الشهادة لله في أسبرانزا m11 وبكل أمانة

[rotana_cinemaa]

بسم الله الرحمن الرحيم
انا اسمي محمد 32 سنة من شبرا ده تليفوني 0111601005 للي يحب يستفسر عن اي شيئ انا مريت بيه أو جربته مع أسبرانزا m11 أولا انا كنت امتلك سيارة دايو لانوس كوري لونها نبيتي كانت من سنتين ونص هي السيارة الي علي قد فلوسي لأني أشترتها مستعملة لكن كانت والله زي الزيرو اشترتها من صديق لي يعمل بوزارة الخارجية دائم السفر والعربية كانت ممتازة كانت مانوال ولكن فيها من الكماليات الأتي سنتر لوك ووحدات رفع للزجاج وجنوط ماليزي جميل وقوي وكاسيت وسي دي كينوود و4 سماعات كينوود وشماسي اونها بني غامق علي الزجاج كانت تحفة بمعني الكلمة وهي اول بختي وعشقتها حبا وقديت فيها اجمل أوقات القيادة المهم بقي من تجربتي للانوس سنتين ونصف بدأت بعد الصيف الي فات وسفري الدائم للأسكندرية والعين السخنة في الانهيار من اول السنتر لوك غيرته اكتر من 3 مرات في السنتين وحدات الرفع كلها بتعلق ازاز يقفل وازاز لاء الكاسيت باظ السي دي بتاعه وبقي شرايط بس الشماسات غيرتها كتير جدا كل ما واحدة تقع من العربية أشتري طقم كامل عشان متتبعش قطاعي وعاديك بقي علي شغل العفشة كنت بغير جلب مقصات واظبط عفشة وأرصص كل 3 او 4 شهور ولو طنشت لمدة أطول الاقي العربية متشخرمة من كل حتة وبتحدف وماشية بتهيس غيرت المساعدين الخلفية وغيرت المارش بتاع العربية والبطارية والتكييف باظ الكومبروسر بتاعه كنت بشحنه كل شهر تقريبا في الصيف ب150 جنيه لحد مكبرت دماغي منه لأن الكومبروسر غالي عليا ب2000 جنيه لما سألت عليه عارفين بقا ايه لازمة كل الكلام ده هو ان العربية اتشخرمت جامد في سنتين وكانت واطية مهما تركب عليات لو ركب فيها 3 اصحابي وانا رابعهم مفيش مطب من غير ما الشكمان والعربية تتشخرم فيه من تحت وتعالي بقي وانا مسافر اسكندرية او رايح شغلي في 6 أكتوبر مكان عملي لو جبت 120 احس ان العربية بتحدف وهتطير من علي المحور لو جت تحتيه ظلطة أو زقها شوية هوا المهم خت قرار أعتقد انه من أصعب القرارات في حياتي وهوووووو بعت العربية الغالية عالية جدا رغم معاناني معاها الشديدة وانا دلوع اوي موش بحب الميكانيكية والقعاد عندهم بالساعات وشغلي مخليني بتخنق اوي من الروتين أو من شغل التصليح كل يوم وكل أسبوع تقريبا اشتريت بقي m11 من حوالي 3شهور تقريبا وكان قرار صعب جدااااااااااااا اتخذته اول مشترتها كنت مرعوب من الي بسمعه عن الصيني رغم شكر الناس فيها ومتابعتي لأخبارها علي المنتديات المهم اول مجبتها حصلي كام موقف خوفوني جدا منهم تنك البنزين مفتحش ومكنش معايا بنزين وروحت التوكيل وانا مدايق جدا جدا وكاره نفسي وكأن كلام الناس عن الصيني بدأ يتحقق معايا المهم الشهادة لله انا والله العظيم فخوووووور جدا جدا جدا بعربيتي أسبرانزا m11 قوة ورفاهية وثبات وفرامل ودفئ وتكييف والله كأني في أفخم عربية وبسعر موش غالي نصيحة لوجه الله أمتلك عربية جميلة m11 شافها اصحابي معايا وركبوها شافها ميكانيكية محترفين شافها ناس كتير جدا مكنوش يعرفو عنها غير اسمها او شفوها صور كلهم ركبوها معايا موش بسمع غير كلام شكر في العربية من اول شكلها لحد متانتها وقوتها وثباتها الرهيب وعلوها عن مطبات مصر الصعبة وموش مزعلني ومخوفني غير الحسد وعنين الناس والله بلاقي ناس راكبة عربيات فخمة جدا وبيبصو عليا وبيجو جمبي يتفرجو ويقفوني في الشارع ويسئلو عن سعرها الكل معجب بيها لدرجة مخوفاني اركبها من الحسد فيها انا نفسي بحسدها ركبت فيها جي ام قوي جدا وأربع سماعات كينوود وبازوكا JPL بقت تحفة لونها اسود شياكة فظيعة جدا ورواشة جامدة جداااااا مجنناني ومجننة الناس مع والله ثبات وقوة ورفاهية متناهية ورغم خوفي منها الي لحد دلوقتي شبه خوف قليل ألا أني سألت نفسي ايه الفرق في سعرها عن الانوس لاقيت مفيش فرق طب ايه الفرق الي يخوف مفيش مع ان الفرق شاسع شاسع شكلا وثبات ورفاهية وكل شيئ بجد فرق شاسع كأني في كيا كارينز او سوراتو او كروز عربية BMW صيني ب75000 جنيه مشاكلي كلها مع التوكيل والصيانة وشركة المصرية الحرامية لكن مع العربية والله العظيم بحمد ربنا وبشكر فضله ان ربنا وفقني في أختياري وكنت هجيب كمان التيجو لكن بحمد ربنا مكنتش موجودة وجبت الM11 لاني حاسس انها شكلا أنيقة جدا مجننة اصحابي ومجننة الموزز الي بيشوفوها ومخليه الناس بتهابها وتحترمها كانها BMW أتكلو علي الله وأشتروها بعيدا عن المصرية للسيارات ولو تحبو كمان أفضل توكيل عملي فيها مشكلة تنك البنزين لما مفتحش وصلحوه ب5 جنيه بس اديتهم للعامل الي مسح العربية توكيل أبو غالي الي في طومان باي مصر الجديدة وهتدعولي عربية تحفة وتوكيل تحفة وأحساس هتعرفوه لما بجد تشتروها هتحس بتميز واناقة وقوة ورفاهية وثبات وكل شيئ محتاجه وخوووووووف من عنين الناس الي هتحسدك بطريقة متوحشة بجد والله علي ما أقوله شهيد أخوكم محمد مخرج اعداد وتنفيذ في روتانا سينما وليس ميكانيكي او بشتغل في أسبرانزا والله دي شهادة لله وأسف طولت اوي عليكم لأني بطبعي رغاي سامحوني
نصائح
1 - أنا شحنت العجل نيتروجين مخلي الكاوتش زي المللبن مع المطبات ولا بيزيد ولا بيقل ويريح زي الهوا
2 - بدي الغيار حقه عشان السرعة وقوة السحب تزيد وانا اول مشتريت العربية مكونتش فاهم الموضوع ده
3 - اتعامل مع المطبات بحنية ولكن اطلع بكل قوة علي المطب متخفش العربية عالية
4 - أعمل غرز علي سرعات عالية من غير متغير الغيار الي انت عليه وأجري زي متحب الفرامل جامدة جدا وموش هتخلي العربية تنحرف او تتزحلق او حتي تزحف وتعمل صوت كأنك في حرب
5 - شغل فيها قرأن دائما لأنك هتاخد عين ربنا يستر عليك ههههههههههههههههههههههههه هههههههههههههههه
شكراااااااااااااااااااااا ااااااااا

