تجربتى على سرعة 200على طريق الساحل بعربيتى الفيرنا

[islamox]

اولا : السلام عليكم
وكل سنة واعضاء مصر موتورز طيبين بمناسبة عيد الفطر

انا بصراحة من هواة السرعة العاليه لكن فى نفس الوقت حريص يعنى بجرى لما يبقى الطريق مساعد وبصراحة اكتر انا هديت من حبى للسرعات العاليه من ساعة لما اتجوزت وخلفت
انا معايا فيرنا 2008 الحمد لله بحبها جدا لانها مش مزعلانى فى حاجة انا مركب جنط 13
المهم السنادى طلعت مطروح وفى رحلة الذهاب وصلت فى 5 ساعات لانى كنت ماشى براحتى خالص لانى بحب اتفرج على معالم الطريق وهيا بظبط على العداد من الدائرى عند نفق الزراعى لحد مطروح نفسها (وسط البلد ) بظبط 450 كيلو عن طريق وصلة وادى النطرون اللى بناخدها من بعد الماستر اللى على الصحراوى
المهم آخر يوم ليا هناك بالليل غسلت العربية وشيكت على الكاوتش وعلى المياه (انا بحط مياه خضراء ABRO) وكانت المياه مظبوطة عند علامة الF وكل حاجة كانت ميه ميه
توكلت على الله الساعة 7 اصبح المهم برضوا كنت ماشى براحتى لحد لما وصلت وصلت وادى النطرون حوالى الساعة 9 صباحا والشمس ابتديت تسخن الاسفلت بس بصراحة الجو فى العربية مكنش محتاج تكييف
لقيت نفسى على الطريق لوحدى واللى كان جاى فى المقابل كان كتير بس فى الوصلة دى بذات محدش بيقف لحد اطلاقا لانها صحراء جرداء (اسفلت ورمل بس)
المهم كان معايا مراتى وابنى وكانو نايميين قلت ادوس شوية ومكنش معايا فعلا حد على الطريق لقيت نفسى جايب 190 ولما بيبقى فى منحدر بتعدى ال 200 المهم الكاميرا كانت جمبى قلت اصورها واللى حصل انى وانا بصورها لمحت عداد الحرارة ولقيته فى الاحمر وانا هرفعلكوا الصورة دى عشان تشوفوها
طبعا اتمرهمت واول حاجة جت فى دماغى كانت مراتى وابنى علشان العربية لو حصلها حاجة محدش هيقفلى هنا ابدا المهم اول لما لمحت الحرارة كده قمت ممور العربية وسبتها تقف براحتها خالص واول لما شلت رجلى من على البنزين مؤشر الحرارة ابتدا ينزل قلت الحمد لله وبعد لما العربية وقفت نزلت فتحت الكبوت لقيت قربة المياه فاضية تماما المهم بطلت العربية وسبتها تهدا شوية وبعدين دورتها وابتديت اكملها مياه وبقيت اهز القربة الاقى الميه بتقل قلت يبقى دورة المياه فيها تسريب المهم نزلت تحت العربية لقيت مفيش نقطة مياه بتنزل وفضلت ازود المياه واشمشم فى الموتور على اساس انى الاقى ريحة شياط ولا حاجة وبعدين فتحت الزيت وكملت ربع كيلو زيت(شل الاصفر) لكى يطمأن قلبى وفضلت اسمع الموتور لكن الحمد لله مكنش فى اى صوت غريب فى العربية
المهم سميت الله وابتديت امشى تانى الاقى المؤشر بيعلى تانى قمت واقف وشفت المياه تانى لقيتها فضيت كانت المياه الابرو خلصت (كان نص جركن) المهم كان معايا مياه معدنية كملتها وكملت الطريق على سرعة 80 والمؤشر ظبط لحد لما وصلت وعرفت ان الرادياتير مش مظبوط وعايز يسلك بس الحمد لله الموتور محصلوش حاجة
لما وصلت معرفتش انام لحد لما روحت للمياكنيكى بتاعى وشاف الرادياتير قاالى انمه سليم ومتسلك وميه ميه
المهم استخلصت من التجربة دى ان مهما كان السرعات العالية بيبقى تحميل عالى جدا جدا على الموتور فممكن يسخن بسهولة خاصة ان سرعة 200 دى سرعة كارثية جدا
بس عايز اقول ان الفيرنا لما بتبقى محملة وفيها جنط بتبقى فى الجرى رهوان بجد

[Marlborooo]

يا قلبك ماشي 200كم بعربية فيرنا وطلعت الموبيل عشان تصور
يا عم انا لما بيكون اهلي معايا بمشي 120 واخري 140 لو الطريق فااااضي اوي

الحمد لله ان ربنا ستر والحمد لله علي رجوعك بالسلامة

ومتعملش كده تاني:Wkis s5:

[midohema]

بلاش السرعات العالية فى الفيرنا ... و ربنا يستر طريقك و طريقنا

[dr_eslam_66]

علي فكرة انتا قلبك ميت.انا لو زيدت عن ال ١٨٠ والله مهما كانت نوع العربية لو ايه حتي لايمكن ارمش بس كدة بعيد عن الطريق مش اصور.
ربنا يكفينا ويكفيك شر الطريق.

[mahmoudeka]

الحمد لله على سلامتك انت والعيلة والعربية كمان بس عايز اعرف سبب السخونة الشديدة دى ايه ؟