نداء للتمبراويه ..دافعوا عن العربيه

[amakaty]

المشاركة الأصلية كتبت بواسطة omeir مع احترامي للسياره هي ممتازة انا شخصيا سافرت بيها وركبتها كتير لكن فعلا ملهاش قطع غيار ودا بيخسف بتمنها الارض , حاولت اجيب قطع غيار بسيطه ليها من تجار كبار فى القاهره كل ما اقول اوكره ازاز لفيات تيمبرا التاجر يضحك ويقولي مفيش ومش هتلاقي حاجه تركب عليها , طب خرطوم العمه يضحك ويقولي يا استاذ مش هتلاقيلها قطع غيار متسئلش , وللأسف العربيه جميله لكن الحلو ميكملش

بالنسبة لقطع غيار الميكانيكا جديدة موجوده عند الكلينى فى شارع شمبليون و شركة الفتح فى التوفقية و محلات تانبة كتير فى الوفقية و شارع فيصل بس الاثنين دول مستوردين وفى كمان محمد يوسف فى الدقى و بالنسبة الى الاجزاء الخاجية موجودة بعضها جديد و متوفرة استيراد جداً فى عزبة شلبى و الوكالة و بعض المحلات استيراد الفيات ( قطع غيراها متوسط السعر )
لكن فى المجمل العربية تعتبر عربية كويسة جداً بالنسبة الى سعرها مع امكانيتها اكبر عيوبها من حيس التصميم التبلوة سىء و النصف الاماى من العربية تقيل فابياثر على عمر العفشة

[waledahmed]

المشاركة الأصلية كتبت بواسطة algendy8 حاجة غريبة فعلا ، الناس بتفتى من غير إبداء أى أسباب منطقية أو علمية ، مجرد كلام لفض المجالس للظهور كالعالمين ببواطن الإمور ، مع إن الموضوع فى غاية البساطة وهو الفرجة على أساسيات التمبرا قبل الحكم أو المقارنة بأى سيارة تانية ، تلاقى الصاج بتاع التمبرا معروف إنه محمل ( سميك ) مش زى أى عربية موجودة دلوقت يعنى تتحمل أكثر من غيرها ، عفشة العربية قوية ومتينة ومعمرة ، موتور التمبرا سهل وبسيط وقوى ويشتغل فيه أى ميكانيكى عندة ضمير ، صالون العربية واسع وفخم ومريح ويركب فيها خمسة أفراد براحة تامة ووزنهم لا يؤثر على عزم الموتور أو سرعة العربية ، ويلاحظ ثباتها التام على الطريق وخاصة فى الملفات والسرعات المختلفة ، أما بالنسبة لكمالياتها نلاقى أن معظم العربيات التمبرا الكاملة بها باور وسنتر وتكييف ولما يكونوا مظبطين تحس إنك مش ممكن تستغنى عن العربية أبدا ، وطبعا فيه عربيات فيها كماليات أكثر من كدة ولكن ده مش موضوعنا ، لكن العربية التمبرا موفرة فى البنزين ومتينة وعالية بالنسبة ( للمطبات والمقبات ) وما أدراك وما المقبات الصناعية فى مصر . أهم حاجة إن جمع قطع الغيار للتمبرا سواء الجديدة ( ودى موجودة عند الكيلانى فى التوفيقية وهو أشهر محل فيه جميع قطع غيار التمبرا ) وبالنسبة لقطع الغيار بنظام الإستيراد وهو أرخص ومضمون ( تلاقى كل حاجة فى منطقى عزبة شلبى بعد المطرية حيث يوجد شارع بالكامل معظم محلاته تعمل فى التمبرا ) وحتلاقى كل حاجة ممكن تخطر على بالك خاصة بالتمبرا من صاج ، فبر داخلى ، أجزاء ميكانيكية أو كهربية ، فرش ........ ! وعلى فكرة الأسعار كلها فيها فصال وأقل بكثير من سعر الجديد . مش عارف أأقول إيه تانى بخصوص التمبرا غير ( أحسن إختيار العربية وخلى إيدك فيها بإستمرار ولا تبخل عليها وهى لن تبخل عليك أبدا وحتدعيلى .

مش شارع بس ده نصف عزبه شلبي تمبرا تقريبا

[سواق]

نفسي في عربية تمبرا بها كل الكماليات ياتري تعمل كام لو حالتها سليمة

[tameromarw]

اخوكم من بني سويف

شوفت علي النت عربيتين تمبرا موديل 92

كلمت اصحابهم علي التليفون وخلصت السعر معاهم علي 25 الف جنيه

ايه رأيكم في الحالات اللي بالسعر ده ؟؟؟ انا لسه هشوفهم بس قلت انزل السعر ولو معجبونيش خلاص

[mohefnawy]

انا لسه شايف واحدة
92 1600 سي سي
فيها كل الكماليات تابلوه ديجيتال
فرش جديد
فابريكة جوة وبرة

صاحبها مش راضي ينزل عن 33500

ايه رايكم
أتوكل على الله وأخدها