#1
|
|||
|
|||
عربيتي الاوبترا عاوزه تموتني ( قصه حقيقيه )
معايا اوبترا
كنت في شارع النصر في التقاطع بتاع رابعه وكنت واقف ومره واحده لقيت ال ار بي ام بيعلى لوحدو لحد ما وصل 2500 والفرامل ريحت وحجرت تحت رجلي والعربيه زي ما يكون ركبها عفريت وقررت من نفسها تخبط وتنط على العربيه اللي قدامي الحمد لله ربنا ستر وطفيتها ورجعت شغلتها عادي ومفيش مشكله كررت تاني نفس الموضوع على كوبري اكتوبر في الزحمه حطيت الجير على الوضع N ودوست بنزين اتظبت وقعدت تعمل كدا في اي مكان فيه زحمه وقررت اروح التوكيل ههههههه العربيه ربنا هداها او خافت معرفش المهم انها فضلت شغاله ساعتين في التوكيل تحت جميع الظروف اللي حكيتها وبرضو تمام مفيش أي حاجه لدرجه المهندس بصلي على اني مجنون او جاي اشتغلو وطلعت وانا فرحان انها اتظبت والله وانا بلف اليوتيرن اللي جنب منصور عملت نفس الحركه رجعت تاني قالي المهندس يعني انت نفسك تدفع فلوس وخلاص قلتلو لا انا مش عاوز العربيه تخبط اي حاجه قدمها كل ما تبقى زعلانه من الزحمه ؟؟ كشف عليها كومبيوتر مفيش حاجه وبعدين طلع معايا مهندس جربناها ساعه طلعنها عنيها برضو مفيش حاجه جالي اكتئاب وروحت وانا مروح كلمت العربيه وقلتلها انت عاوزه تموتيني ليه وانا بحبك ومظبطك ردت عليا بنفس الحركه والار بي ام ضرب 2500 تاني لوحدو المهم رحت لواحد بره قالي العربيه مفيش فيها حاجه وقعدت شهر كامل تقطع وتدوس بنزين بمزاجها وفي الوقت اللي يعجبها رحت في الشهر دا اربع مرات للتوكيل ول كهربائيه وميانيكا في كل حته وقررت اخر ما زهت اني اطلقها بالتلاته لحد ما لقيت بالصدفه في موقع صيانه واعطال اجنبي اسباب للتقطيع والار بي ام ورحت للتوكيل وشرحت لواحد هناك الموضوع قالي حساس اوكسوجسن غيرتو في نفس الدقيقه ب 800 جنيه وبعدين قلت مش مشكله احسن ما اضيع واضيع شخص بريء ذنبو انو كان واقف قدامي في لحظه جنون للعربيه أيوه رجعت تعمل نفس الحركه رجعت تاني يوم التوكيل قالي واحد منهم ممكن حساس الحراره او حساس الثروتل بدي او حساس ضغط الهوا وانا قاعد بسمع وببص على كيس جنب المهندس وطلع بلونه في راسي وانا شايف في خيالي اني بخنقو بالكيس دا المهم واحد قالي الموبينه بايظه ب 500 جنيه فقط قلتلو غير يا باشا وطلعت والعربيه عملتلي كدا وعملت نفس العمله المهم لو سمعت كلامهم كنت هغير شويه حساسات ب 4000 جنيه عير حساس بوابه الهوا ب 2000 جنيه لانو بلت ان في البوابه فلازم أشتريها ركنت العربيه تحت البيت وقعدت ابصلها وانا مفروس منها طلعت سهرت طول الليل قدام الكومبيوتر بدور يمكن الاقي واحد يفك السحر او العمل اللي مجننها قريت عن حاجه اسمها صمام PVC ممكن هوا اللي بيعمل كدا غيرتو انا لوحدي ب 40 جنيه, برضو لسه زي ما هيا قريت ممكن اسلاك البوجيهات غيرتها وجبت طقم اصلي ب 500 المهم قررت اكتب استغاثه لشركه GM موتورز قبل ما اولع في العربيه محصلش حاجه قريت عليها قران برضو مفيش فايده قررت بسرعه وبدون نقاش بيع العربيه وانا سهران قاعد بندب حظي مع العربيه في موقع لقيت واحد كاتب انو عندو نفس المشكله وعمل زي ما انا عملت بالظبت وكان هيحرق العربيه لحد ما لقى الحل اتبسطت انا طبعا ونزلت الساعه 5 الفجر علشان اطبق اللي مكتوب كان الموضوع عباره عن بوابه الهوا وسخه يا رجاله وعاوزه تتنظف بس بشويه بنزين الله اكبر تكبير الله اكبر كل دا وكان بتوع التوكيل واحد يقولي دي عاوزه عمره والتاني يقولي الكومبيوتر يتغير بس ب 4500 جنيه والتالت يقولي الضفيره فيها مشكله والرابع عاوزني اغير طرمبه البنزين ب 1850 فقط لا غير وطقم انجكتر ( بخاخات ) ب 4000 جنيه بس الحمد لله اتصلحت بعد شهر ونص من المرمطه في التوكيل وبره التوكيل فكيت البوابه وغسلتها كويس ونشفتها وهشتكتها وركبتها والحمد لله رجعت زي الاول واحسن ... واخص بالشكر كل مهندسين التوكيل والتوكيل شخصيا على كل جهودهم واخلاصهم في عكننتي وتطليع عيني طول شهر ونص على فكره في تفاصيل كتير مكتبتهاش في الحكايه قصدي الكابوس دا علشان مش عاوز اجيب اي امراض مزمنه للأعضاء الكرام وشكرا عمرو عاطف في 11/9/2011
__________________
عجبا للزمان في حالتيه وبلاء ذهبت منه اليه رب يوم بكيت منـــــــه فلما تولى بكيت عليـه |
#2
|
||||
|
||||
رد: عربيتي الاوبترا عاوزه تموتني ( قصه حقيقيه )
الف الف مبروك زوال الغومه والعكننه
وشكرا لمعلومة حضرتك عن بوابة الهواء بس الابترا بتاعتك موديل كام انا كنت ناوى أجيب مستعمل 2006 أن شاء الله
__________________
حبيبت قلبى سبيدر |
#3
|
|||
|
|||
رد: عربيتي الاوبترا عاوزه تموتني ( قصه حقيقيه )
: Bravo:
|
#4
|
|||
|
|||
رد: عربيتي الاوبترا عاوزه تموتني ( قصه حقيقيه )
وصيانه على طول عربيه كويسه جدا مكيف حلو صالون واسع نسبيا وبالتوفيق ان شاء الله طابلو معقول بس مش فخم زي الكروز او السيراتو
__________________
عجبا للزمان في حالتيه وبلاء ذهبت منه اليه رب يوم بكيت منـــــــه فلما تولى بكيت عليـه |
#5
|
||||
|
||||
رد: عربيتي الاوبترا عاوزه تموتني ( قصه حقيقيه )
شكرا دكتور بس ليه سؤال
هى تعمل كام الان الحاله الكويسه منول أوأتوماتيك ولك جزيل الشكر
__________________
حبيبت قلبى سبيدر |
|
|