حاجة تنرفز

[alymonir]

المشاركة الأصلية كتبت بواسطة Injection مبدأيا علشان مطولش فى الكلام, التربو والسوبر تشارجر غرضهم واحد وهو أدخال هواء زيادة الى الموتور عن طريق ضغطه بكمبروسر, علشان يزود عدد الأحصنة من غير تكبير حجم المحرك. الفرق بقى أن السوبر شارجر بيعتمد على موتور العربية فى تشغيل الكمبروسر بتاعه, يعنى بياخد سير من بكرة الكرنك, ويشغل بيه الكمبروسر, فبياخد من العربية 10 حصان مثلا ويزود 100, وبيشتغل على طول مبيفصلش لأنه بيعتمد على الموتور وبيدور معاه, وله أنواع وتصميمات كتيرة صعب أقولهم كلهم. التربو بقى بيعتمد على غازات العادم فى تشغيله, يعنى بيتركب بعد الهيدرز(الفرن) بتاع العادم, غازات العادم بتدور مروحة بسرعة شديدة تصل الى 65000 لفة فى التربوهات العادية, والمروحة متصلة بمروحة تانية, فبتدورها وتخليها تسحب هوا وتضغطه وتدخله للموتور, عيبه أنه فيه حاجة أسمها لاج (lag) يعنى لو أنا شلت رجلى من على دواسة البنزين, غازات العادم هتقل والتربو ضغطه للهوا هيقل, أجى أدوس على الدواسة تانى التربو هياخد وقت على مايجمع وضغطه يزيد, ودى حاجة مش موجودة فى السوبر تشارجر لأنه متوصل بالموتور على طول وبيدور بسرعته. التربو اللى فى الصورة, غازات العادم بتدخل من فوق عند السهم الأرجوانى فى الشمال (engine exhaust), بتدور مروحة, وتخرج الغازات من الشمال عند السهم التانى الى باقى الشكمان . المروحة بتاعت العادم اللى على الشمال بتلف, وبتدور معاها المروحة اللى على اليمين , اللى بتسحب هواء بارد من عند السهم الأخضر الصغير, ونتيجة لسرعة دوران التربو فالهواء بينضغط ويخرج من فوق عند السهم الكبير الى الموتور (intake air). السوبر تشارجر نفس الحكاية, بس شيل النص الشمال كله وحط مكانه بكرة, و بيتوصل بيها سير من بكرة الكرنك علشان يدور الجهاز. وليه تصميمات تانية بس ده أشهرها, وكل تصميم منهم بيعتمد على أساس تانى لضغط الهواء. ولو عند حضرتك أستفسار تانى أنا موجود.

ألف ألف شكر , نورتم المحكمة

[Injection]

المشاركة الأصلية كتبت بواسطة alymonir بالمرة برضه إيه العلاقة بين القوة الحصانية عند عدد لفات معينة و العزم عند عدد لفات معينة ؟

المشاركة الأصلية كتبت بواسطة alymonir و ما الذي يجعل موتورين لهم نفس السعة اللترية و نفس الحصان و يخرجوا العزم عند عدد لفات مختلف ؟

العزم و القوة الحصانية عند عدد لفات معينة تجمعهم العلاقة التالية:-

القوة الحصانية=(العزم*عدد لفات الموتور)/5252

يعنى القوة الحصانية هتساوى العزم فى عدد اللفات والناتج يقسم على 5252, وممكن بمعرفة العزم أيجاد القوة والعكس.

ودى هى العلاقة عند عدد لفات معين

مع ملاحظة أن العزم فى المعادلة السابقة بالرطل لكل قدم وليس بالنيوتن لكل متر.

والأجابة على السؤال التانى هى لأن العوامل السابقة مش هى بس اللى بتأثر على الموتور, تكنولوجيا الموتور ومقاومة فتحات دخول الهواء وخروج العادم بتفرق كتير وطرق توصيل الوقود كربراتير ولا أنجكشن, سهولة فتح وغلق الصبابات وأهم حاجة عمود الكامة بتفاصيله, لأنه هو العامل الرئيسى فى تحديد مكان ظهور أكبر عزم وقوة للموتور.

والله يا انجيكشن بروفيسير من يومك تسلملنا ايدك يا جميل

[بدر بسيونى]

بوب ورئيس قسم والله مش لاقى حاجة اقولها بعد كلامك

[احمد بدر1978]

تسلم ايدك يانجكشن استاذ