اشتريت اللوجان بس خدت مقلب جامد

[MOUSTAFA_SAAD]

السلام عليكم
امبارح يوم الاحد روحت اشتريت اللوجان الهاف اوبشن من عند سمير ريان فى القاهره وانا ساكن فى دمنهور سافرت مخصوص بعد لما ادانى اقل سعر عن الاسكندريه ب 63500 يعنى كان فى وفر حوالى 500 جنيها واكتر وبكده اقدر اوفر شويه بحيث اعوض فرق المواصلات بين الاسكندريه القريبه والقاهره البعيده عنى وايضا كانت كل الالوان موجوده واخترت براحتى على الطبيعه اللون البترولى

المقلب الجامد هو انى استلمت العربيه بعد غسيلها وشيكت هلى كل حاجه وكله تمام واخدت العربيه وجيت علشان اروح سبير كار علشان اركب فرش وكاميرا خلفيه ومرايا دى فى دى وانذار وبعض الاكسسوارات بالمره لان الاسعار عندنا فى دمنهور نار ومفيش لا كامير ا ولا مرايا دى فى دى لاقيت ان سبير كار مغلق علشان النهارده الاحد

يا جماعه ده كلام بالذمه محل ب3 فروع ومول تجارى كبير فى القاهره الجديده كله مغلق علشان يوم الاحد المفروض المحلات الكبيره دية متافلش ولاتاخد اجازات وبالنسبه للموضفين فيها يعملوا روتيشن معاهم ويبدلو اجازاتهم على مدار الاسبوع كل 2 او 3 ياخدوا يوم معين والباقى موجود وبكده المحل يفضل مفتوح على طول زى معظم المحلات الكبيره

طبعا كله اتخض من العنوان وفكر ان المقلب فى العربيه لكن العربيه الحمد لله زى الفل وجيت بيها من القاهره لدمنهور من غير نمر (وربنا سترها الحمد لله ) بالورقه اللى بيسموها الاقرار اللى استلمت بيها العربيه وان شاء الله كمان 3 ايام حنزل تانى اجيب باقى ورق العربيه من المعرض علشان ارخصها وركنها دلؤتى من غير حركه لحد لما ارخص

العربيه ممتازه ياجماعه الحمد لله وكانت كويس جدا فى السواقه والقعده جواها والعيوب اللى بتتكلموا عليها فى المنتديات من ناحية رعشه الفتيس وزنة دواسة البنزين لولا كلامكم عليها انا مكنتش لاحظتها لانها خفيفه جدا الا اذا كان اللى بيشتكى من العيب ده راكب عربيه بربع مليون جنيه قبل كده فبيحس بالعيوب دية علشان فرق الامكانيات والقيمه
العيب الوحيد اللى لاحظته فعلا وده يعتبر عيب ان صوت الماتور بره العربيه عالى شويه والمفروض يبقى اوطى من كده غير كده العربيه ممتازه بالقياس بمشوار حوالى 220 كيلو من المعرض فى القاهره حتى دمنهور
انا بصراحه شايف انها best value for money بالنسبه لفئتها وبالمقارنه بين باقى السيارات فى نفس السعر

المهم هل توجد اماكن كويسه فى الاسكندريه اركب فيها الاكسسورارت دية واسعارها رخيصه وتركيبها نضيف زى اسبير كار ورغم انى مجربتهوش قبل كده لكن طبعا سمعته كويسه جدا فى المعامله يارت العناوين بالضبط ورقم التليفون لوموجود علشان اعملها فى الاسكندريه واخلص بدل ما انزل مصر تالت مره

حاجه اخيره ياجماعه ممكن اعرف الحاجات اللى بتتغير فى التوكيل فى الصيانات اللى بتتعمل كل 10000 كيلو لان احتمال مروحش الصيانات دية واجمع كذا قطعه من القطع الاستهلاكيه اللى بيتغيروا فى ميعاد متقارب مع بعضهم فى صيانه واحده كل مثلا 20 او 30 الف وهل ده حيأثر على الضمان وهل يوجد لها مراكز خدمه معتمده فى الاسكتدريه غير التوكيل او ميكانيكى رينو بيفهم فى العربيه كويس لزوم الصيانات العاديه وتغيير السيور والفلاتر والبوجيهات وخلافه من القطع الاستهلاكيه لان متهيألى ان التوكيل اسعاره مازالت غاليه

[sheekoo]

مبروك يا باشا ربنا يديك خيرها ويكفيك شرها بخصوص الصيانة ال أعرفة انة فى خلال فترة الضمان كل صيانتها لازم تكون فى التوكيلات المعتمدة

[Bahi]

الف مبروك يا مصطفى بك على العربية وربنا يحفظك ويحفظهالك ويكفيك شرها.

