رابطة ملاك القوية فيات 125 لتبادل المعلومات ؟

[hazem_khidr]

المشاركة الأصلية كتبت بواسطة thunder2006 السلام عليكم ورحمة الله وبركاته فى احتمال انشاء الله انى انضمن للفريق القومى لراكبى 125 بس فى شويت استشارات لو سمحتم 1- معروض على عربيه 125 ( مش عارف الموديل بس تقريبا 84 والله اعلم .. المهم انه فوق ال 80 ) هل دى اكيد بولندى ؟؟ 2- نسيت اقول ان العربيه ستيشن ولانى محتاج عربيه استيشن فى شغلى .. فا اللى موجود امامى الان 125 وفى 1200 لاده تقريبا برضه موديل 84. فى الحالتين مش عارف هل 125 ستيشن افضل من 1200 ستيشن ولا لا ؟؟ سعر ال 125 الاستيشن دى المفروض يكون كام ؟؟ مع العلم ان صاحبها قالى هايطلع الرخص باسمى ويظبطها عفشه وسروجى وسمكره ودوكوا ( مهو ده طبيعى علشان يعرف يطلع الرخص اصلا ) لانه كان راكنها لمدة سنه ونصف بدون استخدام على الكاوتش ... فهل عجلها ده يصلح للاستخدام تانى ولا هايترمى هو كمان ؟؟ هو الصراحه العربيه كانت مركونه فى سوق .. والناس كانت بتستخدمها رف ليهم فا السقف اتطبق شويتين كان فى حد كان بيجلس عليه .. بس الراجل قال كله هايتظبط وتتطلع الرخص باسمى. 3- ولو حد عنده خلفيه سعر 1200 لاده ستيشن معاها جواب ( لانها خارجه من تكسى بعيد عنكم ) المفروض يكون كام ؟؟ لان صاحبها بيتكلم فى 8000 وبيقول لو عايزها متظبطه هاخدها على 10000 ؟؟ 4- طبعا انا شغل كمبيوتر .. وده سبب طلبى للاستيشن .. لان مينفعش انقل حاجاتى فى عربيه عاديه او على السقف .. وخاصة انى من اسكندريه .. وشويت شتاء على السقف يروحونى انا واى كمبيوتر هايتحط على السقف للعرض فى المتحف مش فى المحل. 5- الكلام اخدنا .. ونسيت اقول انى اول مره هاركب عربيه .. ياعنى هاخد السلم من الجراج قبل اوله بشويه كتير .. فهل ال 125 افضل ولا 1200 بالنسبه للاطفال اللى شبهى فى السيارات ؟؟ 6- العربيه بتلين فى مكانها ( حسب كلام الراجل لانها لسه معمرة ماتور ) ومعاها بطريه جديده لسه متفتحتش .. بس شكلها عجيب .. هو خالع الزجاج كله .. علشان ميتكسرش ... والكراسى شكلها عدى عليها فيل ... والكنبة اللى ورا ملهاش ضهر .. وطبعا معاها كام خبطه + بارومه فى حته صغيره فى باب الشنطة اللى ورا ( مش عارف بتسموه ايه ) وشيت صداء فى السقف + فى اكتر من مكان بس واحد صحبى قالى انها تتعالج .. وحسب كلام الراجل انه هايظبطها زى ما قلنا ويسلمهالى برخص باسمى . ايه الكلام ؟؟؟ 7- هل فى حاجه معينه اشوفها واتاكد منها قبل الشراء ؟؟ ولا اشترى وربنا يستر ؟؟ ولو فى حاجه مكانها فين وشكلها ايه وتكون سليمة ازاى اتمنى انى مكونش طولت عليكم .. وتكون الصورة وصلت بما فيه الكفاية ( هو انا عاجبنى شكل ال 125 اكتر من ال 1200 بس مش عايز ارمى فلوسى فى الارض )

بصراحه شايفها صفقه غير مربحه بالمره
العربيه كلها متدمره و هتصرف علي صاحبها و بعدين هتبتدي تفتح بقها معاك و تصرف اكتر من ما هو صارف
خلي بالك انه بيصلح علشان يبيع يعني هيسلمهالك اي كلام
و علشان تعمل شغل صح مش هتصرف اقل من 6000 جنيه علشان ترجع عربيه تاني
انا شايف انك لو اخدتها ب 6000 جنيه علي حالتها و صرفت عليها انت يبقي اوك
بس خلي بالك انها هتصرف مصاريف كتير و انا من رأيي ابعد عنها و شوف عربيه تكون حالتها حلوه و افضل منها
بالنسبه للمقارنه مع اللادا 1200 فبالتأكيد ال 125 اقوي و افضل بمراحل
من ناحيه العفشه و الشكل و التحمل

