|
#1
18-02-2012, 09:47 PM
|
||||
|
||||
تجربتي مع هوندا سيفيك 2001 واسعار قطع غيار 2001ل2005
بسم الله الرحمن الحيم
الاول انا عايز اقول ان مبسوط جدا اني اشتركت معكم في المنتدي الجامد ده , بصراحة كل ما اجي اعمل سيرش علي جوجل في حاجة بخصوص العربيات الاقي مصرموتورز فقلت اما ادخل اشوف ايه مصر موتورز اللي كل شوية يطلعلي في السيرش وقعدت اقراء مواضيع كتير وبصراحة استفدت منه كتييييير وان شاء الله ديما مصر موتورز في الصدارة المهم ندخل في المفيد عشان الناس متتخنقش مني هوندا سيفيك من 2001 لحد 2003 تختلف عن شكل 2004 وال2005 في شكل الفانوس الامامي والاكصدمات في 2005 يوجد بها عتب كان نفسي ارف الصور بس للاسف مش عارف ا لمحرك: سعته : 1.493 بقدرة 110 حصان و 4 سلندر 16 صباب و كامة علوية واحدة SOHC السطر ده منقول من موضوع الاستاذ mshamy طبعا الموضوع المثبت عن الهوندا سيفيك 2005 وافي بس انا هتكلم عن تجاربي مع العربية العربية كل الموجود في مصر ماتور 1500 فققط بس عايز اقول حاجة العربية بجد سحبها كويس جدا مثلا كنت بطلع من لانس بومة 1600 ومن كيا سيراتو ومن ماتريكس وبي ام دبانة 2002 وعربيات كتير الكلام ده بجد والله اصل انا كنت بفتري علي العربية شويتين لحد ما غيرت فتيس وزعلت المميزات عربية شكلها شبابي جدا وفي نفس الوقت ممكن تخلي شكلها وقور علي حسب اللي معاه العربية العربية مثلا لو ركبتلها جنط يبقي انت كده ظبطها علي الاخر ده بالنسبالي ودي اذواق سحب وتسارع ممتاز بس مثلا متروحش تشد مع مرسيدس او بي ام موديل السنة في العربيات اللي في نفس الفئة مش هتحرجك بالعكس هتشرفك عالية عن الارض وده حسب الجنط اللي مركبه نيجي للعفشة حدث ولا حرج ممممممتازة جدا مش ناشفة ومش طرية بس فيها ميزة مهمة انا عندي المساعين ضاربين وجلب مقصات عايزة تتغير وكلام كتير ومع ذلك عمري ما حد قالي انت العفشة عندك بايظة وبشاهدة واحد صاحبي معاه فيرنا قالي انت عافشتك وهي بايظة احسن من عفشتي وهيا جديدة مع احترامي للفيرنا طبعا لانها عربية كويسة ميزة كمان الاكصدمات طريييية جدا وده بيخلي اي خبطة بسيطة او جامدة شوية تتعدل لوحدها او تعدلها بايدك طبعا دي الاكصدمات الاصلي مش التيواني العيووووب : قطع غيارها :بالنسبة ليا انا شايف انها غالية ودي بتختلف من شخص للتاني فممكن البعض ميشوفهاش عيب انا هقول اللي انا فاكره ( ملحوظة الاسعار لقطع غيار استيراد من محلات في بورسعيد عشان انا من بورسعيد والجديد هذكر انه جديد) الفوانيس الامامية : استيراد 450جندي جديد تيواني 450 جندي بارده الفوانيس الخلفية نفس السعر وتايواني جديدة من 450 ل500 جنيه الاكصدمات :امامي مستعمل حوالي 800 وفي ناس كانت بتبيعه ب1000 حسب البياع وحسب الحالة ،جديد تايواني 350 بس ده كان سيء جدا خلفي : 1000 ، وملقتش منه جديد قواعد ماكينة : ودي في الغلب بتكون