مشكله فى اوبل فيكترا و عايز اعرف حلها

[MosTafaFox]

المشاركة الأصلية كتبت بواسطة ahmed_kamel بص ياعمنا أنا كان معايا أوبل فيكترا موديل 98 200 سي سي وكانت معايا من الزيرو لحد مابعتها والحمد لله سنة 2006 وخلصت من مشاكلها وتكاليفها الباهظه أنا كانت عندي المشكلهإللي حضرتك بتشكي منها ديه وغيرت ستمائة حاجه (ناس تقولي يمكن دورة التبريد بتاعة الفتيس أو الباور هما اللي فيهم التسريب وغيرت الخراطيم الخاصه بهما ولم تفلح ثم البعض قالي القربه بتاعة الميه يمكن تكون بتسرب مع الحراره ويكون فيها شرخ بيتسبب في ده (أنا عايز أقولك إن الكل أكد إن الرادياتير سليم) وغيرت القربه بالغطاء ولم تنجح العمليه وحصلت مشكله كده في الوسط وطرمبة الميه باظط وغيرتها وساعتها قالولي يمكن الطرمبه كانت هيه السبب وبتسرب ميه قولت طيب أدينا غيرناها ولم تنجح برضه ماطولش عليك طلعت المشكله في الرادياتير (ولعلمك حتى وأنا واخد القرار وبشتريه وبركبه الصنايعي مكانش مقتنع إنها من الرادياتير) بس أنا قلتله أنا غاوي نظافه هوه اللي بقي في دورة التبريد مابقاش في حاجه تانيه ناقصه , وبالفعل بعد تغيير الرادياتير إنتهت المشكله تماما يعني شيك على الخراطيم لو لقتها سليمه إتوكل على الله وغير الرادياتير بيبقى للأسف مخروم من حتت كتير وعامل ومش باينه وبيبخر المايه نصيحه أخويه لو مش عزيزه عليك إخلص منها وحقولك ليه أنا لم يسبق لي أن رأيتك ولا شفت عربيتك بس حقوللك عن تاريخها معاك بدون ماأشوفها لأنها عيوب مشتركه وعامه في الأوبل فيكترا الشكل ده: 1- البطاحات إللي بتبقى فوق المساعدين تقريبا محتاجه تغيير كل 8 شهور 2- المساعدين أمامي وخلفي محتاجين تغيير كل 14 شهر على الأكثر إن لم يكن 12 شهر خاصة الخلفيين خفاف جدا 3- الـ مـاف <==== وده حاجه كده عشان ظبط الهواء والبنزين وبيسبب برجله للموتور وبتطلع لمبه لونها برتقالي بالتابلوه مرسوم عليها موتور 4- قاعدة الشداد العلويه للموتور بتتغير كل بتاع سنه هيا التانيه 5- طرمبة البنزين الكهرباء إللي تحت الكنبه الخلفيه بتتغير كل سنتين تقريبا وبتعملها معاك في أي حته وتقطع بدون سابق مقدمات 6- الموزه الموجوده بالباب مقبض الباب الداخلي يمين وشمال قدام بيتهروا الكاوتش بتعاعه 7- شاشة العرض بتاعة الساعه والراديو وخلافه الليدات بتاعتها بتقع واحده ورا التانيه لحد ماتضلم خالص وغيره وغيره وغيره وعشان كده العربيه ديه سعرها واقع في المستعمل وربنا يعينك عليها

يا استاذ كمال يعنى حضرتك تنصح بالعربية ديه احسن ولا نوبيرا

[ahmed_kamel]

عربيه عن تجربه شخصيه
ركوبه هايله جدا ثبات وتسارع وكل حاجه بس مشاكل بالجمله ليس لها حصر وليس لها أول من آخر وقطع غيار ذات عمر إفتراضي عجيب غريب مريب .... ومعاناه عجيبه في حالة إعادة البيع .... نصيحه أخويه فكر في حاجه تانيه أفضل
ومش عارف بالنسبه للنوبيرا إذا كانت جيده ولا لأ
لأن ميولي وإهتماماتي أوروبيه ومش حعرف أدلك غير في إللي اعرفه ... بس أوبل بلاش عشان ماتدعيش على حد
وده إللي بيفسر سر إنخفاض سعرها كعربيات مستعمله بالشكل ده ...ياللأسف جنرال موتورز وضعت بصمتها عليها مع إنها سياره تصميما ثاباتا مالهاش حل لكن بلاش منها في بلدنا
اللهم إني قد بلغت ..... وإللي تشوفه برضه هوه الأصلح ومايمنعش الموضوع من صلاة الإستخاره

