نويت انزل اشتري فيرنا 2013 تنصحوا بأيه وهل هي 1500 ولا 1600؟

[lawyer9]

المشاركة الأصلية كتبت بواسطة the necromancer السلام عليكم بعد صراع طويل جدا مع عربيتي ال 127 لحد ما خلاص جبت اخري زحلقتها ونزلت اجرب حظي مع سوق المستعمل واجيب حاجه انضف شويه بقالي 3 شهور بلف حوالين نفسي شوفت جميع انواع العربيات واغلبه زي الزفت هتصرف عليه ضعف تمنه والنضيف شويه صاحبه بيتأمر وبيبع بالغالي كأن مفيش اخوه فأستقريت اخيرا والحمدلله اني اجيب فيرنا زيرو كامله منوال واريح دماغي وابقى في السليم فاياريت لو فيه حاجه معينه تحبوا تنصحوني بيها او اخلي بالي منها وانا بشتري يبقى كتر خيركم وايه موضوع السي سي ده 1500 غير 1600 ولا الاتنين حاجه وحدة وبتتكتب كده ولا ايه وانهو الافضل وهل فيه اختلاف في السعر؟ وياريت لو حد يعرف اشتري منين في اسكندرية ويبقى اسعاره حلوه ويخلص الموضوع بسرعه ميلطعنيش صحيح هو فيه مدة انتظار معينه ولا بستلم العربيه على طول ؟ وايه نظام الاجراءات معليش اخوكم غشيم ولسه اول مره اشتري واتعامل مع عربيات نضيفه بالنسبه للكاررو اللي كانت معايا :D متشكر واسف على الاطاله

بسم الله الرحمن الرحيم
بص يا أستاذى معلش كلامى مش هتحس بيه دلوقتى لكن لازم اقولهولك
الفيرنا بعد ال 27 صعب جدا وهتتعب وخصوصا لو فيرنا زيرو .. مش عارف اوصلهالك ازاى بس انا عاصرت التعب دا بس مكنتشى زيرو .. أنا جبت بعد الفيات فيرنا 2008 وتانى يوم عملتلها اعلان بيع على النت مش مشكلة العربيه قد بقدر ما كانت مشكلتى انا .. الفيات عربيه خشنه جدا بالنسبه للفيرنا وبالتالى انتا بتتعود على التعامل مع العربيه بخشونه .. وهنا بتبدأ مشكلة انك مبتعرفشى امتى تدى غيارات وبالتالى الموتور هيتأثر .. كمان الفرق الكبير جدا بين متانة الصاج فى ال27 وبين الفيرنا بحكم تعودك على متانة ال27 هتلاقى كل شويه خدش فى الفيرنا يزعل خصوصا لو العربيه مرشتش بيزعل أوى وممكن متعرفشى سببه ايه .. كمان فيه مشكله تانيه ال27 عاليه وبتحمل فيها بسم الله ما شاء الله حمار شغل أما الفيرنا فى المطبات العاليه لازم تحاسب وتحاسب اوى حتى لو فاضى وخصوصا لو معاك ركاب .. فيه مقوله واحد قالها على الفيرنا بيقولك لو حطيت منديل كلينكس على الكنبه إلى ورا العربيه بتنزل وبتحك فى المطبات .. بس ما علينا من كل دا هتتعود بس إلى كنت عاوز اقولهولك من كل دا ان بلاش من الاول تجبها مرشتش بره دى نصيحتى .

بالنسبه للسى سى فدة بيحددلك استهلاك البنزين يعنى 1600 بيستهلك اكتر شويه لكن افضل فى حجات كتير منها التسارع وقدرة الموتور أفضل كمان لما بتشغل التكييف بيبقى الموتور مستقر اكتر ومستريح .

بالنسبه لموضوع البنزين فيه ناس بتحطلها بنزين 80 لكن تجربتى معاه كانت صعبه جدا والعربيه بتسقف وكأنى راكب عربيه من بتوع الجيش الواز الهندى دا لو تعرفه .. كمان الموتور مصمم على سرعة احتراق البنزين 92 لانه أسرع فى الاحتراق .

مش معنى كلامى دا ان العربيه وحشه او انك تتعقد منها قولتلك انى كان معايا 2008 رشه بره حزام ودا ساعدنى انى أتأقلم معاها لمدة ولما اتعودت على العربيه بعتها وجبت ال 2012 مرشتش لأنى لقيتها أفضل سيارة فى فئتها السعريه وكمان قطع غيارها الرخيصه كمان العربيه موتور وعافشه بيستحملوا شغل شاق .. إلى فى مستواها أتنين لوجان بس قطع غيارها غاليه وإسبرانزا 516 بس قطع غيارها غاليه نسبيا كمان حكاية الصينى دى عامله للشعب المصرى عقدة فإستبعدتها
كمان فيه نس شكروا فى الbyd الصينى وقالوا موتورها متسوبيشى وعفشتها تويوتا بس حسيت انى هحتاس راكب متسوبيشى ولى تويوتا وصينى بردوا يعنى سمك لبن تمر هندى ..
أما بالنسبه للبيع بعد كدا هتلاقى الفيرنا والإسبرنزا 516 بيحتفظوا بسعرهم بل ممكن تكسب فيهم بعد الركوب كمان .. والفيرنا أكتر شويه من الاسبرنزا .. أما بقية الانواع فبينزل سعرها جامد جدا عند إعادة البيع ..

بالنسبه لإجراءات الزيروا والاماكن للأسف مش هقدر أفيدك
بالمناسبه نسيت اقولك الفيرنا الكورى لغاية 2004 كورى بعد كدا فيرنا غبور تقفيل مصرى وفى كل الاحوال متنزلشى فى الشراء لو هتسمع كلامى وتجبها رشه مبدئيا عن موديل 2010 وشوف عدد الكيلوهات فى العداد عشان العربيه بعد زمن من التصنيع او عدد من الكيلوهات المقطوعه بتكون نهجت وإلى بيشتريها بيشيل الليله فى التصليح لكل إلى ركبوها قبله
يا رب أكون نقلتلك كل تجربتى وأفدتك وربنا يوفقك .