حلقات (جريمة كل يوم) ألغاز بوليسيه مسلسلة

[د0تامر محمد]

الحلقة الخامسة
------------------
من سرق عوضين أبو مانجة؟
--------------------------------
عويضين ابو مانجة رجل ريفى طيب قدم الى القاهرة لتوريد حمولة من المانجو لتاجر جملة وبعد ان باع محصولة وقبض عشرة آلاف جنية وفى طريق عودتة لبلدته فوجىء بان النقود ليست معه فتوجه الى الشرطة للابلاغ عن ضياع ماله وامام العقيد دهب قال:
-أنا يا سعادة البيه بعد ما بعت المحصول واحنا راجعين الكفر00
الاسطى حمودة السريع وقف بينا عند قهوة على الطريق نشرب كوبايتين شاى وناكل لقمة على السريع00الفلوس كانت معايا بس مش عارف انا سبتها فى العربيه ولا نسيتها على الترابيزه فى القهوة00وما أكتشفتش ده الا وانا بركب العربيه بعد ما سبنا القهوه ولما رجعت بسرعة للقهوة سألت الواد القهوجى والزباين كلهم قالوا مشفناش حاجة
قال العقيد:
-يعنى مش فاكر خدتها فى ايدك ولا نسيتها فى العربية؟
-المصيبه انى مش فاكر 00اللى فاكره انها كانت جنبى على الكرسى ف العربيه
-طب بتشك فى مين؟
-ماهو يابيه يا أما حموده السواق او الواد القهوجى او الواد عتله الشيال وده كان نايم ف العربيه من ورا
وباستدعاء المشتبه فيهم وبسؤالهم
أجاب حمودة السريع:
-سعادتك انا جبت الحاج عوضين من الكفر فى الفجر وبعد مابعينا البضاعة واحنا راجعين كنت جعان ومصدع والراجل الجلدة لا كوبايه شاى ولا سندوتش ولا حاجه والحالة ضنك كان مشوار فقر وزبون قيحة
قال المقدم فضة:
-يعنى انت ما شفتش الفلوس معاه وانتوا فى القهوة
-الصراحة يابيه مخدتش بالى آخر مرة شفتها كانت فى أيده لما ركبنا العربيه بعد ما بعنا البضاعة
وبسؤال عتلة الشيّال قال:
-انا سعادتك كنت نايم ف العربية والاسطى جه صحانى عشان اروح آكل كشرى واشرب شاى لكن انا كنت تعبان جدا وكملت نوم ولا شفت فلوس ولا غيره
قال العقيد:
-يعنى منزلتش من العربيه خالص
-ابدا سعادتك00انا كنت تعبان عل الآخر مقدرتش اقوم مع انى كنت جعان
وبسؤال رضا بنه القهوجى قال:
-سعادتك هما طلبوا اتنين شاى وبعد شويه الراجل السواق طلب منى اى حاجه ياكلها وبعدين ادانى ورقه بخمسين ومكنش معايا فكه فقال للراجل بلدينا يدفع الحساب وكان بيفاصل فى الحساب جبت له سندوتشات فول وطعميه وطبق كشرى
وحضرتك انا لا شفت فلوس ولا دياله وبعدين لو لقيت حاجه كنت سبتها أمانه لحد مايسال عليها صاحبها
قال المقدم:
-يعنى انت مشفتش الشنطه
-ابدا سعادتك00ربنا يكفينا شر الحرام
التفت العقيد لمساعدة:
-ايه رأيك؟
-أظن سعادتك انه0000000

الى اللقاء مع الحلقة القادمة
مع تحيات العقيد دهب والمقدم فضة ولغز جديد

[sh_masry]

يا ترى هل هو حموده السريع ؟؟؟

لأنه فى التحقيق بيقول (واحنا راجعين كنت جعان ومصدع والراجل الجلدة لا كوبايه شاى ولا سندوتش ولا حاجه والحالة ضنك كان مشوار فقر وزبون قيحة)
يعنى معناها ماكنش معاه فلوس اساسا !!!!! طب كان عايز يحاسب ازاى على المشاريب و بورقه بخمسين و ماعوش فكه كمان ؟؟؟ (وبعد شويه الراجل السواق طلب منى اى حاجه ياكلها وبعدين ادانى ورقه بخمسين ومكنش معايا فكه فقال للراجل بلدينا يدفع الحساب وكان بيفاصل فى الحساب جبت له سندوتشات فول وطعميه وطبق كشرى)

[د0تامر محمد]

حل الحلقة الخامسة
****************
*السارق عتلة الشيال
قال انه كمل نوم وبعدين ذكر اكل الكشرى والاسطى قاله نأكل دون تحديد نوعيه الطعام
استغل فترة وجودهم بالمقهى وسرق الفلوس

[sh_masry]

المشاركة الأصلية كتبت بواسطة د0تامر محمد حل الحلقة الخامسة **************** *السارق عتلة الشيال قال انه كمل نوم وبعدين ذكر اكل الكشرى والاسطى قاله نأكل دون تحديد نوعيه الطعام استغل فترة وجودهم بالمقهى وسرق الفلوس

طيب اذا كان السواق ما قالش هو هياكل ايه ..... طب عتله الشيال عرف منين انه كشرى طالما صحى من النوم و خد الفلوس و نام تانى ,,,,, ما هو كده كده مارحش قعد على القهوه و ماكلش معاهم ؟؟؟

[د0تامر محمد]

المشاركة الأصلية كتبت بواسطة sh_masry طيب اذا كان السواق ما قالش هو هياكل ايه ..... طب عتله الشيال عرف منين انه كشرى طالما صحى من النوم و خد الفلوس و نام تانى ,,,,, ما هو كده كده مارحش قعد على القهوه و ماكلش معاهم ؟؟؟

العربية كانت مركونه قدام القهوة على البعد يعنى من مكانه يشوف هما بياكلوا ايه