رابطة ملاك القوية فيات 125 لتبادل المعلومات ؟

[thunder2006]

المشاركة الأصلية كتبت بواسطة kakotoo عندى طحينة بتطلع فى غطاء التكيهات وزيت فى الردياتير وزيت الكارتير نظيف ولا يوجد نفخ بالموتور والجوان سليم ومفيش ميكانيكى عارف السبب ولى سنة ونصف على الحال دة عايز حل

ربنا يكون فى عونك ... انا لسه جديد فى العربيات اصلا .. ومن اسكندرية برضه
لما ملقتش حد رد عليك .. قولت ارد انا .. يمكن ربنا يستجيب وتلاقى حد يفيدك
بس انا مش فاهم ايه اللى بيطلع طحينة من العربيه ؟؟ هى فيها ثلاجه ؟؟ ولا ده تعبير لولبى مش مفهوم بالنسبالى ؟؟

[thunder2006]

يا جماعه انا خلاص دفعت عربون ال 125 الستيشن وهى الان فى العمره الشاملة .. بس محتار اعمل لونها ايه ؟؟
انا كنت عايز شكلها يكون شيك مش شكل عادى وخلاص !!! فهل فى حد يقترح على الونها ايه ؟؟
كله بيقترح الابيض او الاحمر او الكريمى .. مفيش خلطه ؟؟ ياعنى لونين مثلا او حتى لون شكله جميل فى الاستيشن اجمل من الالوان دى ؟؟؟
واللى هاينصح يخلى باله .. انى كل ما هاشوفها هادعيله والعيله كلها هاتدعيله لانها هاتفضل فى خلقتنا كل يوم .. الى ما شاء الله

طلب كمان الله يكرمكم .. العدادات بتاعتها شبه الزيستافا .. بتفكرنى بانى بقيس الضغط مفيش حل اركبلها تابلوه مختلف او على الاقل عدادات مدورة او مربعه ؟؟ لانى مش مقتنع خالص بمقياس ريختر الموجود فيها ده خالص

[hazem_khidr]

المشاركة الأصلية كتبت بواسطة kakotoo عندى طحينة بتطلع فى غطاء التكيهات وزيت فى الردياتير وزيت الكارتير نظيف ولا يوجد نفخ بالموتور والجوان سليم ومفيش ميكانيكى عارف السبب ولى سنة ونصف على الحال دة عايز حل

جوان وش السليندر عندك بايظ و يجب تغييره
و لازم الميكانيكي لم يفك يبص علي وش السلندر و لو مقفع يروح المخرطه يتزود و يتقشط علشان تحل المشكله دي من جذورها
مالهاش حل تاني غير كده و اي ميكانيكي محترم هيعرف الحل مش محتاجه سنه و نص لف و دوران

المشاركة الأصلية كتبت بواسطة thunder2006 يا جماعه انا خلاص دفعت عربون ال 125 الستيشن وهى الان فى العمره الشاملة .. بس محتار اعمل لونها ايه ؟؟ انا كنت عايز شكلها يكون شيك مش شكل عادى وخلاص !!! فهل فى حد يقترح على الونها ايه ؟؟ كله بيقترح الابيض او الاحمر او الكريمى .. مفيش خلطه ؟؟ ياعنى لونين مثلا او حتى لون شكله جميل فى الاستيشن اجمل من الالوان دى ؟؟؟ واللى هاينصح يخلى باله .. انى كل ما هاشوفها هادعيله والعيله كلها هاتدعيله لانها هاتفضل فى خلقتنا كل يوم .. الى ما شاء الله طلب كمان الله يكرمكم .. العدادات بتاعتها شبه الزيستافا .. بتفكرنى بانى بقيس الضغط مفيش حل اركبلها تابلوه مختلف او على الاقل عدادات مدورة او مربعه ؟؟ لانى مش مقتنع خالص بمقياس ريختر الموجود فيها ده خالص

فيه عدادات لل 125 شكلها اشيك و موجوده في فيديو كان كار ادمير منزله
انا كنت شاريه سنه 2003 ب 200 جنيه من وكاله البلح من عند واحد اسمه وليد
لكن عاوز كهربائي محترم يظبط الضفيره عليه علشان تشغل كل الامبيرات و اللمبات

[karimomar1976]

السلام عليكم ورحمة الله وبركاته
انا بفضل الله وحمده قمت بشراء موتور 125 للعربية عندى بعد حيره حوالى شهر ما بين العمرة وشراء موتور استيراد
انتهت هذه الحيره بأنى فكيت الموتور القديم وفتحناه وللأسف لقيت فية شغل كتير جوه - بمعنى اصح ملقتش حاجه سليمة
مع ان الميكانيكى كان دايما بينصحنى بعمل عمرة وعدم شراء استيراد - ولكن بعد فتح الموتور قالى العمرة هتكون تكلفتها حوالى 2500 - 3000 تقريبا - لان فى شغل خراطة وبساتم وشمايز حتى عمود الكرنك قالى معرج وعايز يتخرط والبارومى واكله الالومنيوم فى وش السلندر وعايز يتملى ويخرط وحوارات كتير -
المهم استقرينا على الذهاب الى عزبة شلبى - وفعلا ذهبنا وبالسؤال عن الاسعار لقينا موتو البلونيز 1500 كاتينه كاوتش انجيكشن من 2200 - 2500 - بس الميكانيكى قالى ابعد عن الكاتينه الكاوتش وخليك فى الكاتينة الجنزير ( حديد ) وسعر الموتور اغلى بحوالى 3000- المهم بعد البحث لقينا نص لعربية 125 بالموتور - يعنى الشاسية بالرفارف بالتابلوه بالحوض وجواه الموتور ( نص امامى ) بكام يعم الحج بــ 3000 وبعد الفصال والمنهاده نزل 100 بالعافية - وقمنا بتجربة الموتور على الارض واتوكلنا على واشتريناه - وقعدت انا والميكانيكى نركب فية
وانا انشاء الله بكره رايح للميكانيكى تانى اشوف ايه الاخبار لأنى سيبت العربية عنده عشان يقفل ويجرب وبكرةان شاء الله هروح اشوف ايه الاخبار وربنا يستر - هو الى الان بيقول الموتور كويس بس عندك الكاتينة مبوشه شويه
دى تجربتى المتواضعة حبيت اشارك معاكم بيها لأستفيد من خبراتكم وتحت امركم فى اى استفسار
اخوكم كريم

[hazem_khidr]

الف مبروك علي الموتور بس كده تمنه غالي الصراحه كنت جبت بتاع البولونيز كان هيبقي انعم و اقوي
يا تري الموتور اللي جبته موديل كام؟؟؟