معدل الامان فى السيارات … نظره فرعونيه متأصله

[oldman]

معدل الامان فى السيارات … نظره فرعونيه متأصله

معدل الامان فى السيارات فى مصر يعتبر فكر متأخر صنعه اجدادنا الفراعنه حين اختبار معدل الامان فى العجله الحربيه والتى صنعها أحمس لمحاربه الهكسوس ,, ومن يومها ويبدو ان أحمس قد طبع على البرديات ان الامان يتلخص فى مواد سميكه قويه البنيه تصمد امام اى افنجار انشطارى قد يطرأ على جسم السياره ؛ وظل هذا الفكر يتوارث وجيل بعد جيل نرى المصريين يشكون من ضعف السيارات الحديثه وعدم تحملها لأى روتين مصرى كنا قد تعودنا القيام به فيما مضى بسيارات امثال بيجو 504 وفيات 132 و جيب رانجلر , حيث كان البقاء للأقوى فمن لديه الجرأه للمرور والتحدى ولديه الصاج المناسب هو فقط من له حق المرور ولن تصبح مشكله حيث تظهر سياره فجأه من اى اتجاه ويحدث احتكاك او حتى تصادم على سرعات صغيره فينظر كل من السائقين للاخر بحقاره وينطلق كل منهم لأستكمال طريقه دون القلق من اى تغييرات قد طرأت بالصدفه على جسم سيارته ,,, ولم يفكر معظم مستخدمى السيارات فى مصر لما لم تزال السيارات كما هى بنفس خامات التصنيع وأنها اصبحت على غير المعتاد غير قابله للتصادم لمجرد المرح او لأثبات النفس خلال مفترق طرق .. ولنقارن الفكر القديم بالفكر الجديد اليكم محادثه يوميه من قلب الفكر المصرى قديمه وحديثه

