بعد ما عملت الموتور .. كام استفسار ياريت تساعدوني فيه

[احمد الجارحـي]

بسم الله الرحمن الرحيم

شباب انا عربيتي 128 و عندي كذا أستفسار و ياريت تساعدوني ف اجاباتها

ده للون العربية بشكل عام عشان علي اساس اللون هتحاولوا تساعدوني ف تقدير التكلفة للمطلوب الأتي :-




1- لو عايز اشيل بوية الشنطة و اخليها ع الصاج و تاخد دوكو من جديد ميتاليك يكلفني ف حدود كام!؟ لان الشنطة الدوكو بتاعها متقشر و واخدة معجون كتير و حالتها تقرف الكلب الحزين.

2- عندي كام نقرة ف هيكل العربية لازم تاخد دوكو نفس اللون ايه أنسب حل ليها من ضمن النقرات في الرفرف اليمين ورا و في الشمال ورا و ف اليمين قدام

3- الصالون عندي فيرنا الكرسي اليمين الجرار بتاعه مش شغال ده غير انه عايز شغل للحام لان الكرسي مش ثابت ايه أنسب حل ف رأيكُم؟

4- لو حبيت أعمل سبويلر للشنطة سبويلر زي ده


ثمنه كام ؟ ولو حبيت أدهنهُ نفس للون العربية يكلفني كام الدوكو؟

5- بفكر أدهن الجنوط للون يكون مُتناسب مع للون العربية و للون الصالون البيج فكرت ف للون فسفوري فاقع ايه رأيكم ف اللون و ازاي ادهن الجنوط ؟

6- كمان عايز اركب اضائة للصالون بدل المعفنة المحروقة اللي فيها أعمل إيه!؟

7- بفكر أركب قطعتين زجاج كهرباء امامي و ليا معارف قالولي هات قطعتين تيوتا عشان هما نظاف عايز اعرف يعملوا كام و تركيبهم ف حدود كام؟

8- كمان عايز أعرف الفرامل عندي ورا ضااااايع الهاند بريك مش شغال روحت لبتاع الفرامل قالي هنجيب تيل جديد بحوالي 95 او 100 جنية و مصنعية تركيب 60 ج

ده إيه ظروفة !؟

معلش طولت عليكم

يلا يا شباب مستني ردودكم

[ALAARABIE]

السلام عليكم كنت حابب اعرف رايك فى الميكانيكى عشان انا عندى نفس المشكله الموتور خفيف والعربيه ساعات بتسخن وعايز اعمله وفيه ميكانيكى قالى حيتكلف حوالى 800 جنيه يا ريت ترد عليا عشان انا زهقت وكنت عارض العربيه للبيع

[احمد الجارحـي]

المشاركة الأصلية كتبت بواسطة ALAARABIE السلام عليكم كنت حابب اعرف رايك فى الميكانيكى عشان انا عندى نفس المشكله الموتور خفيف والعربيه ساعات بتسخن وعايز اعمله وفيه ميكانيكى قالى حيتكلف حوالى 800 جنيه يا ريت ترد عليا عشان انا زهقت وكنت عارض العربيه للبيع

الميكانيكي بيختلف من شخص للتاني وانا هتكلم عن الشخص اللي انا اتعاملت معاه فهو شخص بصراحة كويس و ماهر و سمعتهُ كويسة و بيستلم منك الجثة هامدة يرجعهالك بأمر الله جثة ناطقة و يقولك عربيتك محتاجة إيه و مش محتاجة إيه و يمكن غالي حبتين عن السعر اللي انت قولته يعني اعتقد ان عربيتك لو محتاجة طقم شمبر بس فقط لا غير ممكن فعلاً تدخل ف 800 جنية اما لو محتاجة شمبر و لوازم اخري ف اعتقد السعر هيعدي
و لو عايز تعرف الميكانيكي اللي اتعاملت معاه ادخل موضوعي بتاع تجربتي مع طقم الشمبر هتلاقي فيه كل التفاصيل و لو كلمته قولته انا جايلك من طرف احمد الجارحي اللي عمل عندك طقم الشمبر بتاع 128 الخضرا و هو ان شاء الله هيقوم معاك بالواجب و بزيادة كمان و ان شاء الله ربنا يكفيك شرها و يرزقك خيرها