بايظة في المستعمل معرفش ليه يمكن من الحر القاعدة اللي في الصدر قدام بحولي 500 جنيه ، جديدو ب200 او 250 لو لقيتها جديدة ،قاعدة فتيس 350 استيراد قنطرة : بحولي 2000 او 3000 استيراد سير تاكيف : 100 او 150 مش فاكر صناعته كانت ايه العفشة: ودي اللي تزعلك المساعد جديد ب1000 او 1100 الواحد(مساعد فاضي من غير اي حاجة تانية ) ، استيراد الجوز من 1000 ل1200 ، من الاخر العقشة لو هتتغير تعمل حسابك فوق ال6000 او 7000 الفتيس الاوتوماتيك: 4000 وده انا احتجت اغيره وكان كل التجار متفقين علي السعر مع بعض يعني محدش بيرضي ينزل من تمنه ممكن ينزلوا 100 او 200 ملحوظة مهمة جدا الفتيس كان في منه حاجة اسمها فتيس عالي وفتيس واطي الفتيس العالي هو اللي ب4000 والواطي او اللي مكانه تحت بحوالي 2500 واللي فهمته ان الفتيس اللي فوق حجمه اكبر الفتيس المانيول بحوالي 2000جندي وعايز اقول حاجة مهمة العربية ديه تقريبا مفيش منها مانيول نادر جدا جدا ، واللي بيشتريها بيبقي عايزها اوتوماتيك عشان كده الموديل ده الاوتوماتيك اغلي وبيخلي العربية تتباع بسرعة الريداتير : استيراد ب1000 لحلوح بس ممكن تركب ريداتير تاني وتمشي امورك المرايات: المريات الكهربا الواحدة ب350 جنيه استيراد الماتور: من غير فتيس بحوالي 5000 ل6000 انت وشطارتك لما تشتري الكونترول بتاع العربية: 3000 غطاء قربة الميه : حتت غطا شبه غطا قزازة الحجاة الساقعة البلاستيك ب30 جنيه جديد وده كان ارخص حاجة اشتريتها في العربية تيل الفرامل : هنا اختلفت الاقاويل وسمعت حورات كتير في محل عندنا شغال هوندا بس حاجته نضيفه بس غالي حبتين قالي فيه واحد ب300 وفي 500 زي الاصلي والاصلي ب1000 وفي الاخر اشتريت المضروب ب140جنيه بس كان زي الفل مروحة الريداتير : ب350 ل500 استيراد الكارتيرات : استيراد الواحد ب200 وجديدة ب100 بس الاستيراد انضف بمراحل (لو نسيت حاجة فانا متاسف بس ده اللي انا فاكره دلوقتي ) نكمل العيوب :كنت قلتلكم ان الاكصدمات طرية جدا وده بيخلي اي خبطة حتي لو جامدة ترده بايدك ومبيخليش الاكصدام يتكسر بيخليه يطبق ويتفرد ، بس في هنا مشكله الكليبسات اللي بتمسك الكصدام والفتحات اللي الاكصدام بيتعلق منها او بيتركب في العربية علي طول بتتكسر من اقل خبطة فديما تلاقي في الموديل ده وبالذات الاكصدام اللي ورا من الجناب مفارق عن العربية اوو طالع لبرة شوية عيب كمان : انا عربيتي خليجي فيها ايرباج وناس اصصحابي معاهم نفس الموديل ، الايرباج مبيفتحش حتي لو دخلت تحت نقل انسي يا عمرو ، بس بعد كده عرفت ان شركت هوندا كان عندها مشكله في ان الايرباج من موديل 2000 لحد 2008 والمعلومة ديه قريتها بعد فضيحة الفرامل لشركة تويوتا وممكن اي حد من حضراتكم يبقي يتاكد من المعلومة ، بس انا بتكلم عن حدثة انا عنلتها وناس اعرفهم معاهم نفس الموديل وبرده الايرباج مفتحش معاهم