صور وفيديو مقابلة مصر موتورز الثانية وعيد ميلاد سعيد

[merna_hemaya]

شكرا يااستاذ حازم لتعليقك الرقيق وكل سنه والجميع بخير وانا اللى كنت فى غايه السعاده لوجودى معاكم انا ومينا

[احمد بدر1978]

شكرا ياستاذ حازم على تعليقك الجميل
انا لسة صاحى دلوقتى وقريبا حبعت الصور لان الكاميرا والموبيل والسجاير فى العربية ومش قادر انزل افتح العربية واجيبهم بكرة الصبح لما اكمل نومى
وشكرا لاستاذ حازم شاهين لملاقاتى انا واستاذ نبيل بعد لما خلاص كنا تهنا فى بلاد الغربة القاهرة العظيمة
بالنسبة للاستاذ سامح رمزى احب اقولة ان المفروض انة قال السرعة على الدائرى 90 الباشا وهو موصلنى مشكورا انا واستاذ نبيل فاتح 140ك لدرجة انى كنت حتوة لولا استاذ نبيل هدا من سرعتة هو اة بعد بوابة القاهرة مشفتوش وفتح الماتور النووى بتاعة بس يشكر انة وصلنى لاول الصحراوى
بالنسبة للاعضاء المحترميين الى حضروا الاحتفال بعيد مصر موتورز انا خايف انسى واحد منهم بس احب اقول ليهم كلهم استمتعت بمعرفتكم كلكم
بالنسبة لاستاذ حازم خضر انا مش حقول انة اكل سرفيس حوادق ونص التورتة ولا خلص على خمسة ساقع ولا اى حاجة لو حد عرف الكلام دة فاكيد مش منى انا مش فتان
استاذ خالد انا بجد استمتعت بالحديث معك واتمنى ان الوقت كان يكون اطول من كدة
استاذ سومو حبيبى سومو اسعدنى معرفتك ولولاك مكناش لحقنا ناخد حاجة من البوفية عملت ساتر على استاذ حازم خضر قبل مايخلص على البوفية بالكامل

حبيب قلبى احمد ممدوح الشهير ب (CORSIR) والله انا زعلان انى ملحقتش اقعد معاك لمدة اطول ومستنيك فى الاسكندرية

استاذ هانى عطية استمتعت بالحديث معك وارك فى الاسكندرية ان شاء الله

بالنسبة للصور تدفعوا كام وابعتها؟؟؟؟؟؟؟

[merna_hemaya]

لا بعد ازنك يااستاذ احمد عايزين نشوف الصور وكان نفسنا نتكلم ونتعرف بحضرتك اكتر امبارح وكمان استاذ نبيل لكن مجتش فرصه ان شاء الله المرة الجايه يكون لينا الشرف ده وحمد الله على سلامتكم واهل اسكندريه بينورا اى مكان يروحوا

[mena_insurance]

استاذ حازم خضر شكرا لتعليقك استاذ احمد بدر واستاذ نبيل حمد الله على سلامتكم استاذ حازم شاهين ياترى انت فين انهردا مش باين فى المنتدى طمنا على حضرتك استاذ وائل اخبار حضرتك ايه لسه نايم من ساعه الادان ولا ايه استاذ هانى سعيد بمعرفتك وان شاء الله يوم الاحد نخلص لحضرتك الموضوع اما استاذ احمد ممدوح ضحك علينا ياجماعه وقال انه نزل الحاجه عل يوتيوب بس انا كل ما بعمل بحث الموقع يقولى استاذ احمد بيشتغلك فين ياريس ؟؟؟؟؟
المهم بجد انا سعيد جدا جدا بمعرفتى بحضراتكم جميعا ويارب نكون امبارح كنا ضيوف خفاف ومرسى لمقايلتكم الرائعه واتمنى النجاح للجميع

[TELEBK]

أولا أحب أشكر كل الأخوة الأعضاء اللي كانوا حاضرين في الإحتفالية الجميلة ديه ، وخصوصا إنها كانت في مكان محترم " سبير كار " وبقول للأستاذ أمير ألف مبروك علي الإفتتاح وبالتوفيق والرقي بإذن الله ، وكم كانت سعادتي بالغة بتعرفي علي العديد من الشخصيات المحترمة جدا جدا والتي كان من الصعب العثور عليها في مكان واحد ودون معرفة سابقة لولا مثل هذا المنتدي الجميل والذي يغلفة سمة جميلة ألا وهي حب الناس وتقديم يد المساعدة دون إنتظار المقابل ، وأحب أتوجه بالشكر لكل المنظمين للإحتفالية وعلي مقدمتهم الأستاذ " حازم شاهين " والذي كان موجودا من الساعة 2 ظهرا في أستقبال الموجودين قادما من بورسعيد خصيصا لهذه المقابلة ، وكم كانت سعادتي بالغة بالتعرف علي شخصيات جميله مثل الأستاذ خالد "اللبق المتحدث المتكلم "، والباشمهندس نبيل عبد الرحمن " الهادئ المتزن الخبير بأمور الحياه المجامل "، والأستاذ أحمد بدر " الضحوك اللماح جميل الطلعة المشاكس بخفة دم " ، والباشمهندس وائل " الذكي الأنيق الشيك الملبس والحديث المجامل اللماح " ، الأستاذ هاني عطية " الأنيق المتحدث صاحب طلعة جميلة ذكي الحديث والعبارات ، وغيرهم من الأخوة الأعزاء واللذين لم يسعفني الحظ بالجلوس معهم لفتره طويلة ولكن كان هناك جو من الألفة الغريبة التي سادت المكان بسرعة حتي مع عدم معرفة الأشخاص والأعضاء بعضهم ببعض ولكن في رأيي أن هذا هو سمة منتدي مصر موتورز ، والذي أتمني من الله أن يديم الصحة والعافية لكل الموجودين ، وفي رفعة ورقي ولقاءات قادمة أخري بإذن الله .
د / خالد