إجراءات تجديد رخصة السيارة لمدة سنة بدون فحص (2013)

[Dr.Smile]

نبدأ موضوعنا ونقول ( بسم الله الرحمن الرحيم )

أنا عارف إن الموضوع ممكن يكون اتعمل أكتر من مرة ,, بس مفيش مانع من الإعادة .. وفي الإاعادة إفادة ^_^

هحاول ألخص تجربة يومين في المرور من الصبح لآخر النهار ,, وقفت فيها في كمية طوابير لا تعدّ ولا تحصى ,, وسمعت فيها فتاوي من أشخاص - ربنا يسامحهم - خلوني أضيع ساعتين تلاتة على الفاضي ..

علشان كده قررت أكتب الموضوع ده علشان محدش يحتار حيرتي ,, وأحكي فيها رحلتي مع المرور لتجديد الرخصة للوجان لمدة سنة بدون فحص ,, ويلا نبدأ على بركة الله ^_^

=-=-=-=-=-=-=-=-=-=-=-=-=

المرور : طوسون ( الاسكندرية )
المطلوب : تجديد رخصة اللوجان ( 1600 CC ) لمدة سنة بدون فحص ,, مع وجود حظر بيع
الأوراق المطلوبة ( اللي تاخدها معاك من البيت ) :
1- صورتين للبطاقة الشخصية
2- صورتين لرخصة السيارة
3- جواب البنك أو جهة التقسيط ( طبعاً لو عربيتك كاش مش هتحتاجه )

=-=-=-=-=-=-=-=-=-=-=-=-=

الرحلة في المرور :
1- تروح كشك التصوير وتقوله عايز براءة ذمة ( مخالفات ) وعايز ورقة كمبيوتر ( هيديلك ملف فيه ورقتين مكتوب عليهم "براءة ذمة" وورقتين مكتوب عليهم "كمبيوتر" وهيقولك 3 جنيه يا أستاذ ) ^_^

2- تاخد ورقة "براءة ذمة" والرخصة تطلع بيهم على الشباك ( هتلاقي الشبابيك متوزعة بأرقام اللوحات ) وتقوله عايز " الرقم القديم أو الرقم الأصلي "

3- تاخد الملف وورقتين "براءة ذمة" ومعاهم الرخصة ,, وتروح بيهم على النيابة تقوله عايز أعمل شهادة مخالفات ,, هيقولك تعالى كمان ساعة يا بيه ( طبعاً الموضوع مش هياخد ساعة ولا غيره ,, إنت خليك راشق جنب الشباك لغاية ما ينادي على اسمك ويديك الورقة )

4- تطلع على أي شباك تقوله عايز أدفع الرسوم أو الضريبة ,, وهو هيعملك " تقدير رسوم " على حسب سعة العربية ( أنا دفعت 217 جنيه - تجديد سنة - 1600 CC ) وتروح تدفعهم في الخزنة وتاخد إيصال

5- تروح على اي كشك لأي شركة تأمين إنت عايزها .. وتدفع 108 جنيه تأمين إجباري وتاخد الوثيقة ( ملحوظة : الأخت بتاعة شركة رويال كانت عايزة تلبسني في وثيقة تانية بـ20 جنيه ولا لها أي لزمة ,, بس أنا رفضت آخدها ^_^ )

6- تجيب نموذج 251 من الشباك وتدفعلك 6.25 جنيه ( لو العربية ملهاش ملف في الأرشيف هتضطر تجيب ملف جديد وتدفع 12 جنيه زيادة ) .

7- تروح للأرشيف تديله الرخصة وتقوله عايز الملف القديم .. وهو هيسلمه للشباك وحضرتك تستنى دورك وتسلّم الورق اللي معاك

8- هتستلم ورقة "كمبيوتر" وتسلمها للكمبيوتر ,, وتستنى ربع ساعة ,, وبعدها تستلم رخصتك .. وكفاااااارة يا راجل ^_^

=-=-=-=-=-=-=-=-=-=-=-=-=

ملخص الخطوات ( علشان الناس متتخفش من الكلام اللي فوق ) :

1- تصوير المستندات ( ملف + مخالفات + كمبيوتر ) = 3 جنيه
2- شباك التجديد ( الرقم القديم + تقدير الرسوم أو الضريبة )
3- النيابة ( دفع المخالفات )
4- الخزينة ( تسديد الرسوم ) = 217 جنيه
6- التأمين الإجباري = 108 جنيه
7- الأرشيف ( ملف العربية )
8- شباك التجديد ( ورقة الكمبيوتر )
9- الكمبيوتر ( تستلم من هناك الرخصة )

=-=-=-=-=-=-=-=-=-=-=-=-=

يارب يكون الموضوع سهل وبسيط .. ودي صورة لقطتها من المرور للإجراءات المطلوبة

[Dr.Smile]

إجمالي التكاليف :

# مكتب تصوير المستندات = 3 جنيه
# رسوم ( ضريبة ) = 217 جنيه
# تأمين إجباري = 108 جنيه
# نموذج 251 = 6.25 جنيه
# ملف تجديد = 12 جنيه ( لو لك ملف قديم في المرور مش هتحتاجه )

===============

التكلفة الإجمالية ( بالملف ) = 346.25 جنيه

لو حسبنا الـParking وتصوير البطاقة والرخص ,, هنقول 350 جنيه ,, ومبروك عليكم الرخصة

[sherifabden]

:lov eu:

[ahmad kandil]

مشكوووووووووووووورAHLNWSH ALN

[Dr.Smile]

عفواً .. وأتمنى يكون الموضوع مفيد