تعديل دايو لانوس ( مساعدة )

[heshame2]

يا جماعة يارب حد يساعدني عشان محتار اوي انا جبت عربية دايو لانوس موديل 2003 لونها ازرق ميتاليك فعايز يعني اعمل شوية حاجات تظبيط يخلي شكلها حلو زي

تغيير الفانوس الأمامي وتركيب فيه زينون وتغير لمبات فوانيس الشبورة

رش الحتة اللي تحت الأكصدام اللي قدام اسود مثلا

تركيب فاميه وستاير اللي هي بتتشال

عايز كمان اجيب كاسيت دي في دي بس من غير شاشة واجيبله شاشة منفصلة اربطها بالكاسيت ينفع ولا لا وفي حدود كام كدة

وعايز اعملها جهاز انذار بالرموت تكلفته كام

وعايز طقم سماعات حلو يكون صوته عالي كدة ونقي في حدود 800 جنيه

ياريت تساعدوني عشان محتار اوي اوي انا معايا حوالي 2500 جنيه وعايز اظبط شكل العربية افيدوني !

[Injection]

الزينون ياباشا فكرة كويسة, وسعر العدد نزل وممكن تلاقى زينون ب 250 جنيه, وفيه الأغلى.

ولمض الشبورة هتضطر تجيب طقم زينون تانى بلمض مختلفة عن الأصلى, وده فى حدود 300 الى 350 جنيه.

وممكن طقم لمض أبيض ب 10 جنيه بدل اللمض الواطية بتاعة أول تكة للنور, علشان تلائم الزينون.

الحتة اللى تحت الأكصدام ممكن توديها لبوهيجى يعملها أو حضرتك تعملها بنفسك, لو قررت تعملها بنفسك هتحتاج علبة دهان أسبراى سوداء ب 7 جنيه, وبلستر وورق جرانين, هتغطى الراديتير والحتة اللى ورا الأكصدام بورق الجرانين, وتلزق حوالين الحتة اللى عايز ترشها بلستر, وترش طبقة وبعديها ب5 دقائق طبقة تانية وواحدة كمان, ومبروك عليك.

الفامية والستائر فكرة كويسة بس هيعملوا مشاكل مع المرور, الفاميه شارع دمشق عدل, بس مش عارف الأسعار دلوقتى بس هى رخيصة, الستائر فيه من 60 الى 100 حسب الخامة وعدد القطع, وغالبا بتبقى واحدة للزجاج الورانى وأثنين لزجاج الركاب الخلفى.

وممكن بالمرة وأنت بتفيم تخلى الراجل يفيم الحتة اللى ورا النمر من ورا بأستيكر أسود, ولو عايز تفيم الفوانيس بالمرة (تخليهم أسود)

عايز رأيى فى الكاسيت الدى فى دى, بلاش, شكله ملفت جداااااا للنظر, والحرامى ممكن يكسر الزجاج علشان 5 جنيه فكة, بلاش منه.

ممكن بداله شماسة دى فى دى من اللى بتعمل كل حاجة, فلاشة وميمورى ودى فى دى بلاير ولعب ودراعات كمان, وسعرها رخص دلوقتى وفى حدود 500 جنيه أو أقل.

الدى فى دى هيكلف حضرتك أكثر من 1000 جنيه لوحده, وهو بييجى بالشاشة بتاعته, لو حضرتك تحب توصل عليه شاشة تانية بعد كده أو أكثر عادى.

الأنذار ياباشا أسعاره فى النازل, وفيه ماركات كتير أغلبها صينى, وبيبقى فيه مميزات من أول immobilizer للعربية لحد مفتاح بالشاشة بيراقب العربية وبيوضح اللى بيحصل ليها, والسعر حسب الماركة والمميزات بيبتدى من 100 لحد 350 مثلا للحاجات النضيفة, وممكن أقل كمان.

طقم السماعات لو هتركب على نفس سماعات العربية من غير قص فى الصاج اللى ورا, ممكن تجيب طقم فى حدود 200 الى 300 وات, مقاس 16 سم, السعر مش متأكد منه بس فى حدود 200 الى 250 والله أعلم.

وناس كتير بتشكر فى السونى ال 300 وات, صوتهم نقى وباور عالى.

ومتخرجش عن السونى والبايونيير, بلاش كينوود أو أى ماركة تانية وأبعد تماما عن الصينى اللى 700 وات وب 40 جنيه ده.

