تقرير ي عن صيانة ال20000 كم

[peter magdy]

دا كلام مشجع
ان توكيل القطامية بيحاول يصلح من نفسة
مبروك الصيانة و فى انتظار باقى القصة - و خصواصا تركيب نور بدل العاكس علشان انا طلبتها قبل كدة منهم
و طبعا الصيانة من غير زيت

[mhamdy75]

[hossam165]

عدنا بعد الفاصل لنواصل رحلة الصيانة لعربيةاخوكم حسام لـ20000 كم
نزلت بعد كده دفعت الفلوس وهي كالتالي:-
27 جنيه فلتر هواء
38 جنيه فلتر بنزين
88جنيه اربع بوجيهات
120جنيه مصنعيات ومش عارف بالضبط تفصيل ليهم مع العلم انا شايف
ان ده كتير
27 ضريبة مبيعات
الاجمالــيــي 302 وللاسف نسيت ادي بتاع الخزينة الــ2 جنيه عشان مكنش فيه فكة تفتكرو هيسامحني بس بجد نسيت
مغيرتش زيت يا ايهاب انت عارف اني بستخدم فالفولين ولسه عليه 1000كم تقريبا

و كانت نتيجة الصيانة كالتالي :

1-صيانة 20000 كم (تم)
2-وجود تزييق وخبط من خلف لوحة العدادات (تم معالجته مع العلم انهم كانو عاوزيين يقنعوني انه عيب في تركيب الزجاج)
3-تعليق في المرشدير احيانا (حتي الان تمام)
4-العربية مخنوقة مع التكييف (لسه مجربتش)
5-فتحة التكييف الخاصة بالسائق غير ثابتة (تم اصلاحها)
6-زيت الفرامل ناقص ( لم يتم مراجعته)
7-الدواسات الخاصة بالبنزين والدبرياج خشنين (تمام)
8- تغيير فلتر الهواء والبنزين (تم) للاسف فلتر التكييف غير متوفر حاليا
9-تركيب كشاف الشبورة الخلفي بدلا من العاكس بعد مناقشة مع م/احمد والمهندس صبحي تراجعت عن الفكرة تماما
وجهت النظر ان ده معيار جودة عالمي او قياسي ان يكون الكشاف الشمال بس الي شغال والتاني عاكس بالاضافة ان فحالت ان البطارية خلصت شحن يبقي العاكس هيكس النور للقادم اثناء وقوفك او سيره خلفك

بعد مدفعت اثناء خروجي من الخزينة قابلت استاذ محمد رمضان وقالي شوفت العربية الجديدة قولتلو لا قالي تعالي وفرجني علي موديل جديد من f3 برده كان واقف منه بتاع 10 15 عربية علي جنب في مدخل المركز بس مختلف في المواصفات عن الي معانا بالاضافة انها صيني التجميع اي مستوردة جاهزةوان شاء الله هعملكم تقرير عن السيارة ديه بالصور

ووقفنا اتكلمنا شوية وبعدين جاله المهندس ياسر وصعدو الي الاعلي وانا طلبت منه اصورها في المعرض فقالي هما موجودين ادخل شوفها هناك
لما روحت للمعرض موجدتش حد هناك
فرجعت لاستاذ محمد اطلب منه برشور للسيارة ومواصفاتها كاملة فعرفني علي المهندس ياسر
وهوانسان خلوق جدا وذو علم ومعرفة عالية اتشرفت فعلا بمعرفته
واستفدت فعلا من المناقشة الي دارت بيني وبينه سواء عن سيارتنا اوالسيارات عموما بالاضافة للموديل الجديد وان شاء الله هذكرلكم ملخص النقاش في الاخر
ودار بيني وبينه حوار طويل جدا وكانت المفاجأة الجميلة فعلا اثناء جلوسي مع استاذ محمد والمهندس ياسر
حضر الانسان المحترم جدا والخدوم بشدةوخفيف الظل وحبيب قلبي حتي من قبل مقابلته لاني دار بيني وبينه حوارات كتير في التليفون
استاذ /عماد حبيب

