عربية تقيلة ولا خفيفة؟؟؟ طبعا الخفيفة أحسن

[adm_mm]

ممكن نحاول نستفيد من حبك ودراستك للعربيات
مثلا
ممكن تعمل وصفة وشرح مبسط للناس الغلابة اللى معاهم عربيات تعبانة جدااا وسيئة فى الثبات والفرامل
زى الفيات 127 و128
علشان يحسنوا من ثبات عربياتهم ويزودو قوة الفرامل وممكن كمان يزودو قوة الموتور
وكل دة بمساعدتك
لو انت متحمس
انا محتاج ازود ثبات عربية 127 توب المانى موديل 1979
ومنتظر ردك ونصايحك

[borio1704]

المشاركة الأصلية كتبت بواسطة adm_mm ممكن نحاول نستفيد من حبك ودراستك للعربيات مثلا ممكن تعمل وصفة وشرح مبسط للناس الغلابة اللى معاهم عربيات تعبانة جدااا وسيئة فى الثبات والفرامل زى الفيات 127 و128 علشان يحسنوا من ثبات عربياتهم ويزودو قوة الفرامل وممكن كمان يزودو قوة الموتور وكل دة بمساعدتك لو انت متحمس انا محتاج ازود ثبات عربية 127 توب المانى موديل 1979 ومنتظر ردك ونصايحك

قبل ما نبدأ في التعديلات... لازم تعرف إن الحالة الميكانيكية للعفشة بتأثر بشكل رهيب في الثبات... يعني لو المساعدين تعبانين إنسى أي ثبات على الطريق

فراجع على المساعدين والياي والمقصات والكبالن وكاوتشات الاستابليزر، تغيير الحاجات دي لوحدها من غير أي تعديل هيحسسك بفرق كبير جدا.

بس أول حاجة عايز أفكرك إن تحسين الثبات غالبا بيحتاج تعديل على العربية، وغالبا بيبقى مكلف، والتكلفة طبعا تعتمد على حسب إنت عايز توصل بالتحسين لحد فين... ده غير إنك هتتخلى شوية عن الراحة في العربية.


خلينا نمشي مع الأساسيات الأول..


أول تعديل ممكن يجيب معاك نتايج مرضية هو تغيير الجنوط والكاوتش لمقاس أعرض علشان تزود مساحة التلامس بالأرض بقدر الإمكان، وحيبقى عندك حاجتين حاكمينك في المقاس:

1- قطر الكاوتش الخارجي ما يبقاش فارق كتير عن الكاوتش الأصلي بتاع الفابريكة... بمعنى إنه ما يزيدش عن 5 مم إجمالا.
2- الكاوتش بعد تكبيره المفروض ما يحكش في أي جزء في العربية وهي ماشية مع المطبات، سواء في الرفرف أو في الفخد أو حتى في السست والمساعدين.

والأفضل إنك تكبر قطر الجنط... علشان الكاوتش يمسك أحسن في الملفات


تاني تعديل هو تغيير المساعدين بمجموعة أنشف بعض الشيء... لو ما لقيتش حاجة مخصوصة للـ127... ممكن تجيب مساعدين بتوع عربية أكبر أو أثقل في الوزن ... بس المهم يركبوا في العربية.

التعديل ده هيساعد إن العربية تثبت في الملفات ... بس انسى الراحة في السواقة.

تالت تعديل بيكون عن طريق تحسين الثبات في السرعات العالية (فوق الـ100) عن طريق تركيب سبويلرات خلفية وأمامية وجانبية... بس دي محتاجة شوية دراسة علشان نعمل حاجة مناسبة للعربية تزود الثبات .. مش تقلله.

رابع تعديل هو النزول بالعربية وتقريبها من الأرض... عشان ننزل بمركز الثقل لتحت شوية
وده عن طريق تقصير اليايات أو تغييرها بمجموعة أقصر... وبالنسبة للسستة الخلفية في الـ127... ممكن تروح لواحد بتاع عفشة يفردلك السستة العرضية شوية فالعربية تنزل لتحت

بس ما ينفعش تعدل الناحية الأمامية وتسيب الخلفية أو العكس... كله المفروض يحصل مع بعضه.

لو بعد كل ده الأداء لسه مش عاجبك... التعديلات على العربية ممكن تكون في الصاج نفسه... بس خلينا الأول نركز على اللي فوق ده


لو عملت التعديلات اللي فوق دي المفروض تبقى عربيتك تتحول من كده



إلى حاجة زي كده


أو كده




بالنسبة للفرامل... نفس الكلام اللي قلته عن حالة العفشة يتقال على الفرامل.. ولو عايز تعدل.. فاللي هيتعمل كالآتي:

تغير الطنابير الأمامية وتجيب طنابير تانية أكبر ومتهوية...

زي اللي في الصورة دي



غالبا حتلاقي منها استعمال بتاع الـ132

الطنابير الخلفية عندك حاجة مختلفة اسمها "طبلة"... ما هياش ديسكات زي الأمامية... فقدامك حل من اتنين:

1- تغير الطنابير بطقم تاني من عربية أكبر (131 أو 132 مثلا)
2- تغير الطنابير الطبلة أصلا وتجيب ديسكات ورا... بس دول معرفش بصراحة ممكن تلاقيهم في الـ132 الـ2000 ولا لأ.


طبعا... تغيير الفرامل بمقاسات أكبر معناه إنك محتاج جنوط قطرها أكبر... مش أقل من 14... ده غير إن التيل عندك هيبقى بتاع العربية اللي انت واخد منها الطنابير.


مش عارف إذا كان الكلام ده مناسب ولا لأ... بس حبة التعديلات اللي فوق دي بيتهيألي تكلفتها ما تقلش عن 6000 أو 7000 جنيه.. وأنا مش خبير بالأسعار والماركات على فكرة.

يمكن لو تسأل في قسم التعديلات يفيدوك أكتر مني بإيه المناسب للعربية في السوق وممكن يدوك أسعار كمان.



...

[Eyad Genius]

الموضوع اكثر من رائع

[Mr.Mohamed Shehata]

فعلا اقوى موضوع قريته فى المنتدى كله
ربنا يبارك فيك

[يسشيرش]

مشكور اخي العزيز
على هذا الموضوع القيم
جعله الله فى ميزان حسناتك