ودول هيركبوا على الكاسيت بدل القدام على طول من غير اى تعديل, وسماعات الأبواب تقريبا يا 10 يا 13 سم, فحضرتك حاول تتأكد من البائع من المقاس وتجيب حاجة برضو فى حدود 200 وات, مش لازم ازيد.

وال 2500 جنيه لو فضل منهم شوية, تقدر تركب كسوة للكراسى تحافظ عليها وشكل كويس بحوالى 80 جنيه فيما فوق, وتجيب طقم مشايات (اللى بيتحط على الأرض قدام الكراسى) بحوالى 40 جنيه

[acounter01]

روح عند سبير كار وروح لاستاذ امير وقولة انك عاوز تظبط العربية وقولة علي الامكانيات المادية وهو حيعمل لالازم

[heshame2]

الف شكر يا باشا على المعلومات الجامدة دي بس طيب لو عايز اغير الفوانيس اللي قدام واركب فوانيس شكلها احسن في فوانيس دايو معدلة و تكليف الفامية للعربية كلها حوالي يتكلف كام واربع جنوط حلوين من غير كاوتشات يتكلفو كام و سرينة البوليس تبقى مشكور اوي اوي اوي .

[Injection]

المشاركة الأصلية كتبت بواسطة heshame2 الف شكر يا باشا على المعلومات الجامدة دي بس طيب لو عايز اغير الفوانيس اللي قدام واركب فوانيس شكلها احسن في فوانيس دايو معدلة و تكليف الفامية للعربية كلها حوالي يتكلف كام واربع جنوط حلوين من غير كاوتشات يتكلفو كام و سرينة البوليس تبقى مشكور اوي اوي اوي .

نبدأ بالجنوط, لو هتركب ياباشا نفس المقاس اللى عندك اللى هو ال 13, يبقى هتلاقى تشكيلة كبيرة معظمها صينى, أسعارها بتبدأ من 800 جنيه الى 1500 حسب الشكل وبلد الصنع, وطبعا المحل.

ولو هتركب 14 نفس الحكاية, السعر هيبتدى من 1000 جنيه الى 2000 برضه حسب المحل والشكل وبلد المنشأ.

ناس كتير بتنصح بأشرفكوا للجنوط لو حضرتك تعرفه, هو فاتح فروع كتير أشهرهم اللى فى الحى السابع, وفرع تانى فى الحلمية, وفرع فى السواح جنب الرومانى.

الفوانيس منصحش حضرتك تغيرها, لأنها هتبقى غالية, يعنى الفانوس الواحد المعدل ممكن يبدأ من 350 جنيه الى 600 جنيه, وده فانوس واحد.

لو عايز ممكن تفيم الفوانيس أسود علشان شكلها يبقى أحلى, أو تركب رينجات, اللى هى العدسات بتاعت البى أم, بس معتقدش شكلها هيليق على اللانوس.

وفيه ناس فى الحرفيين بتعمل شغل فى الفوانيس, يعنى ممكن ترش اللون الفضى اللى جوه الفانوس ده أسود, وممكن تركب عندهم عدسات وهكذا, وهيبقى أقل بكتير من فانوس جديد معدل.

السرينة ياباشا بتتنوع, يعنى فيه من أول السرينة التعبانة اللى ب40 جنيه, ودى صوتها واطى ومافيهاش غير أصوات تتعد على صوابع اليد الواحدة, لحد الحاجات اللى ب 250 جنيه فيما فوق, ودى طبعا حاجات من الأخر وصوتها عالى جدا, بخلاف أصواتها الكتير وأن معظم أنواعها فيها مايك.

وأكبر تجمع لبائعى السراين هو فى التوفيقية, بتشتريها وتركبها هناك, بس فاصل فصال مميت مع البائعين, اللى يقولك 100 قل له 50.

الفامية ياباشا, فرخ الفاميه رخص دلوقتى, يعنى العربية كلها بالتركيب تعمل فى حدود 100 جنيه مش أكثر, وأحتمال أقل كمان, وطبعا الفاميه يعنى شارع دمشق على طول, وبالمرة وحضرتك هناك هتلاقى محلات كتير للأستيكر والتعديل وهتديلك شوية أفكار.

بالتوفيق ياباشا, وأرجو أنى أكون ساعدتك.