وللأسف الشديد اتضح انه زعلان هو والاستاذ محمد رمضان من بعض الاعضاء لسوء الفاظهم وتهجمهم الغير مبرر في احيان كثيرة وللاسف اعطوني امثلة لبعض الناس الي قالت ان فيه مشاكل عندهم واتضح في الاخر عدم جدية عرضهم عن مشاكلهم والاكثر من ذلك ان فيه واحد قاعد يقول ويزيد ويعيد ولما طلبو منه الذهاب للمركز اتضح انه لا يملك السيارة من الاساس وانه لسه في طور البحث عن سيارة.
والي اللقاء في الجزء الثالث والاخير
ومش عاوز ضرب

[hossam165]

عدنا اليكم من جديد بعد فاصل طويل بدون قصد مني
ربنا يبارك في الاولاد خلو الكمبيوتر مش نافع والظاهر انه محتاج يترمي
او فيرس جامد دخل عليه بدون قصد منهم لاني للاسف مكنتش مسطب
انتي فيرس هتقلولي اذاي تعمل كده هقولكم هي ضربت في دماغي اسيبه كده

المهم نرجع للجزء الثالث والاخير من مشوار الصيانة بعد 20000 كم

وهعرض فيه خلاصة اليوم واهم النقاط التي عرفتها او تأكدت منها وانطباعي عن الزيارة والمركز عموما

--- المركز كمركز فيه تغيرات حقيقية من نظافة الي تشطيبات الي مكاتب محترمة حتي الحمامات نسفو حمامهم القديم وعملوه رخام وشغل من الخمس نجوم

---الاستقبال المهندس احمد وعلي حد علمي انه متعين جديد في المركز لان ديه اول مرة اشوفه فيها وهو الي ماسك الاستقبال من استلام وتسليم السيارات وبصراحة راجل محترم طريقة معاملته للناس كلها واحد وبيسمع للعميل وبيجرب العيب وهوبيستلم العربية واسلوبه ممتاز ولاول مرة حد يسمعني باهتمام ويتعهد بل يطلب مني الا اغادر غير اماهو ييجي يجرب بنفسه معايا العيوب اتحلت والا لا وشايف ان لازم باقي الناس تتعاون معاه بكل طاقتها عشان قسم استقبال السيارات في المركز يعلي ويرضي الجميع لان مثلا واحد زيي الاخ الي حكتلكم عنه ضيع مميزات المهندس/احمد بغباءه لان بمنتهي البساطة الراجل مش هيقطع نفسه كمية العربيات كبيرة واذا مكانش باقي الموجودين في الاستقبال علي نفس القدر يبقي مجهود الراجل مش هيبقي واضح
بالاضافة ان لاحظت انهم بيرمو عليه العميل المقاوح او الي فاهم وعاوز ياخدحقه ومصمم عليه وبيعارض رايهم بمعني اصح لانهم عاوزين واحد يروح يقلولو يمين يقول حاضر شمال يقول امين
مش عاوزين يريحو العميل لا للاسف هدفهم الاساسي راحة نفسهم اولا واخيرا والعميل هو مجرد واحد اشتري عربية مش كل شوية هيروشنا بقي عندي كذا وبلاحظ كذا

( جاي يقضي وقت لاااا طططيف في المركز هتيجو انتو بقي تقرفوه وتتعبوه في كتابة وعيوب)

نيجي بقه لخلاصة الخلاصة واهم النقاط بعد الحوار مع المهندس ياسر

اولا الاضافات اذا لم تفيد فهي لن تضر بشيء وجميعها لا تعطي اكتر من رفع درجة لزوجة الزيت سواء زيت الفتيس او زيت الموتور ماعدا نوعين واحد منهم للاسف مش موجود في مصر والاخر هو الايزي
بالنسبة لاضافة زيت الموتور افضل اضافة التي تعطي طبقة مستمرة علي جدار الموتور من الداخل وعن تجربة المهندس ياسر الايزي فيه المادة ديه وهي تلتسق بجدار الموتور ولا تنزل الي الكارتيرة بعد ايقاف تشغيل الموترو سألته علي الابرو للاسف مجربوش فلا يستطيع الحكم عليه
كلنا عارفين ان التأكل في الموتورمن الداخل بيحدث فقط عند بداية التشغيل اما لو الموتور شغال 24 ساعة صعب جدا ان يتأكل مع وجود زيت في داخله
بالنسبة لاضافات الفتيس مش هتعمل اي حاجة غير انها هترفع درجة اللزوجة للزيت الموجود به