[MaXx]

مبروك عليك ,,, و ربنا يباركلك فيها و يحفظك و يحفظهالك ,,,

حلو انها عربية كويسة و عقبال ما تنتشر ,,, لما السوق يوسع ده كويس لصالح المستهلك اللي هيبقي قدامه تنافس في السعر ,,, و كمان اختيارات متعددة

[ash257]

أستاذ محمد أولا أهلا بيك
ثانيا مبروك على العربية وربنا يا رب يباركلك فيها ويكفيك شرها ويبعد عنك العين
ثالثا أنا ليا عليك عتاب كبير قوي أنا مشترك في كذا منتدى وحضرتك أول مرة دخل هنا وفي منتدى آخر شتمت العربية جامد جدا وكرهت الناس في العربية وزعلت لما الناس حاولت توضحلك بعض الأمور المهم بقى إن حضرتك تقول الحلو زي ما عملت هنا في باقي المنتديات زي ما قلت الوحش لأن الناس هتاخد قرارات على رأيك باعتبارك مجرب للعربية
رابعا كويس جدا إنك سمعت نصيحة بعض الناس (ومنهم أنا) لما قلتلك المرة اللي فاتت حاول تحب عربيتك أكتر من كدة وتشوف المميزات اللي فيها وتتغاضى عن العيوب البسيطة اللي ممكن تقابلك واللي ممكن تكون موجودة في أي عربية بل وأصعب من كدة

[rotana_cinemaa]

حبيبي ash257 انا بجد متشكر جدا ليك وأنا للعلم بس لما شتمت في العربية كان من سوء معاملة المصرية للسيارات ومن سوء التعامل مع أكتر من توكيل للأسبرانزا عبر التليفون مع خوفي الشديد من العربية الصيني كل ده كان له أثر في أثارة أعصابي وجعلي أقل عقل وحكمة من الأن وحكمت علي العربية من أول أسبوع وزعلي من الناس الي هنا له أسبابه
1 - موش كل المشتركين زي حلاتي كدة عندهم خبرة كبيرة بالسيارات وكمان ممكن عيب بسيط جدا بالنسبة للخبير بالسيارات يكون بمثابة خوف كبير جدا عند حد زي حلاتي موش خبير
2 - موش كل الناس زي بعضها في حد غاوي صيانة وفهم الصيانة وفي زي حلاتي عايز عربية متعطلش ولا يكون فيها عيب واحد ههههههه
3 - كل الي ردو عليا ردو كانهم خبراء في السيارات وكانت ردودهم يا اما سخرية من جهلي بعالم السيارات يا أما هجوم عليا عشان أشتكيت وجعي وألمي وخوفي
4 - محدش تعاطف معايا ولا حس بمشكلتي غير واحد او اتنين والكل هاجمني كأني أهنتهم وانا معرفهمش
5 - تم طردي من المنتدي لمجرد عاتبتهم والطرد كان بسبب أني قولت ألفاظ وأنا والله العظيم ما قولت أي لفظ يسئ لشخص وربنا الي يعلم لكن عاتبتهم بطريقة مهذبه وفهمتهم أني موش خبير لدرجة جعلتني أغضب من المنتدي وحسيت أني في توكيل أسبرانزا ولازم اشكر في العربية موش أقول فيها عيوب
6 - أنا موش متواجد كتير ولا هكون متواجد هنا كتير نظرا لظروف عملي لكن بجد حاسس دلوقتي اني مرتاح وقت الغضب غضبت ووقت الراحة قولت الحمد لله وحكيت تجربتي ولو أخطأت في حاجة أنا أسف لكل من أخطأت أليه حتي أسبرانزا كمااااااااان ويارب متطردش تاني لأني أطردت مدة كبيرة أوي أسبوعين عشان حاجة معملتهاش

[dmx2010]

ربنا يبارك ليك فيها ويحيمك من شرها ومن شر العين والحسد وانا على فكرة قلتلك على المشكلة بتاعة تنك البنزين تروح للتوكيل وها يعملوهالك فى ساعتها لانها حصلت نفس المشكلة معى وانا عندى A113 والحمد لله العربية داخلة على سنتين والحمد لله ما بشتكيش من حاجة بل العكس كل يوم بيزيد حبى ليها لانى كل شوية بكتشف حاجة فيها والعربية بتدى باكتر من الفلوس الى ادفعت فيها اى عربية بنفس الامكانيات تلاقيها وصلت 65000 او 70000 والحمد لله ان ربنا خلانى اشترى و اى عربية فى امكانيات M11 هتلاقيها عدت
100000