المكان : احد الوزارات الحكوميه حيث ستجد كل انواع البشر وخصوصا المنقرض منها
الزمان : بالنسبه للناس هنا مش فارق يوم من ايام ربنا المهم يعدى وخلاص
المشهد : غرفه كانت منذ عصر طويل بيضاء الحوائط ولكن بفعل عوامل التوظيف والايام السوداء اللى مرت عليها اصبحت كأستديوهات الفن او ربما لوحه فنيه لنقاش سبونش جديد
وفى الداخل مجموعه من المكاتب لو نظرت لها نظره فاحصه لتأكدت ان الهدف من وضعها بالشكل التالى هو التأكد من ان اى فرد دخل لقضاء مصلحته سبفكر ألف مره قبل ان يقضى يومه كله بالداخل يبحث عن طريق العوده
ولكن سيلفت نظرك مكتبين احدهم عليه طقم مكتب منذ تأميم قناه السويس وصوره المرحوم فريد الاطرش منوره المكتب بجانب الراديو الصغير اللى كتب عليه القدر انه 24 ساعه يشتغل على اذاعه الشرق الاوسط
صاحب المكتب ده هو الاستاذ عبد الحميد مدير قسم اللى يروح ميرجعش ( الصادر يعنى )
طبعا لا يمكن الوصول لمعلومات محدده عنه الا انه موظف منذ 35 عاما بالوزاره وعمره قارب على ال 60
وعلى الجانب التانى مكتب انيق وكرسى جلد وحاجه تفتح النفس عليه شاب اسمه هيثم سنه لا يتعدى ال 30 عاما مازال حديث التعيين بفكر جديد وتعليم جامعى
وحتى يكون الموضوع واضحا لكم فقد كانت المناقشه عباره عن مقارنه بين سياره عم عبد الحميد البيجو 504 موديل 79 وسياره هيثم ذات ال 5 نجوم امان
عبد الحميد : يا ابنى انا فى الثمانينات ايام ما كنت انت عيل كنت بروح بعربيتى دى اسوان ولا حد يهمنى
كانت الدنيا كلها امان تحس انك راكب طياره ولا مؤاخذه صاج ايه وحديد ايه واكصدامات ايه وكان على ايامنا لو حد خبط فى حد مينزلش من عربيته اصلا علشان اكيد محصلش حاجه
هيثم : يا استاذ عبد الحميد انا عارف والله الكلام ده بس الوضع اختلف ودلوقتى الامان بقا مهم اوى فى العربيات ده الشركات بتصرف ملايين على التطوير واحنا هنا مازلنا لا نؤمن بفكره الامان
عبد الحميد : هيعملو الامان منين يا ابنى اذا كان العربيات بقت كلها ورق كل ما اريح بس على عربيه الاقيها انكمشت زى ما يكون متقفله ورق كرتون
هيثم منفعل : يا عم عبد الحميد ما هى العربيات اللى زى اللى معاك دى هى اكبر خطر فى الشارع الصاج الناشف ده غلط عليك وعلى اللى حواليك عارف لو انت درست فيزياء هتفهم الكلام ده اكتر
عبد الحميد : وماله يا ابنى نفهم
الا قولى يا عماد هى ايه البتاعه اللى فى ايدك دى ؟ دى بتتاكل ؟
هيثم : اه يا استاذنا دى بيتزا ستافت كراست
عبد الحميد : كرفس ايه يا ابنى بس على الصبح شيل البتاعه دى من قدامك معصبانى
هيثم : عينى يا حج متعصبش نفسك بس علشان السكر ( ربنا يريحنا منك )
بص يا حج علشان تفهم ليه العبره فى الامان مش بقوه الصاج او بضعفه لازم تفهم قانون بدائى قوى فى الفيزياء
بيقول ان لكل فعل رد فعل مساوى له فى القوه ومضاد له فى الاتجاه
عبد الحميد : ايوه فاهم زى ما حسين بيه يزعقلنا فى اجتماع مجلس الاداره وانا اجى اطين عيشتكم بعد الظهر
هيثم : يعنى حاجه زى كدا وعلشان العربيتين اللى خبطو فى بعض كان كل واحده منهم عندها طاقه حركه اللى هى سرعتها ووقفت فجأه لازم الطاقه دى تهدر
ولو انت برده تعرف فى مبدأ بيقولك ان الطاقه لا تفنى
عبد الحميد : ايوه فاهم مهو برده لما انا بطين عيشتكم الطاقه لا تفنى وكل واحد فيكم بيطلع همه على الناس اللى جايه تخلص مصالحها
فاهم انا المبدأ ده
هيثم : ايوه بالظبط كدا
اهى العربيات الناشفه قوى دى فى الخبطات الشديده بيكون عيبها كبير قوى
علشان الطاقه هنا لا تهدر بسهوله بسبب قوه الصاج فبتتنقل قوه الخبطه خلال الصاج لأضعف مكان يقابلها اللى هو بالتأكيد كابينه الركاب
وبيكون الحال اما ان عمود الدركسيون يرشق فى صدر ساعدتك ( امين ) بعد الشر عليك طبعا او ان التابلوه كله يشرف كضيف غير مرغوب فيه على الكراسى الاماميه واحيانا الخلفيه للعربيه
ده فرضا يعنى الله اعلم ايه هيكون سبب موتك فى العربيه بالظبط
عبد الحميد : طيب وكيف الحال فى الخبطات الخفيفه ؟
هيثم : بالتأكيد فى الحاله دى انت روود ماستر يعنى ومحدش هيعرف ياخد معاك حق ولا باطل
بس الفكره هنا انك بتدور على الامان فى الحوادث الكبيره
عبد الحميد : طيب ما الشوارع يا ابنى بقت زى عربيات الملاهى الكهرباء وكل واحد داخل تقاطع رامى جزء من ممتلكاته يتمثل فى عربيه معاليه على اللى جاى قصاده وعايش فى دور العيال بتوع قوى قلبك
هيثم : بالتأكيد فى عادات سيئه كتير فى شوارعنا معارضه تماما للقواعد الاساسيه للأمان بس لو لاحظت هتلاقى المعظم من اللى يمتلك عربيه حديثه مأمن عليها فالتلفيات البسيطه مقدور عليها مقابل انك ضمنت الامان لا قدر الله فى الحوادث الكبيره
عبد الحميد : اه والله عندك حق ده الواحد بقى يشوف سرعات صاروخيه على الطرق السريعه وبقت الحياه عامله زى طبق الشوربه كل معلقه بتجرى فى ناحيه وفى الاخر محدش واخد باله ان الكل هيصب فى مكان واحد
طيب انت قولتلى العربيات اللى معدل البذنجان فيها عالى بتحافظ على الركاب ازاى بقا ؟
هيثم : بذنجان !! انت مركز معايا اصلا من اول الموضوع ولا انا بكلم حد تانى
عبد الحميد : ايوه يا سيدى الامان قول بس اى حاجه اصل لسه مشربتش الشاى فالفهم بيكون صعب فى المرحله دى
هيثم : ماشى وماله ربنا يزيدك ( غباء طبعا هو احنا ناقصين )
العربيات اللى معدل الامان فيها عالى بتعتمد اعتماد كبير على هندسه الجسم بشكل يسمح بتشتيت الصدمه بعيد عن كابينه الركاب

