العودة   مصر موتورز مجتمع السيارات > السيارات الأوروبية > فيات FIAT > 128 FIAT


إضافة رد
 
أدوات الموضوع
  #1  
قديم 14-04-2014, 07:02 PM
الصورة الرمزية احمد الجارحـي
احمد الجارحـي احمد الجارحـي غير متواجد حالياً
من انا؟: بنى آدم هكون إيه يعني!؟
التخصص العملى: مدير مبيعات ف شركة سياحة
هواياتي: كمبيوتر و مؤخراً سيارات
 
تاريخ التسجيل: Dec 2013
الموقع: القاهرة
المشاركات: 79
احمد الجارحـي has a spectacular aura aboutاحمد الجارحـي has a spectacular aura aboutاحمد الجارحـي has a spectacular aura about
تقرير كل ما يخص 128 عن تجربة ع مدار 5 شهور, أنقلها إليكم ع طبق من ذهب.

بسم الله الرحمن الرحيم,
النهاردة و بتاريخ 14 - 4 - 2014 تم بيع عربيتي نصر 128 موديل 1977,

و بالمُناسبة دى حبيت أقولكم كل تفاصيل العربية اللي عرفتها علي مدار الـ5 شهور اللي فاتت و هي المُدة اللي قعدت معايا فيها العربية.

بصراحة مش عارف ابدأ منين ولا أقول إيه لكن هحاول بقدر الامكان اقول كل عيوب العربية دي و مميزاتها,

صحيح العربية رخيصة و في متناول الجميع و قطع غيارها زي ما بيقولوا عند البقال لكن في المقابل بردوا ان كل كام يوم بتجيب قطع غيار و قطع الغيار اللى موجودة كلها بلا استثناء مضروبة.

يعني لو هتركب شاهين مثلاً و تجيب قطع غيار معين بـ200 جنية هتقعد معاك سنة
لكن لو راكب 128 و هتجيب نفس قطع الغيار بـ50 جنية هتقعد معاك أسبوع و عن تجربة محدش يزايد ع الكلام لأني شوفت الويل و المرار ف العربية دى

دي أول نقطة بالنسبة لسعر قطع الغيار.

النقطة التانية الصنف دة من العربيات اللى هي 128 لازم تاخد بالك منها اووووووووووووووووووووووى و لازم تكون حنين عليها و لازم تاخد بالك من كل صوت بتطلعه العربية عشان ده بيكون تنبيه لمشكلة كبيرة جاية.

بالنسبة للأصوات انا هقول كل الاصوات اللي مرت عليا و أسبابها و علاجها,

لو العربية بتطلع صوت طقطقة ف الملفات يبقي ده كوبلن و الصوت بيحذرك انك تغير الكوبلن عشان العجلة متفرتش منك ف ملف ولا تفوجئ ان العجلة ف مكان و انت ف مكان في الحالة دي تروح لعفشجي يغيرلك جوز كبالن صيني يقعد معاك سنة جوز الكبالن ب 200 جنيه تقريبا و مصنعية 100 جنية ,

لو العربية وانت ماشى من مجرد ما تشيل رجلك من علي دواسة البنزين بطلت منك و دورت و بطلت و دورت و بطلت يبقى ده عيب مسمار الكاربرتير عايز يتنظف عند أي ميكانيكي او بتاع كاربترتيرات ينظفهالك ب 20 جنيه و ده بيكون بسبب تجمع اوساخ و شوائب البنزين علي المسمار المسؤل عن مرور البنزين ف الكاربرتير,

لو العربية وانت ماشي لقيتها بتنتش منك و السرعة حسيت انها مكتومة مش زي كل يوم معاك يبقي ده عيب بوجيهات تطلع زي الشاطر ع قطع الغيار تشترى طقم بوجيهات فلاج ب 30 جنية و تغير بوجيهات و انت عند الميكانيكي بتغير البوجيهات خليه يبصلك ع البوجيهات القديمة لو مهببة و فيها هباب حرق يبقي بعد ما تغير بوجيهات تروح لبتاع الكاربرتير ينظفلك الكاربرتير عشان الحرق فيه زيادة و بيهبب البوجيهات و لو البوجيهات كانت فيها زيت لقدر الله يبقي الموتور بتاعك بقي خفيف و اعمل حسابك انك داخل علي عمرة موتور و غالباً هيكون طقم شنبر مش عمرة

