انا عملت 6500 كيلو برينو لوجان ومعملتش صيانة 5000 هعمل ال 10000 وعايز اسافر مرسى مطروح هل العربية هتستحمل سفر من القاهرة لمطروح؟؟

[TELEBK]

أولا : ألف مبروك عليك العربية ,وربنا يديك خيرها ويبعد عنك شرها .
ثانيا : لازم حضرتك تعرف حاجة مهمة ، وهيه إن العربية الجديدة بيبقي ليها جدول صيانة في التوكيل مهم جدا جدا يتعمل ويتضاف لملف العربية في التوكيل ، ولازم تلتزم بيه لإن ده حماية ليك وللعربية لاقدر الله في حالة لوحصل حاجة للعربية ففي الحالة ديه بيرجعوا للملف بتاعها ويشوفوها عملت الصيانة في وقتها ولا لأ وفي حالة لوكنت ملتزم بالجدول بتاع الصيانة ففي حالة حدوث اي حاجة لاقدر الله بيلتزموا معاك بالضمان ، لكن في حالة لو ملتزمتش بجدول الصيانة الدورية 1000 ، 5000 ، 10000 ،.....الخ ، فبيتلككوا في الحالة ديه وبيجيبوا الغلط عليك ويبقي كويس لو عرفت تخرج منهم بحاجة وممكن يقولوا ليك تخرج من الضمان لإنك ملتزمتش بمواعيد الصيانة الدورية ليها ، فأفضل تعمل الصيانة الدورية لل 5000 كم دلوقتي وتقول ليهم إنك كنت مسافر علشان كدة معرفتش تيجي ليهم إلا بعد مارجعت .
ثالثا : مشوار زي مرسي مطروح بيعمل ليه حوالي 500 كم رايح ، و500 راجع وقول تقريبا 200 كم لف جوه البلد وخارجها يعني 1200 كم ، وده مشوار مش قليل ، إنت محتاج تعمل الصيانة ليها قبل ماتسافر علشان تمشي وإنت مطمئن علي حياتك وحياة الراكبين معاك .
وتروح وترجع بالسلامة
د / خالد

[ringoo]

طيب ما تروح تعمل صيانة ال 5000 ودى صيانة مجانا ومش بتاخد وقت .. ايه المانع

[nafadnnnnnnnnnn]

انا كلمتهم عشان اعمل صيانة ال 5000 لقيت اول معاد بعد اسبوع وانا مسافر بعد يومين بس فية مركز صيانة معتمد فى فيصل قالولى دة ممكن تروحوا عادى بكرة وانا بالامانة خايف من مركز الصيانة دة فاية الحل؟؟؟؟؟؟؟؟؟ ارجوكوا ساعدونى بسرعة مافيش وقت اروح بتاع فيصل دة وخلاص ولا اسافر كدة وانشاء اللة خير؟؟؟؟؟؟؟؟؟؟

[TELEBK]

المشاركة الأصلية كتبت بواسطة nafadnnnnnnnnnn انا كلمتهم عشان اعمل صيانة ال 5000 لقيت اول معاد بعد اسبوع وانا مسافر بعد يومين بس فية مركز صيانة معتمد فى فيصل قالولى دة ممكن تروحوا عادى بكرة وانا بالامانة خايف من مركز الصيانة دة فاية الحل؟؟؟؟؟؟؟؟؟ ارجوكوا ساعدونى بسرعة مافيش وقت اروح بتاع فيصل دة وخلاص ولا اسافر كدة وانشاء اللة خير؟؟؟؟؟؟؟؟؟؟

توكل علي الله وروح مركز الصيانة وخليهم يعملوا صيانة ال5000 كم ، علشان تضمن حقك في الضمان ويتعمل في الملف إنك لم تتخلف عن إجراءات الضمان ، وتروح وتيجي بالسلامة .

المشاركة الأصلية كتبت بواسطة mokhtar872000 يا اللوجان بتغير زيت كل 10000 كم مش بتغير على 5000 التوكيل بيحط زيت تخليقى ل 10000كم انا معايا اللوجان وعملت بيها حوالى 11000 كم اول صيانه عملتها 5000 يادوب تشييك على العربيه تغيير الميه وتربيط عفشه وبتبقى مجانيه والصيانه التانيه عملتها فى 10000 كم ودى اللى غيرت فيها زيت والله شم فاكر اكلفت كام بالزبط بس حوالى 700 جنيه لان كان فيها تغييرحاجات معينه مش فاكر بالزبط لانى بره مصر من 4 شهور بس العربيه بتبقى بعد الصيانه ورعه والسحب اعلى يعنى الصيانه لو عايز تعملها ممكن كل 10000 كم ودىبتغير زيت والحاجات التانيه وبتبقى بفلوس اما صيانه ال 5000 وال 15000 وال 25000 وهكذا بتكون مجرد تربيط وتشييك ومجانيه اتكل على الله وسافر بيها مطروح ولو عايز تكمل على ليبيا مش هتقول لا ماشاء الله فى السفر حلوه جدا واستهلاك البنزين على السرعه المعقوله 110 ممتاز وموتور 1600 مش 1000 يعنى مش مخنوق انا سافرت بيها من دمياط لاسكندريه ساعتين ونص متواصل رايح جاى حوالى 400 كم 3 مرات فى اقل من اسبوع وبسم الله ماشاء الله ولا الهوا ماقصرتش معايا اتمتع بعربيتك وعيش اللحظه

كلامك غير مقنع بالمره يا بشمهندس ازاي عربية زيرو بتلين علي 10000 كيلو يعني المفروض والصح الزيت يتغير علي 1000 كيلو في الاول علشان ترسيبات المعادن اللي بتبقي معلقة بداخل الماتور تنزل مع الزيت

انا مش مصدق لحد دلوقتي ان اللوجن بتعمل اول صيانة علي ال 5000 كيلو مش 10000 زي ما بتقول

انا قولت لصاحب الموضوع نصحيتي عايز تمشي بيها خير وبركه مش عايز اللي بياكل علي ضرسه بينفع نفسه وتقبل تحياتي