افيدونى ... اشترى اى سيارة من هؤلاء :( :( ؟؟؟؟

[Mohammad Saad]

السلام عليكم اخوتى الكرام ...... هذه اول مشاركة لى فى هذا المنتدى العظيم

الموقف الآن هو انى اريد شراء سيارة مستعملة وميزانيتى حوالى 30000
افكر فى سيارة من اربعة :
هيونداى إكسيل
فيات اونو
كيا برايد (سواء HB او سيدان)
سكودا فيليشيا .....

ارجو ابداء الاراء من ناحية متوسط سعر كل واحدة ... ايهم الانسب ... ايهم الاوفر فى استهلاك البنزين ... ايهم ارخص ومدى توافر قطع الغيار .... مع العلم انى سوف ابحث عن سيارة تكون فابريقة كما يقال .... علشان انا معلش نزيه اوى فى الحاجات ديه ... او تقدر تقول تنك يعنى مش هاقبل اى حالة طبعاً ......

وعاوز اعرف كمان لما اشترى السيارة ... ايه اللى المفروض علية اعمله علشان ما ينضحكش علية وعلشان اتأكد انها سيارة كويسة وحالتها زى ما انا عاوز ...... وايه المصاريف اللى محتاجاها اول لما اشترى العربية ... علشان اعمل حسابى فيها ...........

لو حد عنده اقتراح بسيارة افضل وفى نفس متوسط السعر ده يتفضل بالاقتراح .....

انا عارف انى طولت بس هناك نقطة اخيرة .....

لدى زميلة فى العمل معاها ( هوندا جاز ) موديل 2003 عاوزة تبيعها هى حالتها كويسة 1500 CC مانيوال ورشاها ومتجنطة .... ويعنى اخدت لها كما خبطة غير مؤثرين على حسب كلامها (خبطات الاستعمال فى مصر يعنى ) السعر المطلوب فيها علشان انا زميلها 35000

هل يا ترى السيارة ديه كويسة والسعر ده كويس ولا اللى انا ذكرتهم فوق افضل ...

ارجو التوضيح والإفادة افادكم الله .......

شكراً
محمد سعد

[_amr.mostafa_]

انا رايي تدفع مقدم اي عربية جديده وتقسط

[هانى برسوم]

انا رائى الشخصى عن تجربة اتكل على اللة واشترى فيات اونو 1000سى سى اقتصادية وعملية وقطع غيارها ببلاش والكلام دة عن تجربة شخصية واللة شاهد على ما اقول

[pro mada]

اولا اهلا و سهلا بيك في منتدانا الجميل

ثانيا حضرتك قدامك اختيارات عده

1- تزود 5000 جنيه علي ال 30000 جنيه اللي معاك و تشتري سوزوكي ماروتي زيرو ( عربيه اقتصاديه في البنزين و قطع غيارها رخيصه و صيانتها سهله و هي اصلا عربيه اعتماديه و متجربه علي مدار السنين ) و يفضل انك تشتريها من التوكيل مباشره

2- اوعي تفكر تشتري جديد و تقسط عشان التقسيط مذله و خراب بيوت

3- اشتري مستعمل زي ماحضرتك اقترحت و لكن هناك اصول لشراء المستعمل

لما تيجي تبص علي العربيه خد معاك ميكانيكي معروف و امين عشان يفحصلك المحرك كويس ( هيشوف كبس البنزين نظامه ايه و هيبص بصه محترف علي المحرك )

لما الميكانيكي يقول توكل علي الله تاخد العربيه و ترفعها في بنزينه معروفه ( الفني هيفحصلك العفشه و الشاسيه )
ولما الفني يقول توكل علي الله متنساش تجربه القياده تسوقها بنفسك و شوف انت مرتاح في سواقتها و لا لا ؟؟؟؟؟ هل عندك اي ملحوظات عليها ؟؟؟؟؟

و بعد تجربه القياده تقري رخصه العربيه كويس ( و طبعا انت مش هتشتري العربيه من واحد مش كويس )

ادفع الفلوس ( بعد ما تطلع عين صاحبها في الفصال )

و تطلع بيها علي الميكانيكي تاني و تعمل الاتي :

تغير طقم سيور و فلاتر
تغير زيت المحرك بزيت موبيل وان
تزويد زيت الباور و الدبرياج و الفرامل ( زيت الباكم )
تفول العربيه بنزين ( بنزين 92 افضل )
تغيير الرداخ بالكامل
تنظف الكاربيراتير
تغير طقم الفرامل و طقم الدبرياج

و بعد كده تتطلع علي الكهربائي عشان تظبط كهربا العربيه

نخش علي شغل السمكره :
لو شويه دق علي البارد مااااااااشي عشان تظبط شكل العربيه
طبعا تديها وش نضافه بعد شغل السمكره

و بعد كده تعمل ترصيص و ظبط زوايا للعربيه

و لو عايز تظبتها شويه اعمل الاتي :
طقم جنوط اسبور 15 بوصه
طقم كاوتش جديد ( بريدجستون او ماكسيس )
غير الفوانيس لو فيها مشكله او شكلها مش حلو

بس كده و ارجو ان اكون قد افدتك

[Mohammad Saad]

جزاكم الله خيراً جميعاً ..... وعلى الخصوص الأخ ( pro mada ) شرح وافى وكافى ..... وعلى فكرة ... احنا ولاد كار واحد ( انا مهندس نظم ايضاً )

- فى ملاحظة واحدة بس على كلامك ، الا وهى انى طموحى افضل من مجرد سوزوكى ماروتى ... اعتقد لن تناسبنى ديه وجهة نظرى .....

- ولكن ما قولتش اى السيارات اللى انا ذكرتها افضل .....

- وايه رأيك فى الـهوندا اللى انا قولت عليها فى المشاركة .....

- التظبيطات اللى حضرتك قولت عليها ديه فوق من كشف وتغييرات وخلافه ... هتتكلف كام تقريباً علشان اعمل حسابى عليها .....

مازلت منتظر ردود باقى عمالقة واعضاء المنتدى ... حيث انى جديد فى عالم السيارات وكل كلمة لها اهمية عندى ....

شكراً
محمد سعد