أذكروا محاسن عمر سليمان .... وعجبي

[ahmed_eng2001]

السلام عليكم

احب اشارك بمعلومات بسيطة عن موضوع حادثة الطائرة المصرية امام السواحل الامريكية

فى البداية ... انا كنت بتدرب فى ورش مصر للطيران فى الصيف قبل الحادثة ... و شفت الطائرة ال Boing 767 الى وقعت و هى بتعمل صيانة فى هنجر 7000 .... و تحديدا ... كانت بتغير ال O ring بتاع مجموعة العجل اليمين .... و هى مجموعة من الاويل سيلات بتتغير كلها مع بعض

معلومات عن ال بوينج 767 :-
طائرة قديمة شوية ...و لا يفضل ان تقوم النساء بقيادتها ... علشان بتحتاج بعض المجهود البشرى و خاصة فى الطوارئ عند الحاجة لرفع مجموعة الديل .... فوجدوا ان القوة الازمة لرفع مجموعة الديل لازم تكون من 2 رجالة
العيب المشهور الى اتكرر فى البوينج 767 ..... فتح فتحات الدفع العكسى للمحرك اثناء الطيران .... الطيارة الى serial number بتاعها قبل طيارة مصر للطيران .... وقعت للسبب ده

علشان كده اول ما الحادثة حصلت اول تفسير لسقوط الطائرة هو موضوع فتحات الدفع العكسى
بس لو ده الى حصل فعلا ... الطائرة تلف حوالين نفسها .. و تعمل حاجة اسمها spin و بعد شوية صغيرين ... تسقط زى الطوبة من اى ارتفاع

تفسير الامريكان انه انتحار .... دى دماغ الامريكان فى التفكير و الثقافة ... معلوماتهم من الانتحاريين الى بيفجروا نفسهم فى فلسطين انهم بيقولوا الفاظ دينية قبل ما يفجروا نفسهم و يستشهدوا

طيب .... اخبار سلوك الطيارة ايه فى اخر دقائق قبل تحطمها ؟
الطيارة كانت على ارتفاعها الطبيعى .... و بعدين عملت sink يعنى غطست ... و نزلت من ارتفاع عالى لارتفاع منخفض بسرعة كبيرة .. فكانت عاملة زاوية هبوط كبيرة ..لغاية ما وصلت لارتفاع منخفض جدا .. و بعدين .. الطيارة اتعدلت شوية و ارتفعت شوية صغيرين و بعد كدة اختفت من على شاشة الردار

اداء الطائرة بالمنظر ده يحتمل تفسيرين :-

1- اصابة الطائرة بصاروخ على الارتفاع العالى و اصابتها اصابة مباشرة ... بس مش مدمرة ... و ده الى خلى الكابتن ينزل بيها لارتفاع منخفض علشان يعوض نقص الهواء الى بيحصل نتيجة تحطم جزء من الكابينة ... و لما استقرت على ارتفاع منخفض اصابها صاروخ تانى حطمها تماما ..

و ده التفسير الى الامريكان رفضوه تماما و مرضيوش يفتحوا السكة فيه على الاطلاق

2- Jam يعنى قفش ..او تعليق ( رفض الاستجابة) فى مجموعة الديل .... و ده حصل قبل كدة اكتر من مرة فى البوينج 737 .و فى ال767. و حصلت مرة فى رحلة تدريب لطايرين مصر للطيران فى مطار الاقصر و كانت على طائرة ايرباص ... بس مش فاكر تفاصيل اكتر
المهم ... لو مجموعة الديل فعلا علقت ... و عملت وضع هبوط ( الله اعلم ليه ) الطيارة تنزل فعلا من الارتفاع ده بالزاوية دى .... و ده التفسير الى اخدوا بيه الامريكان ... و ايدوا رايهم بطلب الكابتن من المساعد انه يشد معاه دراع التحكم .... و فضلوا يحاولوا لغاية ما نجحوا انهم يعدلوا مجموعة الديل القافشة ...
بس للأسف .. الطيارة و هى نازلة بالزاوية دى و المحركات لا تزال على قدرتها .... خلت الطيارة اخترقت سرعة الصوت و ده حمل ايروديناميكى عالى جدا على جسم الطيارة الغير مصمم لتحمل الاحمال الايروديناميكية الى بالمنظر ده ... فلما الطيارة اعدلت ... الديل مستحملش و اتقطم .. اتكسر من الطيارة ... و بكدة الطيارة اصطدمت بالمحيط و اتكسرت حتت صغيرة
و ده الى جه فى التقريير النهائى و الى بالطبع مصر للطيران وافقت عليه
السؤال .... فين اشلاء الضحايا ؟ التفسير بيقول ان الطيارة اتحطمت من ارتفاع قريب من المحيط ... و ماكنش فيه انفجار

على اى حال ..... لا يزال هناك العديد من النقاط الغامضة ... زى وجود عدد كبير من افراد القوات المسلحة على الطائرة ... ليه تم التعتيم على التحقيقات !!