لو أنت ماشي بالعربية و حسيت بالانوار بقت ضعيفه اوي و البطارية نامت يبقي حاجة من الاتنين ملهمش تالت ( البطارية عليه العوض أو الدينمو فيه مشكلة و مش بيشحن البطارية ) و في الحالة دي تروح للكهربائي و يعرفلك العيب منين و يصلحه

لو العربية لقيت أصوات خبط من تحت وانت بتزود بنزين و الاصوات دي ف النص اللي قدام من العربية يبقي غالباً الشكمان الافيز بتاعه وقع و عايز افيز لانه مع حركة العربية و في طلعتها العربية طبيعي انها بترج جامد و بيحرك الشكمان بيخليها تخبط في العفشة من تحت و الافيز بتاع بتركيبة بسلاطاته و باباغنوجه ب 40 جنية. اما لو مطلعش شكمان فهيكون العفشة عايزة تتربط و لازم تروح عند عفشجي محترم يربطلك كل مسمار في العفشة

لو انت واقف بالعربية و لقيت صوت الموتور عالي عن اللزوم يبقي تروح لبتاع الكاربرتير يظبطلك صوت الموتور عن طريق مسمار الهواء,

لو انت ماشي بالعربية و حسيت ان العربية بتحدف يمين و مش مستقرة في الارض يبقي تروح لظبط الزوايا عشان يظبطلك زوايا العربية و بالمرة تطمن ع حالة الكاوتشات بتاعتك و الكاوتش ثم الكاوتش ثم الكاوتش اوعي تهمل ف موضوع الكاوتش و تقول ياعم دي 128 ياعم كبر يا عم نفض اووووعي هتندم و كل يومين هتفسي و هتتخرم منك و هتبهدلك أخر بهدلة و لو بتدور ع نوع كاوتش كويس عليك و علي ساندرا تايلاندي الفردة ب300 جنية و محترم جداً

لو حسيت ان الفرامل الكبس بتاعه بيجي من الاخر و ضعيف اتأكد من زيت الفرامل عشان ممكن يكون نقص او فضي خالص و هات علبة باكم ب 10 جنية و املاه لكن لو لقيت زيت الفرامل موجود يبقي التيل عايز يتغير و عموما طقم تيل امامي و خلفي بتركيبه و كل شئ مش بيعدي 120 جنية و عن تجربة

اما بقي لو سمعت صوت من الابواب و العربية ماشي الابواب عاملة مزيكا يبقي غالباً انت اتضحك عليك ف العربية دي او بمعني أصح بدأ يكون في شرخ ف القايم بتاع العربية و عايز يتلحم و عايز تركب خابور لباب العربية عشان يتظبط لانها بقي واسع في القفل بتاعه و فرق وسع الباب في القفلة بيخليها تتحرك مع العربية و تعمل صوت مزعج

اما لو أنت ماشي بالعربية و حسيت ان السحب بتاعها ضعيف جداً و الفتيس بيعض كتير و اتأكدت ان البوجيهات و الكبلاتين و الكوندنسر أو بمعني أصح ( طقم الكهرباء ) اتأكدت انهم كويسين يبقي الحالة دي العيب في طقم ديسك و أسطوانة و ده سعرهم بتركيبهم و بكل حاجتهم ب350 جنية

امممممممممممممممممممممم إيه تاني !؟؟؟؟

لو العربية وانت ماشي طلعت دخان ابيض من الشكمان و عمالة بتطلع الدخان ده في بنسبة 99% العربية عايز طقم شنبر يعني ربع عمرة و بنسبة 1% العربية عايزة عمرة كاملة و ده هيبان لما تحل الموتور و تخلي الميكانيكي يحددلك
بالنسبة لمصنعية طقم الشنبر كله علي بعضه بالشراء بمصنعية حوالي 700 جنية لكن لو عمرة كاملة من 1600 ل 2000 جنية

لو العربية طلعت دخان لونه أسود ف ده عيب في الكاربرتير عايز يتظبط

لو العربية فيها أصوات غريبة حاول تفضي العربية من اي شئ يخصك بتتحرك زي موبايلك مفاتيحك تليفونك اي حاجة بتتحرك ف العربية و امشي بالعربية و حدد الصوت منين و غالباً هتلاقيها من العفشة او من المساعدين ,

الحاجات اللي لازم تاخد بالك منها في العربية.

