تقييمى للنيسان صنى الجديدة ,,,,,,,,,

[hossamdoaaaa]

السلام عليكم

انا رحت النهارده اتفرجت على النيسان الصنى الجديده فى معرض نيسان فى اسكندريه الى عند الداون تاون وفى المجمل العربيه رائعه واكتر حاجه شدتنى فيها الوسع الداخلى حاجه فوق الوصف على النقيض تماما من الصنى القديمه

وكمان التقفيل للصالون فوق الممتاز لدرجة انى شوفت كذاreview على اليوتيوب لنيسان تقفيل الهند وكان ملاحظات المقيم ليها ان التقفيل فى الصالون مش كويس وقعد يتريق عليه واخدت بالى من الملاحظات الى قال عليها ولما رحت شفتها ملاقيتهاش خلاص فى التقفيل المصرى منها مثلا التقاؤ السقف مع فبر القوايم فى تقفيل الهند كان فيه فراغ حوالى 2 ملى وشكله وحش لكن فى التقفيل المصرى كان الصالون فوق الممتاز

وتانى حاجه عجبتنى جدا الكراسى تقدم ملحوظ وبفارق كبير جدا عن الصنى القديمه لدرجة انى بقول انه بنفس المستوى لكراسى الهيونداى النترا سواء البطانه والاسفنج او حتى الكسوه الخارجيه فوق الممتاز

وتالت حاجه قفلت الباب جميله جدا ومريحه مفيش عضه او صوت مزعج

الحاجات بقه الى معجبتنيش

*لو فاتح باب العربية الأمامي و بصيت عند المفصلات بتاعتو كدا هتشوف الرفرف الأمامى كلة من الداخل لحد الفانوس الأمامى من الداخل وده شكله مش كويس ومش عارف المفروض يكون فيه ايه هنا ؟؟

*فجوات الاطارات الخلفيه من عند الاكصدام فيه قطعه بلاستيك مش عارف معموله ليه وتصميمها ده يخليها تشيل طين وتراب وممكن تكون سبب لوجود بارومه فى المنطقه دى

*تقفيل الموتور كويس بشكل جيد ولكن الملحوظه عليه ان بعض وصلات الكهرباء مربوطه بشكرتون عادى زى اى كهربائى مبتدىء ومخلى المنظر مش كويس مش عارف ليه كده وهل كل العربيات كده ولا الى انا شوفتها بس ... انا كنت عارف من الاعضاء هنا من ملاك الصنى القديمه ان الملاحظه دى كانت مشكو منها بس ايه السبب فى الاستمرار فى شىء مشكو منه قبل كده

*اللحامات بين اجزاء العربيه عندى مجرى الشنطه بعد ماتفتحها مش كويس وبيان بشكل لايدل على حرفيه وفنش محترف وللامانه نفس الملاحظه لحظتها فى الالنترا الجديده لكن اخف مش بلشكل ده

*كمان باب الشنطه نفسها مفيهاش عازل لباد وشاسيه باب الشنطه باين وشكله كده و وحش سألت مندوب البيع قالى بيتباع لوحده فى مركز الخدمه وممكن تشتريه مش عارف كلامه ده صح ولا ايه

* كمان الازاز الخلفى ملزوق من غير ما اشوف اطار جلد حوايه زى الاوبترا مثلا ايه السبب هل كل الصنى كده بره مصر اوهل دى تقنيه جديده فى الصق ولا ده تقصير وتوفير من نيسان مصر؟؟

السؤال عايز اعرف نسبة المكون المصرى متمثل فى ايه بلتحديد فى الصنى الجديده وهل فيه اى مكون هندى؟؟

لكن العربيه فى المجمل ممتازه وافضل من الاوبترا بمراحل لو دخلت مقارنه معاها وخصوصا انهم نفس الفئه السعريه وان شاء الله يتفادو الملاحظات دى فى الدفعات الى جايه

وتحياتى وتقديرى للجميع

[abdelhameed]

انا رحت النهارده برضه اتفرجت عليها فى مودرن موتورز فى الدقى العربية بصراحة مبهرة من الداخل واكتر حاجة عجبانى فتحات التكييف اللى موجودة فى الخلف والاتساع بتاع الصالون برغم ان الشكل الخارجى لا يوحى بالاتساع ده اللى ممكن يكون نقطة ضعف هى ان الماتور 1500 سى سى مش 1600 بس الهورس باور 108 يعنى ممكن يعوض . سألت على الاسعار المانيول ب 95000 واستلام فورى والاوتوماتيك ب 100000 والاستلام بعد شهر. الكماليات واحدة الاختلاف فى الفتيس بس. فى المجمل هى عربية شيك واعتقد انها تستحق وانا بصراحة بفكر اشتريها

[TiTo Sky]

عربية جميلة من العملاق الياباني نيسان

[hossamdoaaaa]

المشاركة الأصلية كتبت بواسطة abdelhameed انا رحت النهارده برضه اتفرجت عليها فى مودرن موتورز فى الدقى العربية بصراحة مبهرة من الداخل واكتر حاجة عجبانى فتحات التكييف اللى موجودة فى الخلف والاتساع بتاع الصالون برغم ان الشكل الخارجى لا يوحى بالاتساع ده اللى ممكن يكون نقطة ضعف هى ان الماتور 1500 سى سى مش 1600 بس الهورس باور 108 يعنى ممكن يعوض . سألت على الاسعار المانيول ب 95000 واستلام فورى والاوتوماتيك ب 100000 والاستلام بعد شهر. الكماليات واحدة الاختلاف فى الفتيس بس. فى المجمل هى عربية شيك واعتقد انها تستحق وانا بصراحة بفكر اشتريها

انا عارف ناس جابت العربيه مبهورين بقوة الموتور ومش متخييلين ان قوة الدفع دى تطلع من 1500

بس ليه بنستغرب مابنت عمها التويوتا يابانى برضه الموتور الــ 1300 افضل من 1600 فى عربيات تانيه كتير

[sehsss]

ملاحظات مهمة جدا