قد تكون سيارتك مــلــحومــــة !!!

[Sherivanov]

أنصح كل واحد حيشتري عربية من واحد ما يعرفهوش أو ما يعرفش تاريخ العربية .. لما تشتري العربية إعمل 3 حاجات :

1- إكشف عليها بنفسك و بخبرتك الضعيفة و إتأكد إنها سليمة و تمام و تعجبك.
2- ميكانيكي و سمكري يكشفوا عليها.
3- إشتري العربية في المرور بعد فحص المهندس لها و قولّه يكشف على رقم الشاسيه و الشاسيه نفسه بالصاروخ يشيل البويه من على رقم الشاسيه و من تحت الأرضية يشيل الأندركوت و تتأكّد إنها مش ملحومة .. و بعد كدا إبقى رشّهم تاني أو سيبهم مش حيجرى حاجة

[Islam Samir]

انا الحمد لله كنت واحد من الضحايا دول
اشتريت اوكتافيا A4 و المفروض انها كانت اصلا جايه استيراد (معاقين) و فكت حظر خلاص
فلما عرفت انها المانى و بتاعة بلدها .. و طبعا كان الفرش و الفيبر من جوه اقسم بالله احسن من الزيرو .. قلت اتوكل على الله
و اللى كان مقلقنى انى هشتريها من تاجر
المعم قولت ارفعها و اكشف عليها وفعلا كشفت عليها فى بنزينة شيل اللى عند نادى السكة و قالولى تمام و كمل البيعة و انت الكسبان
بس برده عشان من تاجر انا كنت مش متطمن .. خليت الميكانيكى شافها قاللى تمام
دفعت للراجل عربون (عقد ابتدائى) .. وخدت العربية و جريت على السمكى بتاعى .. كشف عليها و قاللى تماااام .. مفيش فيها غير حتة بارومة صغيرة اوى عند الشنطة
و بعد ما اشتريت العربية .. و بالصدفة و انا فى البنزينة و العربية مفضية بنزين خالص .. نزلت ازق العربية راحت العربية جارية منى و لبست فى تريللا من ورا عند الشنطة
اللى صدمنى ساعتها ان عربيتى المفروض لونها نبيتى .. لقيت تحت البوية لون احمر
رحت لميكانيكى حوادث فى الحرفيين .. شال الفرش كله و قعد اكتر من نص ساعة بيحاول يفهم هيه مغيره لون ليه .. لحد ما اكتشف انها مغيرة ربع .. و قاللى دى معموله فى بورسعيد لان الشغل ده نظييف و زيه زى الفريكا .. و قاللى يا اما ماتبعش .. يا اما لو هتبيع ما تقولش على اللى فيها
طبعا انا ولا عملت كده و لا عملت كده .. انا كلمت التاجر اللى كنت شاريها منه و هددته و فضلت وراه لحد ما جه خدها انتى .. صحيح نزل من تمنها 4 الاف جنيه غير انى كنت صرفت عليها بتاع 6 ... بس محدش بيتعلم ببلاش .. والحمد لله انها على قد كده

[احمد الصعيدي]

موضوع ممتاز تسلم ايديك : 01F6EB~150::C HICKA~11: : 018A1D~146:

[عصام جلاب]

ربنايسترها مع الجميع

[abasabnfernas]

لأسف أنا إشتريت عربية فولكس باسات من فترة و كشفت عليها كويس عند ميكانيكي و سمكري و في المرور و شوفت ملفّها و كل حاجة .. و عند الفحص و التجديد في المرور إكتشفوا إنها ملحومة و نفس التفاصيل بتاعة الموضوع دا بالظبط .. و إتنصب عليا فيها .. و كانت واحدة ست اللي باعتهالي و طبعاً فص ملح و داب .. تليفونها إتلغى من الخدمة و عنوانها غلط اللي في البطاقة .. و طبعاً اللجنة الفنية العليا التابعة لإدارة المرور رفضت ترخيص السيارة لعدم وجود الأجزاء القديمة و راحت عليا الفلوس .. و حسبي الله و نعم الوكيل

أزاي أكتشف مهندس الفحص أن العربية ملحومة و لم يكتشفها السمكرى