تقرير مفصل كامل عن فيات لينيا تربو

[iskandranee]

thank you for your prompt response
and thank you for your clear and organized presentation of the car

[_amr.mostafa_]

شكرا ...تسلم على هذا الموضوع

[ayman2]

ان شاء الله سوف ابدا اليوم التقرير وفكرت كتير اعمله ازاى ووجدت ان احسن طريقه انى اكتبه فى صوره يوميات عن السياره منذ يوم الشراء ومعذره على التأخير نظرا لظروف العمل والف شكر لكل من شارك وشجعنى على استكمال التقرير وكمان فى شويه صور من الطبيعه ان شاء الله تعجبكم

[ayman2]

اليوم الأول
وده كان قبل وقفه عيد الأضحى مباشره الساعه 10 صباحا ذهبت للمعرض لاستلام السياره والذهاب مع المندوب للترخيص وكل اللى فاكره انه سوف يسوق السياره حتى المرور وهكذا لانى بصراحه كنت خايف اسوقها مع انى بسوق من سنه 83 واذ به يقول اتفضل سيارتك وبينا على المرور فرفضت واعتقد انى لاأعرف السواقه وبصراحه اتكسفت وخصوصا ان عائلتى الصغيره كانت معى ليعيشوا لحظه الآستلام واسقط فى يدى وتوكلت على الله ودخلت السياره لاسوقها اول مره مع انى دخلتها كتير فى المعارض قبل كده لكن المره دى بجد وتركونى مع معشوقتى لوحدنا حتى استجمع ما ارى
اولا كرسى القياده مريح جدا ومهما جلست لاتشعر بالتعب حيث يتم التحكم فى مستوى الارتفاع والانخفاض وكذلك للامام والخلف وكذلك مسند الظهر لكن فيات لم تكتفى بذلك بل يوجد مفتاحين اسفل مسند اليد خلف عصا الفتيس لملأ ظهر الكرسى ليحيط بعمودك الفقرى ويحتويه وكانهم اخذوا مقاس ظهرك وفصلوا الكرسى مخصوص له والله ممكن تنام وانت بتسوق من الراحه والهدوء داخل السياره وقلت لنفسى كل ده فى الكرسى فقط والباقى فيه ايه
عجله القياده جلد طبيعى وكلها ازرار ومريحه لقبضه اليد
خلف عجله القياده ازرار كثيره واذرع على الجانين وكل ذراع داخله ذراع آخر ولوحه التحكم كلها أضواء فقلت لنفسى بصوت عالى ايه ده هو انا فى طياره ولا ايه فاذا بالمندوب يقولى لى استنى لما تسوقها وقد كان
وبدات اشغل الموتور مش عاوز يشتغل اصله كان شغال وانا مش سامع المهم انا يادوب عدلتها على الطريق وهبدا ادوس بنزين لقيت العربيه نطت ففكرت فى الفرامل لقيت العربيه وقفت ..... لا كده انا مش لاعب حد يسوقها فاذا بالصغيره فى الخلف تقول لى ايه ده يابابا انت مش عارف ولا ايه فطبعا كدبت وقلت لا ده انا بجرب بس طبعا المندوب فاهم وعاوز يضحك المهم قلت ابدأ من جديد وآخد بالى وانطلقنا ومره واحده لقيت العربيه سوجرت بصوت جميل (عند زياده السرعه عن 20 كم ) وكانها تستعد للانطلاق وصفاره الحزام اشتغلت وراسها والف سيف لازم نربط الحزام (نربط مش أربط) والا دماغك تصدع ... وانطلقنا
ايه ده سحب عالى جدا وانا ماكنتش عارف انا على اى نقله لان العربيه بتجرى وانا مش سامع اى حاجه لان العزل ممتاز وطبعا لما شفت RPM وعداد السرعه لقيت نفسى 70 وانا على التانى وكمان العفشه ناعمه جدا ومره واحده لقيت الناس وانا فى الاشاره بتسالنى عن السياره وفين وبكام وطبعا انا مزنوق متلخبط عاوز افتح الزجاج اللى جانبى يفتح اليمين وهكذا واخيرا وصلنا للمرور
وهى يادوب دخلت ولقيت الناس كلها بتتفرج على وانا محتاس مش عارف اجمع العدادات واللمبات فى التابلوه ولا اشوف الناس وارد عليهم ولا ادخل بالسياره فى الزنقه يانهار ابيض ده انا فى الشارع الواسع معرفتش طب هنا ما العمل المهم الناس شعرت بى وطبعا قالوا وسعوا له ده لسه جديد وطبعا ميعرفوش انى من سنه 83 بسوق المهم وسعوا وجت سليمه ازاى معرفش وبصراحه مندوب التوكيل خلص كل حاجه فى نصف ساعه ده اتضح انه سالك جدا
وطبعا رجعنا المعرض علشان انا طلبت انهم يشرحوا لى اى حاجه تنفع لكن هما بيشرحوا وانا بفكر ازاى هارجع بيها
صدقونى ده بامانه اللى حصل فى اول يوم ويتلخص الانطباع فى الآتى
1- تجهزات غزيره جدا غير مسبوقه وحتى الان كل يوم اكتشف جديد
2-عزل ممتاز لدرجه النوم
3-عفشه ناعمه غير متعبه خصوصا للركاب فى الخلف
4-موتور جبار زى الوحش
5-فرامل قويه جدا جدا جدا بدون زحف ولا زحلقه
6-فتيس ناعم جدا ونفلات صغيره Shift Drive زى عربيات السباق
7-دبرياج هيدروليك ناعم جدا عالى شويه لكن لما تتعود عليه سوف تستمتع به
8-تكيف Touch قوى فعلا بدون صوت مع فتحه خلفيه رائعه بالمناسبه هو Denso Japan
9-المسافه الخلفيه واسعه جدا ممكن تمدد رجلك حتى لو الكراسى الأماميه راجعه
10-مسافه اماميه واسعه
11- المفتاح خامته كويسه وبيفتح الشنطه من الخارج بزرار منفصل ان شاء الله فى صوره
12-الجنط 16 شكله تحفه ويديك احساس ان انت فى سياره سباق برضه فى صوره
13-الشكل العام للسياره تبدو وكانها وحش هادئ رقيق لا تحاول استفزازه والجمال والسحر الايطالى الخاص باين عليها
14-عاليه من الخلف لزوم الثبات الرهيب والايرودينامكس عالى جدا ولا تشعر بمقاومه او صوت الهواء
لسه فى انطباعات كتير لكن ده اللى انا فاكره واحنا مع بعض ان شاء الله واسف على الاطاله لكن انا حبيت احكى بعفويه شديده علشان انقل لكم احساسى وكانكم كنتم معى

[sikostar]

ايه يا راجل الكلام الجامد ده
ما شاء الله - تبارك الله
انت اشتريت طيارة بقي
ربنا يكتبلك خيرها ويكفيك شرها ويحفظك واياها

اللهم امين