سالته علي استخدام الزيت الـ140 رده كان مش هيضر بس هيبقي مش كويس في الشتاء للاسف مكنش اعرف ان فيه منه متعدد الدرجات كنت سألته عليه واعتقد من دراستي للزيوت انه هيكون افضل من الـ140 احادي الدرجة

وسألته علي الونة كان الرد هذا الصوت هو صوت طبيعي جدا ومافيش منه اي خوف ويظهر فقط علي الغيار التاني عند انخفاض السرعة نتيجة للـEngine Break وده طبيعي ولن يؤثر في اي شيء علي الاطلاق
لانه اذا كان عيب في الفتيس كان هيظهر علي كل الغيارات.

بالنسبة لشكاوي من عيوب بالعربية الي اتأكدت منه هو ان التوكيل بيتعامل مع الشكاوي بجدية وان اي عيب بيظهر بتكررا بيتم ارسال مندوب للشركة الام وبيشرح لهم العيب وبيوصل معاهم لحل ويمكن ده واضح في حاجات كتبير اختفت تماما مع الموديلات الجديدة وان الادارة علي اتم الاستعداد انها تحل اي مشكلة عند عملاءها بشرط تكون فعلا مشكلة مش مجرد هجوم للهجوم واي قطعةغيار بيثبت وجود عيب منها مثل تيل الفرام علي سبيل المثال بيتم معالجة ذلك علي الفور وده اعتقد انه شيء كويس جدا

تقدم ملحوظ في الخدمة وسرعة الاداء ولاول مرة يتم تحديد موعد لانهاء الصيانة وفعلا العربية تخلص في اقل من الموعد المحدد
المهندس صبحي قالي ان العربية هتخلص صيانة بعد ساعة ونص بص هي خلصت بعد ساعة وده شيء كلنا كنا بنطالب بيه

وبالنسبة لانوار الشبورة ودراع النور سيتم توفيرهم ان شاء الله وبأسعار ارخص من المعروض خارج التوكيل بلاضافة الي الجودة الجيدة ايضا

ملخص الموضوع التوكيل بيطور من نفسه
في فعلا خطة انهم ينزلو بموديلات جديدة بس ميقدرش يعلن عنها حاليا لارتباط ذلك بترتيبات واوضاع اخري تخص المسأل الادارية والتنظيمية وده منطقي جدا انه ميعلنش عن حاجة ممكن تتعرض نتيجة لظروف خارجة عن ارادته للعراقيل

طلبت من المهندس احمد ان يكونهو او احد المهندسين المحترمين متواجد معنا علي المنتدي وهومشكورا وعد ان يدرس امكانية ذلك وخصوصا اناحنا معانا فعلا استاذة داليا عضوة بالمنتدي

فشكرا لكل واحد بيحاول يجتهد في عمله من اجل الوصول للافضل ومن اجل راحة العملاء
شكرا استاذ محمد رمضان شكرا استاذة داليا شكرا مهندس ياسر
شكر خاص جدا للمهندس صبحي والمهندس احمد
وطبعا لا يمكن انسي استاذ عماد حبيب وبعتذرله عن اي اساءة صدرت في حقه من اي عضو وانت عارف يا استاذ عماد ان فيه ناس كتير بتهاجم وبس ودول بيبقو واضحين جدا وكلنا تقريبا بنلفظهم

بالنسبة للسيارة الجديدة الي قولتكم عليها هي نفس السيارة الاف 3 مع بعض التعديلات في الاكسسورات والموتور وان شاء الله هعمل تقرير مفصل عنها بالصور منفصل

[AbOnOrA]

تسلم ايدك يا باشمهندس حسام ومشكور على الافادة القيمة ومبروووووووك الصيانة عقبال ما تعمل صيانة ال 200 الف