باركولى يا جماعة ، أستلمت A516 LS النهاردة

[fourseasons]

ربنا يباركلك فيها يا باشا و يباركلنا فى عربيتنا الى انا و الحمد لله شايف انها من احسن العربيات الى موجوده فى فئتها السعرية

[drasd]

المشاركة الأصلية كتبت بواسطة helmy_foad بص يا باشا العربية دى ركوبة محترمة جداً بتبقى ر اكبها و أنت فخور بيها استهلاك البنزين انا إستهلاكى فى البنزين داخل المدينة على طول و فى الزحمة و علشان كدة بالورقة و القلم 10.6 لتر كل 100 كيلو دة بالظبط لأنى عامل 45 لتر فى 421 كيلو و بأحسبها من التفويلة للتفويلة علشان تبقى مظبوطة معايا - الدبرياج عالى و دة تاعبنى لأنى عربيتى اللى قبلها (حبيبة قلبى اللى شالتنى كتير --- البولونيز ) كان دبرياجها واطى فأنا حاسس أنى مش مستريح و عامل زى ما اكون لسة بأتعلم السواقة و احياناً العربية ممكن تفصل منى فى المطبات العاصية بسبب الدبرياج مع أنى بأسوق من 15 سنة و دى ناوى اظبطها فى صيانة الالف كيلو ، كل الحكاية ضبط الرجلاش - فرامل اليد لازم تشدها على الأخر خالص علشان تقفش العربية لو ناقصة سنة واحدة تلاقى العربية بتريح منك - الإنذار بتاعها مش بيشتغل غير إذا حد فتح الباب أو الشنطة أو شغل موتورالعربية حتى لو بمفتاحها الأصلى ، مش زى الإنذارات اللى لما قطة تعدى جنب العربية يزمر ، و مش عارف دى ميزة و لا عيب بس لما بيشتغل بيبقى فضيحة و أنا جربت الإنذار لما شغلتة بالريموت و أنا جوة العربية - انا ضخم الجثة عريض المنكبين شلولح ، و أنا قاعد جوة بأبقى كأنى قاعد فى البحر من الوسع ، لكن و انا داخل بأدخل محشور مش عارف لية - صوت الموتور عالى سنه صغيرة مش قوى يعنى بس فية واحد ميكانيكى صاحبى قاللى أن دة عادى جداً فى العربيات الزيرو لغاية ال 5000 كيلو لأن الموتور بيبقى خشن شوية - العفشة اللى كل الناس بتشكى منها أنا شايف أنها زى الفل مفيهاش أصوات و لا حاجة و أنا ساكن فى حتة الله يجازيهم بتوع الغاز مبهدلين الشوارع عندنا فعمال أهبد بيها فى المطبات فى الرايحة و الجاية - بالنسبة للتكييف أنا شغلتة 4 أو 5 مرات و لقيتة ثلاجة ، و فعلاً بيأثر على السحب شوية صغيرين مش قوى برضة - بالنسبة للسحب العربية زى الغول ما شاء الله ، لكن السر كلة فى تشبيع الغيار يعنى أنقل لما ال RPM يوصل 3 أو 3.5 هتلاقى العزم شديد و السحب جامد جداً و تطلع الكوبرى كأنك راكب طيارة - بأفكر أشيل مساند الرأس بتاعة الكنبة الخلفية لأنها مضايقانى فى المراية بس بأقول يمكن أتعود ، و لو مإتعودتش هأخلعهم مع أنهم عاملين شكل حلو قوى للعربية من ورا و الحمد لله لغاية دلوقتى مفيش حاجة مخليانى أتضايق منها بالعكس كل يوم بأحبها أكتر

السلام عليكم
ربنا يباركلك فيها ويحفظك من شرها ويمتعك بخيرها
انا متشكر اوي على الاجابة الوافية
بس ممكن توضح موضوع تشبع الغيار دا
يعني تنقل من اول لتاني امتى او من تاني لتالت امتى وهكذا ؟؟

[helmy_foad]

المشاركة الأصلية كتبت بواسطة drasd السلام عليكم ربنا يباركلك فيها ويحفظك من شرها ويمتعك بخيرها انا متشكر اوي على الاجابة الوافية بس ممكن توضح موضوع تشبع الغيار دا يعني تنقل من اول لتاني امتى او من تاني لتالت امتى وهكذا ؟؟

أساساً فى فترة التليين الناس بتقولك بلاش تشبع الغيار يعنى متجبش أخر الغيار
و الحقيقة أن دة صحيح بس لو عداد ال RPM ( عدد لفات الموتور ) وصل 4 و نص أو 5 لكن لما بتنقل عند 3 أو 3 و نص مش بيبقى فية مشكلة و بيكون الغيار شبع يعنى العربية إستفادت بعزم الغيار و تقدر تنقل على الغيار الأكبر منة
طبعاً مش كل ما تيجى تنقل هتبص على العدادات بس دى بتحسها بالتجربة و مع الوقت و بتعرف عربيتك عايزة أية بالظبط

[ابن فنان]

الف الف مبروك

[tareksakr]

مبروك العربية وربنا يملاهالك بركة ان شاء الله