زيوت XADO العالمية بتوكيل مصرى نازلة بتقلها ، لضمان المحافظة على عمر المحرك لأطول مدة بتقنية النانو

[nassser]

انا مبسوط انك متابع يا ناصر باشا بس ياريت كنت تاخد بالك من تاريخ الفديو الأساسى بقاله اكتر من شهر وفى المدة دى عملت أكتر من 500 كيلو وتنتهى المعالجة بإذن الله والتروس ترجع لطبيعتها بعد 1500 كيلو او 50 ساعة مشى بالعربية (إذن التجربة لم تنتهي ولم تظهر نتائجها)
اما الكارونة والفتيس اللى رايحين فى داهية بقالى شهور ماشى عليهم عشان مش معايا فلوس أغيرهم (والله انا زيك بالضبط)
وبعدين لو كلامى كله دعاية وخلاص زى منتا شايف خلاص(ذلك ما لا اتمناه )
بس فكر كدا مع نفسك واحسبها لو روحت لأى حد بتاع كوارين وكح ف عربيتك هياخد منك على الأقل 700 جنيه اما بتاع الفتايس مش أقل من 400 جنيه وفى الآخر برضو التروس هتون
(اخشى ان تستغلك الشركات نتيجة الأمل في حلول اقل تكلفة وتستغلنا ايضا)
احسبها صح وبلاش الكلام المستفز (لم اقصد الاستفزاز .واعتذر أن اسأت التعبير ) عشان انا مش تاجر ولا بياع كفتة انت فاهم !!! (طبعاً يا باشا انت افضل مني خبرة وعلماً وانا احترم ذلك)

انا بنقل للاخوة هنا تجاربى الشخصية (احنا قولنا لسه فاضل 1000كم)لو ماكنتش جربت المنتجات دى ماكنتش هعمل موضوع (وانا سعيد انك جربتها)
الأنانية بقى ان أجرب المنتج وما أقولش للناس عشان تستفيد (كلام صحيح)


بطلوا بقى النفسيات دى (ده بقى مش صحيح لأني أولا لم انل شرف معرفة حضرتك ثانيا انا لا اكره لأي شخص اي خير ثالثا انا ابقى منفسن لو انت اخدت منهم اي مقابل للدعاية وانا لأ والحقيقة انت محترم وانا شرحه وعمري ما فكرت فأي حاجة زي دي)، هو اه اللى حصل للبشر !!!!
واللى ايده فى المية مش زى اللى ايده فى النار (والله انا عندي شاهين مجنناني زيك واكثر .. وده اللي بيخليني احاذر شوية وتحس اني بشكك في كلامك وده مش صحيح ) بكره الدايرة تدور وتلاقى نفسك فى نفس موقفى عافاك وعافانا الله(شكرا للدعاء والمشكلة دايرة معايا فعليا واتمنى من كل قلبي ان التجربة تنجح وانا اول المهنئين والمشترين لأني عندي نفس المشاكل)

ربنا يباركلك في عربيتك ويكفيك شرها واعتذر لسوء الفهم
اخوك ناصر

[Hisham.Elgazzar]

nassser
نورت الموضوع ياباشا
والحمدلله الكارونة الى حد ما صوتها هادى ولسه ما حطيتش الإزازة التانية فى الفتيس

أستاز أيمن احنا لسه بنجرب المنتج لكن مبدئيا انا متفائل جدا بالنسبة للمرمم صوت الكارونة هدى فعلا ده دليل على ان المنتج فعال بإذن الله

وبالنسبة لزيوت المحرك تاجر الزيوت اللى بتعامل معاه منزل منتجات الشركة دى من زيوت المحرك التخليقية والنصف تخليقية وماشاء الله بيشكر فيها جدا
اتمنى ان الشركة دى تفضل محافظة على المستوى ده على الأقل نلاقى زيوت محترمة بدل من موبيل وشيل اللى اتضربوا وبقوا زى المية تخيل لما تبقى ماشى على طريق مفتوح ومع ذلك العربية بتسخن !!!!
مع ان الزيت ماكملش 1000 كيلو

[nassser]

ا. هشام
انا سعيد جدا ومتفائل برأيك عن المنتج ويا ريت تقولي المنتج اللي استخدمته والطريقة علشان نقتدي بيك وربنا يباركلك فيها وتتخلص من أعراض الفتيس والكرونة وتبقى زي الفل
مع خالص تحياتي
ناصر

[Hisham.Elgazzar]

المشاركة الأصلية كتبت بواسطة nassser ا. هشام انا سعيد جدا ومتفائل برأيك عن المنتج ويا ريت تقولي المنتج اللي استخدمته والطريقة علشان نقتدي بيك وربنا يباركلك فيها وتتخلص من أعراض الفتيس والكرونة وتبقى زي الفل مع خالص تحياتي ناصر

المنتج ده

[medhat3377]

السلام عليكم انا استخدمت زيت زادو street racing 5W-50 وكنت فرحان به لكن بعد قطع مسافه 700 كيلو متر الموتور لما تجيب به 5000 لفه تلاقى لمبه الزيت نورت و لم تنطفىء الا بعد غلق الموتور لغايه لما الموتور يبرد خالص لكن درجه حراره الموتور لم تصل الى اعلى من مستواه الطبيعى يعنى درجه الحراره طبيعيه بعد كده سمعت خبط فى الموتور و بعد الفك لاقيت سبيكه البييل بتاعه الذراع البستم رقم 2 لفت من مكانها و كسرت الدبانه اى سن السبيكه فى ذراع البييل لما رحت ورشه الخراطه قال لى الزيت مش بيستحمل المجهود العالى رحت جبت ذراع بيل و سبيكه جديده لذراع واحد فقط و قفلت الموتور و رجعت تانى لزيت فيسكو 5000 على الاقل لم يسبب خسائر طول فتره استخدامه 300000 كيلو هذا ما حدث معى اللى ليه تجربه تانيه معاه يقول