اه بالمناسبة .... انا سافرت على طائرة لوفتهانزا من فرانكفورت للقاهرة عام 2001 ... و فوجئت بعدد كبير من افراد القوات المسلحة على نفس الطائرة ... قرابة 30 فرد !!!

ربنا يكرمنا و ينتقم من الى كان السبب و من الى طنش و ما اهتمش بارواح الناس الى ماتوا

[AbOnOrA]

المشاركة الأصلية كتبت بواسطة ahmed_eng2001 السلام عليكم احب اشارك بمعلومات بسيطة عن موضوع حادثة الطائرة المصرية امام السواحل الامريكية فى البداية ... انا كنت بتدرب فى ورش مصر للطيران فى الصيف قبل الحادثة ... و شفت الطائرة ال Boing 767 الى وقعت و هى بتعمل صيانة فى هنجر 7000 .... و تحديدا ... كانت بتغير ال O ring بتاع مجموعة العجل اليمين .... و هى مجموعة من الاويل سيلات بتتغير كلها مع بعض معلومات عن ال بوينج 767 :- طائرة قديمة شوية ...و لا يفضل ان تقوم النساء بقيادتها ... علشان بتحتاج بعض المجهود البشرى و خاصة فى الطوارئ عند الحاجة لرفع مجموعة الديل .... فوجدوا ان القوة الازمة لرفع مجموعة الديل لازم تكون من 2 رجالة العيب المشهور الى اتكرر فى البوينج 767 ..... فتح فتحات الدفع العكسى للمحرك اثناء الطيران .... الطيارة الى serial number بتاعها قبل طيارة مصر للطيران .... وقعت للسبب ده علشان كده اول ما الحادثة حصلت اول تفسير لسقوط الطائرة هو موضوع فتحات الدفع العكسى بس لو ده الى حصل فعلا ... الطائرة تلف حوالين نفسها .. و تعمل حاجة اسمها spin و بعد شوية صغيرين ... تسقط زى الطوبة من اى ارتفاع تفسير الامريكان انه انتحار .... دى دماغ الامريكان فى التفكير و الثقافة ... معلوماتهم من الانتحاريين الى بيفجروا نفسهم فى فلسطين انهم بيقولوا الفاظ دينية قبل ما يفجروا نفسهم و يستشهدوا طيب .... اخبار سلوك الطيارة ايه فى اخر دقائق قبل تحطمها ؟ الطيارة كانت على ارتفاعها الطبيعى .... و بعدين عملت sink يعنى غطست ... و نزلت من ارتفاع عالى لارتفاع منخفض بسرعة كبيرة .. فكانت عاملة زاوية هبوط كبيرة ..لغاية ما وصلت لارتفاع منخفض جدا .. و بعدين .. الطيارة اتعدلت شوية و ارتفعت شوية صغيرين و بعد كدة اختفت من على شاشة الردار اداء الطائرة بالمنظر ده يحتمل تفسيرين :- 1- اصابة الطائرة بصاروخ على الارتفاع العالى و اصابتها اصابة مباشرة ... بس مش مدمرة ... و ده الى خلى الكابتن ينزل بيها لارتفاع منخفض علشان يعوض نقص الهواء الى بيحصل نتيجة تحطم جزء من الكابينة ... و لما استقرت على ارتفاع منخفض اصابها صاروخ تانى حطمها تماما .. و ده التفسير الى الامريكان رفضوه تماما و مرضيوش يفتحوا السكة فيه على الاطلاق 2- Jam يعنى قفش ..او تعليق ( رفض الاستجابة) فى مجموعة الديل .... و ده حصل قبل كدة اكتر من مرة فى البوينج 737 .و فى ال767. و حصلت مرة فى رحلة تدريب لطايرين مصر للطيران فى مطار الاقصر و كانت على طائرة ايرباص ... بس مش فاكر تفاصيل اكتر المهم ... لو مجموعة الديل فعلا علقت ... و عملت وضع هبوط ( الله اعلم ليه ) الطيارة تنزل فعلا من الارتفاع ده بالزاوية دى .... و ده التفسير الى اخدوا بيه الامريكان ... و ايدوا رايهم بطلب الكابتن من المساعد انه يشد معاه دراع التحكم .... و فضلوا يحاولوا لغاية ما نجحوا انهم يعدلوا مجموعة الديل القافشة ... بس للأسف .. الطيارة و هى نازلة بالزاوية دى و المحركات لا تزال على قدرتها .... خلت الطيارة اخترقت سرعة الصوت و ده حمل ايروديناميكى عالى جدا على جسم الطيارة الغير مصمم لتحمل الاحمال الايروديناميكية الى بالمنظر ده ... فلما الطيارة اعدلت ... الديل مستحملش و اتقطم .. اتكسر من الطيارة ... و بكدة الطيارة اصطدمت بالمحيط و اتكسرت حتت صغيرة و ده الى جه فى التقريير النهائى و الى بالطبع مصر للطيران وافقت عليه السؤال .... فين اشلاء الضحايا ؟ التفسير بيقول ان الطيارة اتحطمت من ارتفاع قريب من المحيط ... و ماكنش فيه انفجار على اى حال ..... لا يزال هناك العديد من النقاط الغامضة ... زى وجود عدد كبير من افراد القوات المسلحة على الطائرة ... ليه تم التعتيم على التحقيقات !! اه بالمناسبة .... انا سافرت على طائرة لوفتهانزا من فرانكفورت للقاهرة عام 2001 ... و فوجئت بعدد كبير من افراد القوات المسلحة على نفس الطائرة ... قرابة 30 فرد !!! ربنا يكرمنا و ينتقم من الى كان السبب و من الى طنش و ما اهتمش بارواح الناس الى ماتوا

