A620 مظلومه ومفتري عليها ولا اااااااا

[iprahim_refaat]

السلام عليكم الساده اعضاء المنتدي
انا لسه شاري عربيه A620 او اسبرانزا الكبيره كما يطلقون عليها بقالي حوالي 20 يوم
السياره موديل 2007 عامله يوم ما استلمتها 76000كم وكسور بسيطه
الحاله العامه للهيكل الخارجي والداخلي ممتازه بالمعني الحرفي
كل الكماليات تم تجربتها ووجد التالي
لمبه الاشاره بالباب الشمال محروقه
الصالون مش نظيف يعني بين غرز الجلد وساخه عجيبه
خلف الفرش الداخلي في الشنطه سنه لحام وصداء
الكشاف اليمين الامامي لمبه الواطي محروقه
علبه الشكمان الخلفيه فيها سنه صداء
لمبه الحزام في التابلوه مضاء باستمرار حتي والحزام مربوط
مش هطول عليكم كلها عيوب بسيطه
رحت بيها علي السمكري بتاعي عشان يشوف ايه اللحام الي ورا ده عشان كان قالقني انها تكون مخبوطه وتعمل فيها شغل جاب جهاز بتاع فحص البويه وعدي علي كل اجزاء الشنطه بلا استثناء وعلي اقل من مهله والنتيجه انه مش شغل ده عيب تقفيل من المصنع لان كل شمع الفبريقه في مكانه والصاج مترشش غير بويه المصنع الاصليه ومفيش اي اثر لمعجون من اي نوع ايا كان
وبعد كده علي عم محمد الميكانيكي الي بنتعامل معاه فلي العربيه فوق وتحت وبعد بصه بسيطه ليا توحي بأنه مش راضي عرض عليا ياخدها ويكسبني فيها فوق ما انا شاري 10000 جنيه بلا مبالغه انا طبعا مكنتش قلتله انا واخدها بكام وكأنه بيفطسها فرحت جدا وان كنت مبنتش له حاجه واتهمته كمان انه بيفطس فيها كمان
وبعديها بيومين خدتها علي المغسله الي بنتعامل معاها خليت الواد سيد بتاع المغسله غسلها جوه وبره بالصابون والسفنجه كويس جدا وهي فوق بتتغسل من تحت لقيت واحد جنبي عارض عليا ياخدها والله بأكتر ما اشتريتها بحوالي 8000 جنيه كل ده وهي لسه مكملتش اسبوع
العربيه يوم ما اخدتها كان البنزين يقارب EMPTY دخلت اول محطه بعد كوبري قليوب وفولتها 80 ايوه بنزين 80 والله العظيم بلا ادني مبالغه وكملت طريقي الي بلدنا لاني مش قاهري انا من المنوفيه - قويسنا تحديدا بعد القاهره بحوالي 50 كم طاير علي 140 كم-ساعه و المكيف علي 5 والله العربيه ممتازه
للعلم انا مغير من نوبيرا 2009 بعتها لظروف خاصه جدا وبعد العمليه ما ضبطت دورت حوالي شهرين وجبت الاسبرانزا والصراحه اكتر من ممتازه
والدي معاه مرسيدس 200 موديل 1987 كامله شرق اوسطي ( اوتوماتيك فتحه سقف وفرش جلد و كراسي كهربا وخلافه) جربها عجبته جدا وقالي ان سواقتها مريحه وناعمه جدا علي الرغم انه كان اكتر واحد معترض عليها قبل ما اجيبها وعربيته معاه من سنه 1988 جابها معاه من بره لحد دلوقتل مبيخليش اي حد يسخها حتي وركب امريكاني والماني كتير واخر حاجه معاه بره مصر كابريس 2006
خلاصه الموضوع سياره متميزه جدا استهلاكها للوقود ممتاز (10كم للتر) يبقي فين المشكله : waving:

[seaf_sawy]

المشكله فى العقل بناع الناس وفكر انه صينى وخلاص (العقل زينه فى الترسينه)

[iprahim_refaat]

والله انه حرام قبل ما نحكم نشوف او نجرب بس مين يقري ومين يسمع

[AbOnOrA]

مبروك عليك وربنا يحفظهالك يارب ويهبك خيرها ويكفيك شرها

مفيش شك ان العربية بالكماليات والحجم والموتور والسعر ده مغرية جداًً لكن المشكلة دائماً بتيجى من التوكيل اللى مش بيحافظ على العربية واسمها ويقدم خدمة مناسبة ويوفر قطع الغيار بالاسعار المعقولة

فى انتظار تقييمك لاداء العربية بشكل اوضح ان شاء الله وياترى هتعمل صياناتك فى التوكيل ولا بره وسألت على قطع الغيار ولا لاء ?

[حازم شاهين]

أولا و أخيرا مبروك
يديك خيرها و يحميك من شرها