- كل يوم الصبح قبل ما تدور تطمن علي الزيت من حيث لونه و المقياس بتاعهُ.

- كل يوم الصبح قبل ما تدور لازم تتأكد من الريداتير و المياة و لازم تعرف ان الطبيعي بتاع العربية انك تزودلها مياة كل يومين او تلاتة لكن لو كل شوية بتزود مياة يبقي في حاجة في الريداتير و غالباً هتلاقية مخروم.

- لازم تاخد بالك من الزيت كويس اوووي و الزيت تستعمل أفضل زيت للعربية دي و هو زيت التعاون الاحمر ب55 جنية, و ده بيتغير كل 1000 كيلو و الافضل انك تغير علي 900 كيلو عشان احنا داخلين ع الصيف و الموتور يكون مرتاح.

- لو لقيت الموتور من قدام بيرشح زيت لازم تروح لميكانيكي عشان يتطمن ع الموتور لانك تقريبا داخل علي عمرة أو طقم شنبر.

- العربية متعرضهاش لمياة كتير يعني متغسلهاش كل يومين تلاتة لأن كتر غسيلها يعرضها للبارومة بشكل كبيررررر.

- لازم تتاكد من كل جزء ف العربية ان مفيهاش بارومة عشان لو فيها بارومة و انت أهملت فيها البارومة هتكبر و هينتشر ف العربية و هيكل العربية هيبقي ضعيف جداً و من أقل خبطة هتتأثر.

- لازم كل يومين او تلاتة اول ما تدور العربية و تتحرك تروح لبتاع كاوتش يتطمن ع الهواء و هي باردة أفضل من وهي سخنة عشان يظبط ضغط الهواء.

- اوعي تنسي الطوارئ ( الاستبن و الكوريك و الصليبة ).

- أعرف دايماً ان العربية لو أنت اهملت فيها مشكلة كانت هتتحل ب 100 جنية, بسبب أهمالك ده المشكلة هتكبر و هتتحل ب 500 جنية, و عن تجربة.

- مينفعش تدور العربية و تتحرك ع طول لازم تسيبها تسخن ع الاقل الحرارة تكون علي 75 أو 80

- خد بالك من مؤشر الحرارة لو جت علي 91 او 92 و المروحة مشتغلتش يبقي عندك مشكلة في ثرموستات الحرارة و دي بتتغير ب 25 جنية و مصنعية 20 جنية عند الكهربائي.

- لو لقيت مؤشر الزيت وانت ماشي بالعربية عمالة تنور ولما تزود بنزين بتنطفى ده غالباً بيكون سبيكة الزيت عايزة تتغير و دي ب 300 جنية بالمصنعية و خلي بالك لو مؤشر الزيت نور و منطفاش وانت بتزود بنزين اوعي تمشي بالعربية لازم تقطرها للميكانيكي عشان يعملك سبيكة الزيت و إلا هتندم و هتدخل في عمرة موتور.

- لو لقيت مؤشر البطارية بتنور ع خفيف اوي و بتنطفى اعرف ان بطاريتك مش بتشحن كويس و في مشكلة في الدينمو أو البطارية.

- لو سمعت صوت خبط ف العجلة وانت ماشي بالعربية ده غالباً بيكون بلية العجل و لازم ع السريع كده تغيرها و دي بمصنعيتها حوالي 100 جنية,

لو حسيت وانت ماشي بالعربية و بتاخد يمين او شمال و الدركسيون مش بيستجيب معاك بسرعة ارجع ظبط زواياك و اتطمن ع الكاوتش.

ده كل اللى انا مريت بيه بصراحة و اللي عايز يستفسر عن أي شئ يتفضل وانا بقدر الامكان هفيدك باللي اعرفه بأذن الله.

نصيحة اخوية من اخ ليكم مجرب
حاول متصرفش علي العربية كتير يعني متتفشخرش بالمصاريف ع العربية لانها في الاول و في الاخر 128 و مهما كنت صارف عليها إلا انك و انت بتبيع هتلاقي اللي هيشتري منك بيقولك مش ذنبى انك صرفت عليها خد حاجتك معاك.

صدقني و عن تجربة شخصية فعلاً دي ف الاول و الاخر 128 اه جميلة و لذيذة لكن هتاخد منك كتير و هتديك قليل.


