة العربية تانى
لاحظ الاتى
1-لف الدركسيون... ذى ما كنت واقف امام العربية فاكر (اى تقطيع فى اللفة -تكات -صوت-)..(سىء)
2-جرب الزجاج الكهربا فوق و تحت الاربعة
3-بص على مؤشر الحرارة
ثابت فى النص...(ممتاز)
بيشاور عقلة لقدام (سىء)
4-بص على لوحة العدادات
ال RPM مفروض يبقى بين 800 و 900 فى الطبيعى
5- شغل التكييف على البارد على اقصى درجة
ال Rpm هايعلى سنة لفوق ..دة كويس ...حط ايدك على فتحات التكييف ..بتطلع هواء بارد جداً و مستمر لفترة دقيقة لديقتين يبقى كويس
-ال RPm و التكييف شغال ثابت .....(ممتاز)
-ال RPm بيترعش و يطلع و ينزل .....(سىء)
5-شامم اى ريحة حاسس بأى صوت خفيف ...مفيش .. يبقى تمام
6-اطفى التكييف و خليك قافل الزجاج 3 او 5 ثوانى
-درجة الحرارة ما رحتش بسرعة ....(ممتاز)
-درجة فرقت وراحت بسرعة ....(سىء)


لحظة اتخاذ القرار
جمع كل النقاط السلبية و سيبك من اى عناصر ايجابية
لقيت عددها قليل ودرجة اهميتها بسيطة ....(يبقى هاتشترى العربية دى )
لقيت عددها مساوى او اكتر و درجة اهميتها عالية ....(يبقى سيبك من العربية دى )

افتح الباب و انت نازل من العربية واخد قرارك أة ولا لأ (مهما حصل بعد كدة مايفرقش معاك)
========================= ========================= ============
بالنسبة للإجراءات القانونية للبيع و الشراء, أدخل هنا على قسم المرور و الشهر العقارى فى موضوعات مثبتة عن الكلام ده, و طبعاً نصيحتى : البيع و الشراء بعقد بيع مسجل فى الشهر العقارى, علشان تحفظ حقك و تحدد إللى ليك و إللى عليك.

طبعاً متنساش الإستخارة قبل الشراء .... وفقك الله للخير.

رد مع اقتباس
  #5  
قديم 12-02-2013, 04:09 PM
Muhammad.Mojahed Muhammad.Mojahed غير متواجد حالياً
 
تاريخ التسجيل: Feb 2013
المشاركات: 28
Muhammad.Mojahed is on a distinguished road
افتراضي رد: عايز عربية للأسرة في حدود 27000 ل 32000


المشاركة الأصلية كتبت بواسطة ahmed oka مشاهدة المشاركة

بص يا باشا موجود عربيه هيونداي اكسيل عربيه ناعمه اوووووي و جميله و عائليه وواسعه و اعتماديه اوي و بصراحه عمرها ما زعلتني .. لونها نبيتي و رشه من برا نضافه بس و موفره في البنزين اوي و ثبات عالي و 1300 cc و خليجي كمان موديل 94 و سبب البيع اني عاوز اغير مش اكتر
شكرا يا أستاذ أحمد على الرد ، بس 94 موديل قديم شواية خاصة إن قدامي شاهين في الألفينات

بس خير إن شاء الله ، أنا لسه بادور و بافكر
رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 08:33 PM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017