عيب كمان:هو مش عيب اوي العربية مفهاش abs موجد فقط في الموديلات الللي بتكون تقفيل امريكانيفقط وشعار هوندا علي الدريكسيون بيكون معدن ، بس العربية اللي من غير abs فرملها كويسة جدا جدا طيب لو انت عايو تشتري الموديل طبعا انت هتكشف علي العربية كويس جدا عشان لو تحت ايد شاب زيي صدقني هتكره نفسك لو اشترتها المهم اهم حاجة تكشف علي الفتيس الاوتوماتيك كويس جدا بجهاز كشف الاعطال او بالطرق التقليدية بتاعتنا ، والعفشة اللي ممكن تدفعك  فلو العفشة بايظة اوي نزل في تمنها 10الاف جدنيه عشان انت هتدفع حوالي 8000 عشان العفشة ( من الاخر الفتيس والعفشة عشان غاليين شوية تتاكد انهم تمام وصيتك قبل ما تشتري العفشة مرة تانية )واي حد عنده استفسار عن اي حاجة انا في الخدمة وان شاء الله اقدر افيده 
|
|
#2
19-02-2012, 05:53 AM
|
||||
|
||||
رد: تجربتي مع هوندا سيفيك 2001 واسعار قطع غيار 2001ل2005
موضوع جميل ومعلومات قيمة تسلم ايدك ونورت مصر موتورز
|
|
#3
19-02-2012, 05:59 AM
|
||||
|
||||
|
رد: تجربتي مع هوندا سيفيك 2001 واسعار قطع غيار 2001ل2005
مصر موتورز منورة بناسها واعضائها والحمد لله في حد عبرني علي الموضوع بس انا فعلا اول مرة اكتب موضوع فممكن يكون الاسلوب ممل شوية ان شاء الله الموضع الجاي هحول يكون الاسلوب احسن
|
|
#4
19-02-2012, 03:01 PM
|
||||
|
||||
|
رد: تجربتي مع هوندا سيفيك 2001 واسعار قطع غيار 2001ل2005
تسلم يا أبو الشوق على كم المعلومات دي كلها
وبالنسبة للصور تقدر ترفع الصور إللي أنت عاوزها من هنا http://www.masr1.com/ أضغط هنا للوصول لموقع رفع الصور
|
|
#5
22-02-2012, 11:25 AM
|
||||
|
||||
رد: تجربتي مع هوندا سيفيك 2001 واسعار قطع غيار 2001ل2005
هحاول اقيم العربية ( سيفيك 2001 -2005)
هيكون التقيم ( مقبول، جيد ، جيد جدا امتياز ) هو ممكن يكون اسلوب الكتابة للموضوع ممل شوية وفيه غلاطات املاءية بس انا كنت اول مرة كنت اكتب موضوع المهم انا هحاول اخلي الموضوع ان شاء الله فيه كل حاجة عن الموديل ده الثبات : * العربية ثباتها (ممتاز) لحد سرعة 140 ك/س *فوق ال140 هنا في كلام تاني العربية علي 150 و 160 بتخف شوية ، بس مش بتكون ضايعة اوي نقدر نقول (جيد) طبعا انا ركبت هوندا موديل 1999 كان ثباتها افضل ، ممكن عشان ارتفعها عن الارض قليل بس ااتحكم في الطارة في موديل 2001ل2005 كان افضل من الموديل اللي قبله *سرعة 180 : جينا للجد للاسف الشديد العربية ثبتها مبيكونش كويس بتكون خفيفة اوي علي الطريق (اقل من مقبول) طبعا تقييمي لثبات العربية انا كونت فيه محايد وقولت كلام ممكن متسمعوش حتي من حد معاه العربية ، وممكن العربية اللي اشوفها مش ثابتة ناس تانية تشوفها ثابتة زي كان فيه حد بيتكلم ان الفيرنا ثابت لحد 190 ، بس انا سوقت عربيات تانية وعارف معني كلمة ثبات العربية الثبات