بص يا سيدى أنا عندى لك اقتراحين على ضمانتى:
ا
لأول - تتصل بممدوح الكهربائى (0108718122) فى الابراهيمية فى اسكندرية وتقولة انك من طرفى وعايز اية بالضبط وبعدين وتتفق معاة على اليوم والساعة وتروحلة تاخدة من ايدة يوريك تشترى الحاجات دى منين وينصحك بالنسبة للماركات المتجربة وأسعارها وبعدين ترجعوا الورشة يركبهملك وهو فنان كهرباء وتكييفات وتركيب أكسسوارات من النوع دة وقبل كل شئ جدع جدا.

الثانى - تتصل بوليد عصفور (0123630366) فى عزبة سعد (سموحة) فى اسكندرية وتقولة انك من طرفى وعايز اية بالضبط وبعدين وتتفق معاة على اليوم والساعة وتروحلة هو يجيبلك كل اللى أنت عاوزة من محلات الاكسسوارات فى عزبة سعد لو مش عندة وبأسعار معقولة جدا ويجيبلك كهربائى من طرفة يركبهملك وأنت واقف.

وان شاء الله أعدى عليك أتفرج فى أول زيارة للعزبة فى النبيرة - مركز ايتاى البارود أو عزبة الحبشى - دمنهور.

[gadix]

الف مبروك يا باشا
انا كمان استلمت العربية امبارح
احمد ربنا علي كل شيء و كويس انك ما ركبتش حاجة لانك لازم تسأل في التوكيل قبل ما تركب
لان الي اعرفه انك لو ركبت حاجات معينة هتخرج العربية من الضمان
يعني بلاش تلعب في الكهرباء و غيره

[MOUSTAFA_SAAD]

المشاركة الأصلية كتبت بواسطة sheekoo مبروك يا باشا ربنا يديك خيرها ويكفيك شرها بخصوص الصيانة ال أعرفة انة فى خلال فترة الضمان كل صيانتها لازم تكون فى التوكيلات المعتمدة

شكرا ياباشا والله يبارك فيك

المشاركة الأصلية كتبت بواسطة Bahi الف مبروك يا مصطفى بك على العربية وربنا يحفظك ويحفظهالك ويكفيك شرها. بص يا سيدى أنا عندى لك اقتراحين على ضمانتى: ا لأول - تتصل بممدوح الكهربائى (0108718122) فى الابراهيمية فى اسكندرية وتقولة انك من طرفى وعايز اية بالضبط وبعدين وتتفق معاة على اليوم والساعة وتروحلة تاخدة من ايدة يوريك تشترى الحاجات دى منين وينصحك بالنسبة للماركات المتجربة وأسعارها وبعدين ترجعوا الورشة يركبهملك وهو فنان كهرباء وتكييفات وتركيب أكسسوارات من النوع دة وقبل كل شئ جدع جدا. الثانى - تتصل بوليد عصفور (0123630366) فى عزبة سعد (سموحة) فى اسكندرية وتقولة انك من طرفى وعايز اية بالضبط وبعدين وتتفق معاة على اليوم والساعة وتروحلة هو يجيبلك كل اللى أنت عاوزة من محلات الاكسسوارات فى عزبة سعد لو مش عندة وبأسعار معقولة جدا ويجيبلك كهربائى من طرفة يركبهملك وأنت واقف. وان شاء الله أعدى عليك أتفرج فى أول زيارة للعزبة فى النبيرة - مركز ايتاى البارود أو عزبة الحبشى - دمنهور.

الف شكر ياباشا على كرمك ويارب نخدمك فى الافراح ان شاء الله بس احنا الظاهر كده طلعنا بلديات

المشاركة الأصلية كتبت بواسطة gadix الف مبروك يا باشا انا كمان استلمت العربية امبارح احمد ربنا علي كل شيء و كويس انك ما ركبتش حاجة لانك لازم تسأل في التوكيل قبل ما تركب لان الي اعرفه انك لو ركبت حاجات معينة هتخرج العربية من الضمان يعني بلاش تلعب في الكهرباء و غيره

شكرا ليك ياباشا فى ناس سألت فى التوكيل قبل كده وردوا عليهم رد مايع شويه ومش واضح وهو ان طالما الحاجه اللى ركبت مبوظتش حاجه تانيه يبقى مفيش مشكله وطبعا انا اضمن منين ان الركب بوظ اللى بيتكلموا عليه ولا لا علشان كده حاركب الحاجات لانها اساسيه تقريبا دلؤتى وكمان الكامير ا والشاشه لازم اركبهم علشان دية عربية اختى اساسا جايباها تبع شغلها فى شركة الادويه وهى لسه بتتعلم ومش حتعرف تجيب مارشيدير بشنطة اللوجان العاليه