افادة قيمة يا باشمهندس احييك عليها

[ahmed_eng2001]

المشاركة الأصلية كتبت بواسطة AbOnOrA افادة قيمة يا باشمهندس احييك عليها

يا سيدى ربنا يكرمك ... الواحد نسى حاجات كتير من الموضوع ده .. الزهايمر بقى

ايام ما الواحد كان شباب كنت عارف الارتفاعات الى كانت عليها الطيارة و تفاصيل كتيرة تانية

انتهز الفرصة دى و اتكلم شوية صغيرة عن شركة مصر للطيران .....

شركة مصر للطيران بدات من سنة 1932 ... واحدة من اقدم شركات الطيران فى العالم و احد اعضاء منظمة الايكاو ( اسمها كدة تقريبا بالعربى )

احدى شركات القطاع العام ( الحكومية ) و ينطبق عليها كل ما ينطبق فى اى مؤسسة حكومية ... يعنى ايه ؟؟ !!!

يعنى حتلاقى فيها ناس شغالة بجد و بتحب شغلها و بتحب بلدها و بتراعى ربنا ... و دول قلة .. الاكثرية عكس الى ذكرتهم .... بتوفر فرص كتيرة لتدريب الطيارين و المهندسين و اطقم الضيافة . تدريب الناس دى بيكلف كتير جدا ... و مع ذلك بتقوم بيه الشركة بدون مشاكل و بدون تكلفة على المتدرب من موظفى الشركة
الشركة فاتحة بيوت ناس كتير اوى ... اكتر مما تتحمله اى شركة طيران تانية
اكتر شركة مصرية بتراعى اساليب الصيانة الدورية السليمة للطائرات
العيوب :-
الواسطة فيها حاجة مسلم بيها و حاجة طبيعية جدا .... حضرتك بتحتاج واسطة جامدة علشان تتعين فى مصر للطيران ... و محتاج واسطة تانية جوة الشركة نفسها علشان تتعين فى حتة كويسة .... زى الصيانة الدورية ... لو ممعكش واسطة كويسة من جوة الشركة ... بتروح قسم الابحاث او التخطيط او اى قسم تانى مش شغال اوى

فيه خناقات من تحت لتحت كدة بين الموظفين طمعا فى الترقية و فرق التدريب الخارجية و كذلك العمل فى المحطات الخارجية

فيه افراد كتير من الى كانوا شغالين فى القوات الجوية ...جابوهم يشتغلوا فى كل قطاعات الشركة ... و فيه صدام دائم بين الموظفين المدنيين و الموظفين الى جايين من القوات الجوية .. نظرا لاختلاف طبيعة العمل ... انا شفت الناس الى شغالة فى ورش القوات الجوية .... بيشتغلوا بطرق مختلفة حبتين ... فنيا و اداريا
افكار القطاع العام كانت تسيطر على الفكر العام للشركة لبضعة سنوات سابقة