اجملا نقدر نقول ( جيدجدا علي السرعات المتوسطة ) ،، ملاحظة الهوندا موديل (69-2000) ثباتها افضل ، انا بتكلم علي فرض ان العربيتين بدون اي تعديلات زي الجنط وخلافه صاج العربية: بصراحة انا مش عارف ليه الناس بتعتبر ان العربية اللي صاجها جامد اامن اكتر من العربية اللي صاجها ضعيف ، بالعكس ممكن العربية اللي صاجها جامد متكونش أأمن عشان مثلا مش هتمتص الصدمة ، ولو لحظنا العربيات الحديثة صاجها ضعيف ومع ذلك أأمن من العربيات القديمة اللي كانت صاجها جامد المهم صاج العربية انا شايف انه تقيل او جامد من ناحية الكبوت ، والشنطة والابواب (جيد جدا) رفارف العربية : صاجها ضعيف شوية بس مش ورق (جيد) العربية عموما صاجها تقيل وجامد المقصورة الداخلية : اول ما هتركب العربية هيلفت نظرك شكل عصاية الفتيس وديه عليها حلية نيكل بتلمع في موديل 2004 و2005 وشكل العددات في موديل (2001-2005)شكل عددات الاربي ام كبير يحسسك بعزم العربية وانت بتنقل وعداد السرعة اخره 240 بس عمرها ما بتجيبهم ونور العدادات برتقالي محمر واضحين وشكلهم صايع ، ( في 2005 العددات شكلها اختلف وبتنور نور ازرق وشكلهم صايع اووووي ) وان كانوا قريبين من الموديل السابق طابلوه العربية فيه مسافة بينه وبين الزجاج الامامي كبيرة الطابلوه بسيط ، وليا تعليق علي الطابلوه الخامة بتاعة الطابلوه رائعة عمرك ما هتشوف طابلوه مشقق او بايظ فيه اي حاجة حتي لو كانت بتتركن كل يوم في الشمس المساحة الداخلية : انا ركبت عربيات كتير بس فعلا العربية ديه واسعة جدا مثلا من الانسر البومة وان كانوا قريبن في الحجمة ، رجع الكراسي اللي قدام لاخر درجة هيكون في مساحة حلو للي قاعد ورا كراسي العربية : وديه الحقيقة مشكلة شوية ، الكراسي ناشفة شوية تحس انك قاعد علي كراسي خشب في قهوة بلدي ( مش للدرجادي اوي ) بس مثلا كراسي النيسان الصني 2009 والسيراتو تحس انهم اطري بكتير، بس اقولك حاجة في السفر لمسافات طويل عمري ما اشتكيت من قاعدة العربية ، ممكن عشان انا متعود علي العربية ، وممكن عشان انا لسه شاب الله اعلم ( رحابة المقصورة الداخلية ممتازة، شكل الطابلوه جيد ، العددات جيد جدا، الكراسي مقبول) شنطة العربية : واسسسسسعة ملعب كورة (ممتازة بالنسبة لنفس العربيات اللي في نفس الحجم) درجة تحمل العفشة : العفشة تعتبر حمالة اسية بمعني الكلمة ، مهما تحاول تبوظها مش هتعرف ، ولو عرفت مش هتأثر علي ثبات العربية ، والعفشة عموما في الموديل ده بتستحمل جدا وافضل من موديلات تانية كتير ، وحتي لما بتكون بايظة هتلاقيها احسن من كتير من عربيات اليومين دول نديها( امتياز) الشكل الخارجي : الشكل ده اذواق فمش هقيمه بس انا شايف انه جامد جدا بالذات الكوبيه وديه مش موجودة غير في بورسعيد فقط نمر منطقة حرة لو افتكرت حاجة هبقي اكتبها
|
 |
| الكلمات الدليلية |
| هوندا, هوندا سيفيك |
|
|