الهياكل الحديثه توفر اقصى معدل أمان للركاب

عبد الحميد : لالا واحده واحده على هندسه وتشتيت وفيلم اسود هقولك عينك فى شغلك ومسمعش صوتك بقيت النهار
اشرح واحده واحده
هيثم : يعنى تصميم جسم وشاسيه العربيه بيكون معمول فيه حساب قوه الصدمات عليه وتم اختباره كمان لمقاومتها ومحاوله ابعادها عن كابينه الركاب
ده بيكون بعده طرق هكلمك عن اشهرها واهمها يعنى بدون الدخول فى تفاصيل ملهاش لزمه
عبد الحميد : وماله يا سيدى مش عيب ادينى فى المفيد
هيثم : اولا سريعا كدا لازم تعرف ان الامان فى العربيات الحديثه ينقسم لحاجتين
امان سلبى وامان ايجابى
عبد الحميد : السلبى طبعا ده بيقتل والايجابى بينقذ من الموت صح ؟
هيثم : ( يا نضافه دماغك ) لا امال اسمه امان ازاى اذا كان بيقتل ما هو لو صبر القاتل على المقتول… ( كان ربنا ريحنا منك )
عبد الحميد : ماشى يا مستر انترتيكر كمل ايه الفرق بينهم ؟
هيثم : الامان الايجابى ده مجموعه من الانظمه والتقنيات فى العربيه بتساعدك اصلا على تفادى الحوادث زى الفرامل مانعه للأنغلاق وانظمه التحكم فى السحب وبرنامج الثبات الالكترونى واللى بتكون ليها تأير كبير جدا جدا فى العربيه وفعلا بتمنع حدوث الحوادث بنسبه عاليه جدا لأنها بتقوم بردود افعال سريعه مفيش بنى ادم ايا كان مهارته فى السواقه يقدر يوازيها فى نفس السرعه
ومنها كمان حزام الامان لأنه بيمنع اندفاع الجسم فى حاله الفرمله الشديده
عبد الحميد : اه يبقى قصدك ايجابى يعنى علشان بيساعد فى الحفاظ على البيئه من الحوادث الضاره
هيثم : اه تقدر تقول كدا
والسلبى بقا اللى هو منظومه الامان اللى بتشتغل بمجرد وقوع الحادث ودى اللى بتساعد على توفير اقصى مستوى ممكن من الامان لركاب العربيه بعد وقوع الحادث
اهمها طبعا الايرباج واللى بيساعد على حمايتك لو اتحرك جزء من من التابلوه فى اتجاهك لكن انتبه كويس قوى الايرباج لو اتفتحت وانت مش لابس الحزام ممكن تكون السبب فى الوفاه لا قدر الله فلازم تستخدمه ومتفتكرش ان الايرباج تغنى عن الحزام
عبد الحميد : اه جديده المعلومه دى انا كنت فاكر انى هدخل فى المخده واخرج منها بعد الحادثه وخلاص
هيثم : وفى بقا هندسه الامان اللى فى جسم العربيه واللى بتحميك من خطر الصدمه وطبعا فى النقطه دى بالذات الموضوع كبير قوى ودخل فيه جانب كبير من الاعتماد على خامات خفيفه وقويه فى نفس الوقت او تصميم جديد للمقدمه بحيث انها لما تتخبط تتداخل فى بعضها بشكل هندسى يحولها الى جسر حمايه كبير ومدعم من كل اجزاء الجسم الاماميه وينضم لواجهه كابينه الركاب ويصبح من المستحيل اختراقه
او اهم نقطه بقا واللى نفسى اكلمك عنها وهى نقط الانهيار