شركة مصر للطيران عندها تقريبا 50 طائرة ... و فى المعدلات العالمية ... الطائرة الواحدة بتوظف 100 فرد ... بداية من الطيار لغاية موظفين المكاتب
يعنى .. مصر للطيران مفروض يكون فيها 5000 عامل ..... الواقع .. الشركة يعمل بيها اكتر من 25000 عامل

كان فيه حالة من عدم الرضى بين كل العاملين فى الشركة .. الطيارين مش عاجبهم مرتباتهم و عاوزين يتساوا بالشركات العالمية ..... المهندسين نفسهم يقربوا من الطيارين فى المميزات و يتساوا باطقم الضيافة فى المرتب .... مرتبات اطقم الضيافة اكتر من مرتبات المهندسين بكتيييير
اطقم الضيافة مش عاجبهم وضعهم و عاوزين يتساوا بالطيارين ....

نرجع للمهندسين .. بتوع الصيانة اليومية عاوزين يروحوا يشتغلوا فى الصيانة الدورية ...بتوع صيانة الوحدات مش عاجبهم شغلهم .... و بتوع صيانة المحركات .. شايفين ان حقهم مهضوم و هكذا
اعتقد ده نتيجة وجود واسطة داخل الشركة نفسها و مفيش عدل

كفاية كدة علشان الناس متزهقش

معلومة صغيرة ..... لما كنت فى الهناجر .... كان الفريق احمد شفيق وزيرا للطيران ... كان كل الموجودين فى المطار مش عاجبهم الوزير و بيقولوا عليه مش كويس .... مهندسى مصر للطيران ... مفتشى الطيران المدنى ...العاملين فى وزارة الطيران المدنى.... و كل العاملين فى الخدمات الارضية ...... المشكلة فعلا انى ناسى تماما اسبابهم المختلفة فى تعليقهم على احمد شفيق

و معلش طولت عليكم

[AbOnOrA]

زى ما قولت يا باشمهندس افاداتك قيمة ففى الزيادة افادة برضو

انا لى اصدقاء شغالين فى مصر للطيران بس فى قطاعات تجارية وكلهم بيأكدو نفس اللى حضرتك بتقوله بالحرف

ده غير ان شغلى كاستشارى نظم معلومات ومدرب خلانى ادى كورسات واقدم استشارات لقطاعات حكومية كتيره كان منهم مصر للطيران ولمست نفس التركيبه اللى حضرتك وصفتها بالحرف

بس هقف مع حضرتك عند جزئيه التدريب ديه تحديداً لانها فى صميم شغلى
اولاً التدريب مش منه من الشركة على الموظفين خالص وهقولك ليه

اولاً تانى علشان السوق مش مفتوح وفيه شبه احتكار لصناعة الطيران من قبل الشركة وده معناه ان مش سهل اوى المتدرب يستفيد باللى اتدربه بره فى القطاع الخاص

والحاجة التانية الاهم ان حتى لو كان فى سوق مفتوح اى شركة كبيرة قوامها الاساسى هو خبرات ومهارات العاملين فيها وده استثمارها الحقيقى
فالفلوس اللى بتتصرف على التدريب استثمار مباشر فى اصول الشركة والمفروض شغلى كاستشارى كمان اثبت واأكد على ان التدريب كمل الدائرة واوجد موظف او عامل يحسن استخدام ادوات وموارد الشركة وحقق انتاجية اكبر

وفى علوم الادارة بتاعتنا فيه معيار بنسمية تكلفه اقتناء التقنية او total cost of ownership وده معناه القيمة الاجمالية لتكلفه تطبيق اى تقنيه وتشغيلها وده بيدخل فى حسابه بشكل اساسى التدريب

موضوع التدريب واهميته يتكتب فيه كتب طبعاً مش هقدر اغطية فى مشاركة بس الشاهد ان التدريب حاجة مهمة جداً فى الشركة زى الطيارات نفسها والمبانى وغيرها من المكونات الرئيسية لاى شركة

المشكلة فى ايه بقى
انا دربت موظفين من فودافون وموظفين من مصر للطيران كامثلة بس للفارق بين الشركات الخاصة والحكومية
بتوع فودافون فيهم وسايط برضو بس بنسبه اقل بكتير وحتى اللى جاى بواسطة وباقى زمايله بيعمولله حساب بيبقى عايز يتعلم ويستفيد ويشتغل