[MosTafaFox]

طيب ايه بديل ليها بنفس المستوى بس مش كورى اصلى بصراحة عاجبنى شكلها وصالونها والصاج جدا جدا عربية جامده اوى بصراحة عن الكورى لانوس او نوبيرا وركوبة كمان بس اللى حضرتك بتقولة ده يخوف جدا انا كنت سمعت ان المصرى هو اللى فيه مشاكل كتير كده لكن الالمانى تمام هى اللى كانت مع حضرتك ايه

[tefa_king1]

يا كبير انا كونت عاميل موضوع على الحراره و المياه و كده شوفو ممكن يفيدك http://www.masrmotors.com/vb/showthread.php?t=11984

[ENG\AHMED]

المشاركة الأصلية كتبت بواسطة ahmed_kamel عيوب مشتركه وعامه في الأوبل فيكترا الشكل ده: 1- البطاحات إللي بتبقى فوق المساعدين تقريبا محتاجه تغيير كل 8 شهور 2- المساعدين أمامي وخلفي محتاجين تغيير كل 14 شهر على الأكثر إن لم يكن 12 شهر خاصة الخلفيين خفاف جدا 3- الـ مـاف <==== وده حاجه كده عشان ظبط الهواء والبنزين وبيسبب برجله للموتور وبتطلع لمبه لونها برتقالي بالتابلوه مرسوم عليها موتور 4- قاعدة الشداد العلويه للموتور بتتغير كل بتاع سنه هيا التانيه 5- طرمبة البنزين الكهرباء إللي تحت الكنبه الخلفيه بتتغير كل سنتين تقريبا وبتعملها معاك في أي حته وتقطع بدون سابق مقدمات 6- الموزه الموجوده بالباب مقبض الباب الداخلي يمين وشمال قدام بيتهروا الكاوتش بتعاعه 7- شاشة العرض بتاعة الساعه والراديو وخلافه الليدات بتاعتها بتقع واحده ورا التانيه لحد ماتضلم خالص وغيره وغيره وغيره وعشان كده العربيه ديه سعرها واقع في المستعمل وربنا يعينك عليها

1- اول مرة اسمع موضوع البطاحات دة ومقابلتنيش المشكلة دى قبل كدة
2- مساعدين الفابريكة لسة مغيرهم من سنة ونصف تقريبا (المساعدين ال GM سيئة وعن تجربة ومن التوكيل) الناس بتشكر فى ساكس وبلشتاين
3- mass of air flow ودة بيحس بكمية الهوا علشان ظبط نسبة الخليط .. المشكلة دى سمعتها فى الكورسا 1.0 انما الفكترا كانت حالات فردية ومش كتير
4- مشكلتها انها بتتفك لما تغير السيور ودة اللى بيعرضها للقطع انما لو استخدامك للعربية كويس ومفيش نتش والكلام دة يبقى مفيش منها مشاكل
5- اللى بيبوظ طلمبة البنزين نقص كمية البنزين فى التنك باستمرار وتكرار نفاذ البنزين والشوائب لو بتحط بنزين من مكان تعبان غير كدة مفيش منها اى مشاكل
6- فعلا العيب دة موجود وبالذات لو حصل فيها خدش يبقى دة بداية النهاية لها .. عموما دى مش مشكلة فى عربية .. جديدة ب 35 واستيراد ب 60
7- الشاشة لو بتقف فى الشمس كتير من غير شماسة .. الموضوع دة تقريبا فى كل العربيات اللى فيها شاشة فى التابلوة واحد صاحبى معاة 406 نفس القصة


باختصار عربية محترمة مش بتاعة عك صنايعية وقطع غيار مضروبة واسترخاص
هتسترخص هتزعلك