عبد الحميد : اه عارفها دى هو انا مشوفتهاش بس فى مره وانا فى مأموريه فى الساحل الشمال شوفت عربيه حمرا دم غزال كدا والعيال عماله تصور فيها وبعدين بسأل عليها قالولى دى اسمها فيرانى
سبحان الله مع ان لونها احمر
طبعا هى كانت نص كماليات لأنها من غير سقف بس انا قولت اكيد السقف بينزل فى الكامله وكان فيها نقط الانهيار دى بقا بتعمل ايه اول ما يحصل حادثه هوووب الكرسى يطير بالسواق فى الهواء وينزل على بعد 2 كم بالبراشوت والعربيه تتفعص بسبب نقط الانهيار قوم ايه محدش يموت
صح كدا ؟
هيثم : تصدق يالله يا مؤمن انا كرهت اليوم اللى دخلت فيه الوزاره دى
دا انتو ابطال العالم فى الفتاوى مش عارف بتجيبو الكلام ده منين
ما علينا بقا علشان نخلص الموضوع ده ونقوم نشوف حالنا نقط الانهيار يا سيدى عباره عن نقط فى جسم العربيه ضعيفه البناء بشكل مقصود فى حاله الصدمه تكون تركيز القوه فى النقط دى بحيث تتكسر وتهدر فيها قوه الصدمه من غير ما تتنقل القوه دى لباقى الاجزاء المحيطه بالركاب
هو طبعا الموضوع مش كدا بالتفصيل بس انا عايز اوصلك الفكره ببساطه
عبد الحميد : يا راجل قول والنعمه
هيثم : وفى كمان تصميمات حديثه دخلت حيز التنفيذ بالفعل فى عربيات كتير وهى بتسمح لتصميم واجهه العربيه بالمحافظه قدر المستطاع على سلامه المشاه فى حاله اذا خبطت حد فى الشارع ودى بتعتمد على ان اول نقطه للتصادم بين المشاه والعربيه تكون منخفضه بحيث تكون الصدمه فى الرجل بعيدا عن الاماكن الخطر فى الجسم وتكون النقطه اللى هيصطدم بيها راس الراكب فى الكبوت لينه بحيث تحافظ على سلامه دماغه
عبد الحميد : يا سلامه دماغى انا من كميه الرغى دى بساطه ايه وبتاع ايه يا راجل امشى صدعت دماغى على الصبح وقرفتنى ومفهمتش منك ولا كلمه
هيثم : طيب فى ايه مفهمتوش بس فى اللى انا قولته
عبد الحميد : ايوه مش فاهم ايه بقى السبب اللى يخلينى استغنى عن عربيتى علشان اجيب عربيه حديثه ؟
هيثم : يارب ارحمنى
تصدق ولا ياكل معاك كل الكلام ده المهم تشرب شاى
عبد الحميد : اه كدا انت فاهمنى معاك واحد شاى بقا ونتقابل بكره الصبح

منقول

[Dr. Bolbolan]

تسلم ايدك يابوشريف ! والله استمتعت جدآ بهذه المقاله و استفدت أيضآ !


تشرب شاى يا راجل ...؟ptmnlo123per1127

Dr. Bolbolan

[oldman]

المشاركة الأصلية كتبت بواسطة Dr. Bolbolan تسلم ايدك يابوشريف ! والله استمتعت جدآ بهذه المقاله و استفدت أيضآ ! تشرب شاى يا راجل ...؟ptmnlo123per1127 Dr. Bolbolan

حبيبى دكتور بولبلان شكرا على رقة كلماتك

انا جاى اشرب شاى ولا هى عزومة مركبيةptmnlo123per1127

[Dr. Bolbolan]

يابيه تشرف ! تعالى الخبر بس وأنا تحت أمرك ! ptmnlo123per111

دانا من المنصوره يا رجل موش من ........ptmnlo123per154


Dr. Bolbolan ptmnlo123per1127

[AHMEDCAR]

جامده جدا
ربنا يباركلك