خبطتين في العتب توجع

[سيف الدين سعيد]

المشاركة الأصلية كتبت بواسطة sad-bird الف سلامة عليك وعلى العربية نقطتين لازم تاخد بالك منهم وانت بتاخد الملفات على الاقل لغايه لما تتعود على ابعاد العربية زي ماقال استاذ علاء 1. انك تاخد الملفات على الواسع زي ما قال ابو دنيا وتتدي نفسك براح حتى في المناورات لو انت على طريق بلاش الغرز دلوقتي الا لما تتعود على ابعاد العربية او تكون المسافات واسعه 2. انك تهدي قبل الملف مينفعش تاخده حتى على 20 خصوصا ان الموضوع اتكرر اكثر من مرة وبعدين يطلعلك واحد غبي حاططلك سيخ حديد والا عامل ماسورة يبقى اليوم مش فايت

اللى العن من سيخ الحديد والماسوره . لو عيل صغير واقف . أو عربيه راكنه فى الملف . والأغبيا كتير .

[Injection]

معلش أعذرنى بس أنا عايز أضحك, بس الموضوع مافيهوش اى مشكلة, ياما الواحد دخل فى طوب وحيطان, والأعضاء اللى شافوا صور لولا (اللانوس بتاعتى) عارفين.

بعد مابهدلت العربية, عرفت سر شويبس, أوعى تاخد ملف أبدا و العربية جنب الرصيف, لما تكون بتلف سواء من جنب عربية أو أنبوبة بوتجاز, أستنى لما تبقى جنب العجل الورانى بتاع العربية وبعدين لف الدركسيون, بكده مستحيل حاجة تحك فيك, وزى مالأعضاء قالوا برضه, ياريت تاخد الملفات على واسع, علشان تبقى كاشف الملف ومتلفش وتلاقى عربية واقفة ولا حد واقف وأنت مش شايفه, وعلشان تبعد عن مركز الملف.

و40 كتير قوى على ملف 45 درجة حتى, وممكن فعلا تبقى بتلف وتلاقى أى حاجة فى وشك, والفرملة والعجل ملفوف ممكن تضيعك لاقدر الله وخاصة على سرعة.

وبخصوص المراية, المراية كده ظبططها صح, بس أنا بنصحك تجيب المرايات المحدبة اللى التاكسى بيركبها, وتلزقها على مراياتك, هتساعدك أكثر فى معرفة أبعاد العربية الصح.

وأفتكر أنك دايما لازم تبقى سابق اللى حواليك بخطوة, ومتوقع اللى جنبك عايز يعمل أيه, والكلب اللى واقف هناك ده هيعدى من قدامك ولا لأ, والأتوبيس ده هيكسر عليا ولا لأ, علشان تبقى مطمن وانت سايق.

[Injection]

المشاركة الأصلية كتبت بواسطة سيف الدين سعيد اللى العن من سيخ الحديد والماسوره . لو عيل صغير واقف . أو عربيه راكنه فى الملف . والأغبيا كتير .

الله عليك ياباشا, ناس عجيبة, وفيه حاجة كمان, تبقى بتلف من ملف سريع وبعد الملف بكام متر تلاقى الناس بتعدى بكل تناكة, ولا أنت شايفهم, ولا هما شايفين العربيات اللى جاية.

[سيف الدين سعيد]

المشاركة الأصلية كتبت بواسطة Injection الله عليك ياباشا, ناس عجيبة, وفيه حاجة كمان, تبقى بتلف من ملف سريع وبعد الملف بكام متر تلاقى الناس بتعدى بكل تناكة, ولا أنت شايفهم, ولا هما شايفين العربيات اللى جاية.

واللا الميكروباصات والأجره . مطرح ما الحمار يقف يرموله البرسيم . أما تناكة الناس دى بلوه لوحدها .
واضح انك شارب كتير من البلد دى واللى بيحصل فى مرورها .

[Injection]

المشاركة الأصلية كتبت بواسطة سيف الدين سعيد واللا الميكروباصات والأجره . مطرح ما الحمار يقف يرموله البرسيم . أما تناكة الناس دى بلوه لوحدها . واضح انك شارب كتير من البلد دى واللى بيحصل فى مرورها .

شربت لما رجعت ياباشا

أبقى ماشى فى اليمين محترم وظابط الطاسة ولا غرز ولاسرعة, الاقى تاكسى جه ووقف قدامى من غير لا أشارة ولا يحزنون, ولا ميكروباص كسر عليك علشان ينزل ناس, والناس بتتشفى فيك وأنت واقف وراه مستنى لما جنابه يخلص.

ولا الشوارع الجانبية أجارك الله, وخاصة لو شارع تجارى زى الزيتون مثلا يالهوى الناس فاكرة ان الأسفلت معمول علشانهم.

عايز أقول لحضرتك النهاردة نزلت ساعة متأخر عن ميعادى, بدل 6 نزلت 7 الصبح, فى مشوار باخده فى نص ساعة بالكتير قعدت فيه ساعة ونص, كلهم بسبب أتوبيس عايز يلف من ملف ضيق ويقعد يرجع ويعمل وأحنا مستنيين حضرته, ربنا يعينا.