المشاركة الأصلية كتبت بواسطة karimomar1976 اتشرف بان انضم اليكم لو تسمحوا لى لرابطة 125 انا انشاء الله معايا 125 بولندى موديل 82 العربية فابريكة من جوه - وهى كانت ملك للوالد رحمة الله علية وفضلت السيارة مرفوعة كذا سنة - المهم الماتور عمل عمرة مرتين تقريبا - وهو حاليا بيدخن ابيض - روحت لميكانيكى قالى الماتور عايز عمرة - والعمره هتتكلف حوالى 2500 جنية - المهم صوت الماتور خشن جدا وفى صوت تخبيط وسألته لو حبيت اجيب ماتور 131 هل هيكون افضل - قالى خساره تصرف على العربية وانه هيتكلف 3000 تقريبا انا مش عارف انا زهقت من الماتور البولندى عشان خشن وتقيل وما بيجريش ونفسى اغيره لماتور ايطالى 131 - 6غيار - ارجو منكم النصيحة - وسألت فى ناس قالولى روح عزبة شلبى - وناس قالولى روح بور سعيد احسن وخد معاك العربية وميكانيكى ولو عجبك ماتور ممكن تركبة هناك وتبيع الماتور القديم بحوالى 400 جنية - ارجو مشاركتى وابداء النصيحة لأنى داخل على تجديد الرخصة والعربية دى ممكن انشاء الله تفضل معايا كمان 4 - 5 سنيين - بانتظار مشاركتكم اعمل ايه والسلام علكيم ورحمة الله وبركاته - سبحان الله وبحمده سبحان الله العظيم

العمره هتتكلف اقل من المبلغ دا
حتي لو المبلغ دا يبقي الافضل انك تجيب موتور 131 افضل بكتير
يكون يا اما 2 كامه 1600 او 1400 واحده كامه او 1600 واحد كامه(الموتور المايل)
دي افضل مواتير تتركب علي ال 125 و طبعا موتور ال 132 ال 1600
و بلاش تعمل عمره و اشتري موتور ستاندر افضل بكتير

المشاركة الأصلية كتبت بواسطة أحمد جودة3 يسعدني أن انضم اليكم لرابطة فيات 125 الحمد لله ربنا وفقنى واشتريت سيارة فيات 125 اسبيشيال ايطالي موديل 1972 موتور 132 فيه 2 كامة 1495 سي سي الفتيس 5 غيار + المارش وخلصتها على 9500 جنية عاوز اعرف رايكم فى السيارة عموما من حيث الموتور . وبفكر احدث فيها بعض الحاجات فعاوز نصيحتكم هي الاساسيات تمام بس عاوز اعملها شوية اكسسورات شبابية شوية ... تنصحوني بايه

الف مبروك يا استاذ احمد و ربنا يديك خيرها و يحميك من شرها
ال125 الايطالي عربيه محترمه و قويه فعلا اهم حاجه اساسياتها سليمه
من جهه التحديث فللاسف لا يوجد موديل اعلي منها لكي تقتبس منه بعض الامكانيات لذلك انصح بثبات حاله العربيه افضل

[thunder2006]

المشاركة الأصلية كتبت بواسطة hazem_khidr بصراحه شايفها صفقه غير مربحه بالمره العربيه كلها متدمره و هتصرف علي صاحبها و بعدين هتبتدي تفتح بقها معاك و تصرف اكتر من ما هو صارف خلي بالك انه بيصلح علشان يبيع يعني هيسلمهالك اي كلام و علشان تعمل شغل صح مش هتصرف اقل من 6000 جنيه علشان ترجع عربيه تاني انا شايف انك لو اخدتها ب 6000 جنيه علي حالتها و صرفت عليها انت يبقي اوك بس خلي بالك انها هتصرف مصاريف كتير و انا من رأيي ابعد عنها و شوف عربيه تكون حالتها حلوه و افضل منها بالنسبه للمقارنه مع اللادا 1200 فبالتأكيد ال 125 اقوي و افضل بمراحل من ناحيه العفشه و الشكل و التحمل

جزاك الله كل خير على ردك
هو طالب 5000 جنيه بدون صيانة .. او 7250 واستلمها بالرخص باسمى طبعا بعد توضيبها .. فما رئيك ؟؟
ومن الافضل اخد معاى ميكانيكى ولا سمكرى ولا ايه بالظبط للكشف على العربيه ؟؟

[hazem_khidr]

اعتقد التمن كده معقول بس برضه خلي بالك هتصرف كتير علشان تبقي عربيه
خد معاك سمكري يبص علي اساسياتها و يقول اذا كان فيه امل منها ام لا

[karimomar1976]

السلام عليكم ورحمة الله وبركاته
شكرا استاذ حازم على اهتمام حضرتك ومعلوماتك المفيده - انا كنت بسأل ماتور 131 افضل 1600 كانة واحدة ؟؟؟
وده نصحنى بيه ميكانيكى وقالى اجيبه الفتيس الصغير لو هجيب الماتور بالفتيس - مش عارف هو ده الماتور المايل الى حضرتك بتقول عليه ؟؟؟ وعايز اعرف المواتير اجيبها منين افضل ؟ عزبة شلبى ؟ ولا بور سعيد ؟؟
والماتور 131 1600 كامة واحده بالفتيس يعمل حوالى كام ؟؟؟
وشكرا لمعلوماتكوا المفيده الى بتخدم الناس جميعا - وجزاكم الله خير -اللهم صلى وسلم على سيدنا محمد وعلى آله وصحبه وسلم - لا اله الا انت سبحانك انى كنت من الظالمين

[hazem_khidr]

اهم حاجه حاله الموتور و لو اغلي شويه لكن حاله افضل مافيش مشاكل بس ابعد عن مواتير ال 131 القديمه المزعجه خليك في المواتير الحديثه كاتينه كاوتش