هام للسيارات التى تعمل بالغاز الطبيعى وبالأخص اللوجان ..

[KhaledSobhy]

كل عام وانتم جميعا بخير وفى تمام الصحة والعافية
انا قررت اعمل الموضوع ده بره موضوع تقرير تركيب الغاز الطبيعى للوجان 2011 علشان الفائدة تعم على الجميع
انا هحكيلكوا على موقف حصلى قبل كده
بعد ما حولت السيارة للعمل بالغاز الطبيعى بعديها بـ 6 شهور كده حصل الاتى
فى يوم فى الصباح فتحت طبعا الكبوت علشان اقيس الزيوت واتمم على كل شىء كان زيت الوتور كامل ولونه اصفر وكويس وجاى ادور العربية لاقيت العربية دايرة كويس لكن علامة الزيت ظاهرة فى التابلوه خفت وبطلت الموتور لان علامة الزيت تدل على خلل فى دورة الزيت وبالتالى الزيت = عمر الموتور
المهم فى ميكانيكى قاللى تلاقى العلامة معلقة ولا حاجة وروحت مدور وماخفتش لاقيت العربية فجأة بطلت وكل ما اجى ادور ماتدورش وصوت الدوارة غريب روحت ساحبها للميكانيكيين كل واحد عنده رأى مختلف عن الاخر واحد يقوللى ده سير الكاتينة اتقطع وووووو
بس فى ميكانيكى منهم فاجأنى قاللى الموتور عايز عمرة
اتصدمت ازاى عربية زيرو 40000 كم وعايزة عمرة المهم الميكانيكى قاللى الصبح نفتح الموتور ونشوف فيها ايه قلت له لالالالالا انا هوديها للتوكيل يتصرف وديتها التوكيل هناك بصراحة فى توكيل العامرية المهندس حسام راجل بصراحة فى قمة الاحترام وفى مهندس تانى كمان اسمه خالد هما الاتنين بصراح بحس انهم اللى صانعين العربية قاللى الموضوع مش كده خالص ولا المشكلة فى الغاز
وفتح اللاب توب بتاعه ووصله بكمبيوتر العربية راحت دايرة والتكلفة مع صيانة الـ 40000 كم كانت 1300 فى التوكيل بس بجد ياجماعة الشغل البسيط اللى عملته بره التوكيل من نقل بالكساحات وكشف ميكانيكيين كان 2500 جنيه وعلى الفاضى
يعنى من الاخر العربية دى عايزة التوكيل من الاخر والالتزام بمواعيد الصيانات الدورية وقطع الغيار الاصلية وبجد الشغل اللى بيتعمل فى التوكيل رغم انه غالى شوية لكن ارخص واحسن وافضل من بره
اى استفسارات انا تحت امركم
وكل عام وانتم بخير

[KhaledSobhy]

انا عايز اقول من الاخر لو معاك عربية لوجان ( بنزين او غاز )
انصحك بالصيانات الدورية وقطع الغيار الاصلية
واللى معاه رينو لوجان مايستقلش بيها دى عربية فيها امكانيات العربيات اللى فوق الـ 100 الف جنيه بس سعرها ده علشان خاطر المعافاة الجمركية
والمفروض السيارة دى ماتتقارنش بالفيرنا واللانوس من ناحية الامكانيات والعلامة خاااالص دى اسمها رينــــــــــــــــــــــ ـــــــــــــــــــــــــ ـــــو

[sherifabden]

طبعا ياباشا
التوكيل هوا ادرى واحد بالعربية من اي ميكانيكي
بس كله كوم واللي قلك ان الموتور عايز عمرة دا كوم تاني
عموما ياباشا اي مشكلة زي دي روح للتوكيل احسن وسيب الميكانيكية لما بعد الضمان
واحد يقولي ان التوكيل غالي
فعلا ممكن يكون التوكيل غالي انما انتا بتتعامل مع واحد مضمون عارف العربية من الالف للياء
والف شكر على نقل التجربة

[KhaledSobhy]

المشاركة الأصلية كتبت بواسطة sherifabden طبعا ياباشا التوكيل هوا ادرى واحد بالعربية من اي ميكانيكي بس كله كوم واللي قلك ان الموتور عايز عمرة دا كوم تاني عموما ياباشا اي مشكلة زي دي روح للتوكيل احسن وسيب الميكانيكية لما بعد الضمان واحد يقولي ان التوكيل غالي فعلا ممكن يكون التوكيل غالي انما انتا بتتعامل مع واحد مضمون عارف العربية من الالف للياء والف شكر على نقل التجربة

العفو ياباشا ان شاء الله عمرى ما هبخل على منتدى مصر موتورز بأى معلومة او تجربة من تجاربى اللى بصراحة كتير
لأن المنتدى ده بصراحة الاعضاء اللى فيه افادونى كتير قبل ما اسجل هنا لما كنت بقرأ المواضيع بتاعتهم وضمنهم مواضيعك طبعا يا استاذ sherifabden
وشكرا على اهتمامك والرد

[danoora]

حمدا لله على سلامتها و ان شاء الله تكون كويسة دلوقتي .. و طبعا التوكيل اضمن مكان بس المهم المعاملة و انا لاحظت ان كل الاعضاء بيشكروا في فرع العامرية ان شاء الله انقل تعاملاتي لعندهم و في مكان تاني جربته ناس محترمة جدا برضه اسمه مركز صلاح الدين لخدمة الرينو لو حد عاوز رقمه يقول