هستلم الساجا بكره ان شاء الله

[mahmoud18]

السلام عليكم اعضاء مصر موتورز الكرام

اولا انا عايز اشكر كل الاعضاء و خصوصا هنا فى منتدى بروتون لانى بجد استفد منكم جدا
و اتشجعت انى اجيب الساجا

انا كنت متابع باهتمام لموضعكوا عن الساجا المميزات و العيوب و كده و الحمد لله توكلت على الله
و قررت انى اجيبها (معا انى فى ناس كتير من صحابى و قريبى اعدوا يخوفونى منها و كده و برده انا كمان كنت متردد اوى علشان دى اول عربيه ليا و كان فى ادامى اختيارات تاني زى اللوجان و كده بس انا استخرت ربنا و استريحت نفسا للساجا بعد اما شفتها و كمان موضعكوا شجعتنى على الخطوه دى)
انا مشترك فى المنتدى بقالى فتره مش قليله بس مكنتش بشارك كل الى كنت بعملوا انى بدخل هنا منتدى بروتون و كمان منتدى لوجان

بصوا بقا انا عايز اعرف منكوا اركز على ايه و انا بستلم الساجا او كل واحد فيكوا استلم العربيه معاها ايه و عاينها ازاى

برضوا شويه نصايح كده علشان انا سواق لسه جديد اوى فايه الى اخد بالى منوا و التسخين العربيه و البنزين
و تكلفه الصيانات
1000 5000 و كده

معلش بتقل عليكوا بس والله انا حسسكوا كلكوا زى اخواتى
و بجد الى عندوا اى معلومه يقولها و يفدنى بيها يبقى ربنا يكرمه ان شاء الله و يجازى عنى خير

و جزاكم الله خيرا

و رمضان كريم

اخوكم
م/ محمود

[atef_5005]

والله يا استاذ محمود انا برده محتار و العربيه بجد عجباني
و نفسي اشتريها

[misho502]

الف مبروك مقدما
و ربنا يعطيك خيرها و يكفيك شرها
اهم حاجه بالنسبه للسواقه ان عداد ال RPM ميعديش 3000 لحد اول 1000كم يخلصوا لأنها تعتبر فى فتره التليين و بالنسبه للتسخين مفيش داعى تعد فتره كبيره هى مجرد ثوانى لأنها عربيه حديثه
ثانيا و انت بتستلم بتلف حولين العربيه من فوق و تحت تبص اذا كان فيها خدش او حكه و تتأكد من لصق علامه بروتون على الجنوط بتبقى فى نصف الجنط بالضبط جزء مدور محفور فيه اللوجو بتاع بروتون , و بتركب جوه بتشيك على الحاجات المهمه يعنى بتجرب -النور عالى و واطى -فوانيس الشبوره خلفى و امامى -الأشارات و الأنتظار - الكلاكس -زراير المرايات - زراير الزجاج - لو معاك CD جرب الكاسيت (اوديو فقط و ليس MP3 )- المساحات - فتح الشنطه و الكابوت - فتح جميع الأبواب و غلقها - تجرب الريموت و السنتر - اعتقد دى اهم الحاجات ان لم انسى شئ ,
ثالثا الحاجات اللى بتستلمها بصراحه انا مش فاكرهم بالتفصيل بس هأقولك ع المهم - بتستلم نسختين مفتاح للعربيه و واحد منهم بيبقى فيه شفره المفتاح مكونه من اربع ارقام محفوره على قطعه معدن صغيره فى الميداليه ودى مهمه جدا عشان لو حبيت تطلع نسخه للمفتاح بيطلع بالشفره دى لازم تشيلها فى مكان امين - بتستلم كتالوج السياره +كتالوج الكاسيت + كتيب الصيانه و معاهم طبعا صوره من ورقه التخليص الجمركى - الأريال الخارجى - الأستبن بيكون عادى بس طاسه مش جنط - الكوريك - مفك عاده و صليبه + بنسه معدن + جنش قطر شبه المسمار بس كبيييير+مفاتيح بس مش فاكر كام واحد ممكن 2 او 1 او 3 الحقيقه مش فاكر حاجه تانيه و ربنا يوفقك انشاء الله

[abo-salama]

مبروك مبروك (مليار مبروك)

[محمد مصر]

مبروك يا أخي محمود وربنا يكفيك شرها ويباركلك فيها

وعرفنا الجديد لما تستلمها علشان أنا عاوز أجيب واحده

وممكن تقولي سعرها كام بالضبط ، وبعدين فيه شنطة المثلث والحاجات دي متنسهاش