بتوع فودافون والشركات الخاصة عموماً الكبيرة بيفاصلو ويقاوحو ويحسبو تكاليف التدريب والعائد بتاعة كويس
وممكن تلاقيه يقولك اوفر التدريب يبقى عندى مش فى مراكز او اوفر ابعت نص الناس وهم يدربو داخليا الباقى وكده بيدورو على حلول عملية دايما وبشكل فعال

الوزارات والشركات الحكومية والقطاع العام والنقابات كمان بتبقى شغالة بتسعيرة داخلية كده مظبيطنها من جوه مع بعض
عارف كنا ساعات نقدم عروض باسعار اقل وحلول عملية جداً وتترفض باعتبارها (غير جدية) !!! لمجرد ان السعر منافس جامد
وطبعاً المسئولين عن الحاجات ديه لعيبة بيجيبو اسعار فوق وتحت علشان يختارو اللى هم عايزينة من النص

واللى هما عايزينه مش شرط خالص يكون الافضل بالعكس ممكن ميكونش ليه اى ستين لازمة بس اهوه بند ولازم يتملى بحاجة تيجى من وراها حاجة

والمصيبة الاكبر بقى فى ان فى النهايه البيروقراطية والفساد الادارى بيجيبلك ناس غالبيتهم ان مكانش كلهم جايين التدريب كمان بواسطة وممكن جدا مش لهدف يتعلمو ولا حاجة مجرد انه تاهيل لمنصب ادارى اعلى او نقل من ادارة للتانية او بيريح اعصابه يومين وطالع يروش والاسم بيتدرب على حساب الشركة

علشان كده انا وغيرى كتير من الناس ممكن منكونش اشتغلنا فى مصر للطيران نفسها بس عارفين ان سيادة الفشيق اكيد معملش لا طفرة ولا نيله وان الشركة مازالت بتعانى وماشيه ببركة دعا الوالدين وبتستنزف الاقتصاد المصرى عموماً بطرق مختلفه

عموماً انا رائى ان الشركة ديه لازم تعاد هيكلتها وتحول لقطاع مختلط (عام بمساهمة استثمارات خاصة) وتركز فى الخدمات الاساسية وتغذى وتدعم شركات قطاع خاص يتاح ليها بالقوانين منافسه الشركة الوطنية
يعنى بشكل اقرب للى حصل مع الهئيه القومية للاتصالات ودخول شركات خاصة لقطاع الاتصالات عموماً
وده لان قطاع الطيران فى مصر واعد جداً بكل الحسابات وتعثر مصر للطيران وكونها شركة احتكارية هيفضل موقع القطاع كله وهتستمر الفوضى والمحسوبيه بشكلها الفج طالما مفيش منافسه

موضوع محتاج كلام كتير والله وسعدت بمشاركات حضرتك القيمة جداً

[ahmed_eng2001]

انا بشكرك على المشاركة و الافادة فى موضوع التدريب ده ..... و كلام حضرتك مظبوط بنسبة 99% ( و سيب الـ 1% ده ضرايب )
هى من الاخر ... شركة شغالة بالبركة و عاوزة تقييم من جديد .... الله يرحمه فهيم ريان ... قالها فى التليفزيون ... سوق الطيران فى مصر مش مستحمل اكتر من شركة .. فانا مش حسمح بشركات تانية تضرب الشركة الوطنية و تخسرها !!! الله يسامحه على الاراء الجبارة دى ... ده على اساس ان مصر للطيران بتكسب كويس و بكدة قفل السوق على مصر للطيران .... و الشركات الخاصة لم تقم لها قائمة الا لما فهيم ريان مات

التدريب ..... يا راجل ده لما كنا طلبة و حفينا وسايط و زن على الودان و توسل .... وافقوا انهم يخفضوا دورة اسمها basic مهندسين هيكل و محرك ....... خفضوها من 6 الاف جنيه لـ 4 الاف جنيه ... على شرط ان الفصل ميقلش عن 12 فرد ..... دفعنا الفلوس و قلنا لما نشوف الدورة دى حنقعد فى الورش اد ايه ...
اخدنا كل الدورة فى فصول دراسية !!!!! يا نهار مش فايت
امال لو حبينا ناخد فرقة طيارة مش كبيرة ..... زى الايرباص 320 مثلا .... قالولنا 20 الف جنيه .. اسبوع واحد نظرى .... حسبى الله و نعم الوكيل

انا سعدت بالنقاش مع حضرتك