و ربنا يرزقكم و يكرمكم ببيعها و تدخلوا في الاحسن و الاحدث بأذن الله.

و اخيراً اتمني لكن الدعاء بالمغفرة و الرحمة لامواتنا جميعاً.

و ده أخر موضوع ليا ف قسم 128 لكن هتواجد في القسم في حالة الرد علي استفساركم أو أي طلب ليكم و من فترة للتانية هدخل القسم هنا للمساعدة في أي شئ انا أقدر عليه.

اخوكم احمد الجارحى.
__________________

إللي حابب يعمل سياحة داخلية أو خارجية يشرفنى أني أخدمهُ

ده الاكاونت بتاعي ع الفيس بوك

إضـغـط هِـنـا

تقدروا تتواصلوا معايا عن طريق وآتس آب أو فايبر أو SMS
من خلال الرقم ده ( 00201111808480 )

سُبحان الله و بحمدهُ سُبحان الله العظيمّ



التعديل الأخير تم بواسطة احمد الجارحـي ; 14-04-2014 الساعة 07:14 PM سبب آخر: تعديل عنوان الموضوع.
رد مع اقتباس
  #2  
قديم 14-04-2014, 07:59 PM
الصورة الرمزية حسن شرف
حسن شرف حسن شرف غير متواجد حالياً
التخصص العملى: تجارة وتسعير السيارات
هواياتي: تجارة وتسعير السيارات
 
تاريخ التسجيل: Apr 2010
الموقع: امصر
المشاركات: 274
حسن شرف is a name known to allحسن شرف is a name known to allحسن شرف is a name known to allحسن شرف is a name known to allحسن شرف is a name known to allحسن شرف is a name known to all
افتراضي رد: كل ما يخص 128 عن تجربة ع مدار 5 شهور, أنقلها إليكم ع طبق من ذهب.

تقرير ممتاز ممتاز ممتاز كفيت ووفيت
مسبتش حد يقول أى تعقيب على الموضوع الجميل دا
بس مقولتش بعتها بكام ؟
ياترى هتشترى عربية تانى ولا لأ ؟
رد مع اقتباس
  #3  
قديم 14-04-2014, 11:11 PM
احمد عبد المقصود سيد احمد عبد المقصود سيد غير متواجد حالياً
 
تاريخ التسجيل: May 2013
المشاركات: 53
احمد عبد المقصود سيد will become famous soon enough
افتراضي رد: كل ما يخص 128 عن تجربة ع مدار 5 شهور, أنقلها إليكم ع طبق من ذهب.

واضح ان الخمسة شهور مع العربيه دى جعلت منك خبير و تأثيرها باين قوى . ألف مبروك انك خلصت منها و انشاء الله خيرها فى غيرها
رد مع اقتباس
  #4  
قديم 15-04-2014, 12:43 AM
الصورة الرمزية mr_astra
mr_astra mr_astra غير متواجد حالياً

 
تاريخ التسجيل: Oct 2010
المشاركات: 6,818
mr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond reputemr_astra has a reputation beyond repute
افتراضي رد: كل ما يخص 128 عن تجربة ع مدار 5 شهور, أنقلها إليكم ع طبق من ذهب.

ناوى تجيب اية ؟؟؟
__________________

يااااااااااااا رب

إرحمنا بقدرتك علينا

رد مع اقتباس
  #5  
قديم 15-04-2014, 12:49 AM
الصورة الرمزية nktis
nktis nktis غير متواجد حالياً

من انا؟: عبد من عباد الله
التخصص العملى: صيدلي
هواياتي: الصيد والتربيه
 
تاريخ التسجيل: Aug 2010
الموقع: هنا
المشاركات: 12,574
nktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond reputenktis has a reputation beyond repute
افتراضي رد: كل ما يخص 128 عن تجربة ع مدار 5 شهور, أنقلها إليكم ع طبق من ذهب.

:0101 04~171:
__________________

وأتت ملائكة النعيم كما روت*
روحي بطون أكفها خضراء*
صعدت بروحك والعبير يحفها*
والنور ترسم دربه الأنواء*

شرقت حشاشات النحيب وأينعت*

وشوى الأنين قلوبنا فتفطرت*خلف الجفون دموعنا الخرساء*
أكبادنا فبكاؤنا إيماء*
رد مع اقتباس
إضافة رد

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 12:48 PM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017