مياه الرادياتير دخلت على الفتيس

[harphosh]

صباح الخير للجميع
السيارة أوبل فيكترا 2000 سىسى موديل 97 أتوماتيك
أول أمس كنت فاكك الاكصدام علشان خراطيم الباور بتاعة الأوبل فيكترا عايزة تتغير ، وبعد اتمام عملي تغيير لقطعتين صغيرتين من الخراطيم قلت أفك الرادياتير وأنضفه من الزيت الموجود عليه من الباور .
تم فك الرادياتير وتنظيفه جيداً وبعد كدة تم التركيب والفاجعة الكبرى عند وضع مياه فى قربة الميه لحين وضع سائل تبريد ولكن بشكل مؤقت .
جركن فى التانى وده غريب عمالة تاخد فى مية وأنا مش مركز وهوب لمعت الفكرة فى دماغى قلت أشوف زيت الماكينة جايز وش سلندر ، كشفت على زيت الماكينة طلع تمام ؟؟ أمال المية دى بتروح فين ؟؟؟ إفتكرت إن تبريد الفتيس على الرادياتير قلت شوف زيت الفتيس . وكانت الفاجعة طلعت المقاس لقيت مية مع الزيت .
قلت ما بدهاش طار الرادياتير وقلت اجيب واحد استيراد واتصلت بواحد صديقى أسأل ألاقيه فين فى الوقت المتأخر ده وكانت معلومة جديدة قالهالى إنه بيتصلح ورحنا لمحترف رادياتير فى حلوان إسمه جمال فى شارع صالح صبحى وبالفعل .
غير علبة الرادياتير الموجودة ناحية السواق وقفلها تانى مفيش مشاكل .
بصراحة راجل محترم بس سعر غالى شوية . المهم ركبت كل حاجة وقفلت السيارة وغيرت طبعاً زيت الفتيس وقلت أجرب الغيارات كل شئ تمام والحمد لله وحركة السيارة طبيعية جداً إلا أن هناك مشكلة بسيطة إن الفتيس لم يكون على وضع الغيار رقم (1) لمبة عطل الفتيس تضئ رغم إن السيارة بتتحرك طبيعى على الغيار دة ولكن لو رجعتها بعد ما تضئ اللمبة لوضع D السيارة سحبها بيكون ضعيف .
أبطل العربية وأدورها تانى كل شئ يبقى تمام والسيارة تتحرك عادى .
هل ممكن إفادتى بمعرفة العطل ومين يمكن إصلاحه ؟؟
معلش طولت عليكم بس قلت أسرد الموضوع بالتفصيل للإفادة من التجربة للجميع . مع خالص تحياتى

[Injection]

بصراحة حاجة مستفزة وتزعل, ممكن يكون عيب فى دورة تبريد الفتيس وياريت حضرتك تكشف على الفتيس عند ميكانيكى محترم, أحسن من تمن فتيس جديد لاقدر الله وكويس أنك أكتشفت العيب بدرى بدرى, مع تغيير زيت الفتيس فى أقرب فرصة.

[harphosh]

المشاركة الأصلية كتبت بواسطة Injection بصراحة حاجة مستفزة وتزعل, ممكن يكون عيب فى دورة تبريد الفتيس وياريت حضرتك تكشف على الفتيس عند ميكانيكى محترم, أحسن من تمن فتيس جديد لاقدر الله وكويس أنك أكتشفت العيب بدرى بدرى, مع تغيير زيت الفتيس فى أقرب فرصة.

هل فيه حد معيت ترشحه للكشف عنده ، مع وافر شكرى .

[Injection]

بصراحة معرفش حد بيفهم كويس فى الفتيس الأوتوماتيك, ياريت حضرتك تروح مركز خدمة معتمد لأوبل يكشفوا عليها أحسن علشان نعرف العطل جاى منين بالظبط وتكلفة الكشف مش هتكون غالية.
وممكن حضرتك تستنى رد أحد الأعضاء الأخرين.
وأرجو أن أكون قد أفدتك.

[hazem_khidr]

افتح الكونتاكت و اقفله و بعدين شيل المفتاح
و بعدين شيل كابل البطاريه و وصله تاني
و بعدين شغل اعربيه و شوف حيحصل ايه
دي الطريقه علشان تعمل ريستارت للعربيه
و لما تعمل كده كمان افتح الزجاج الامامي للاخر و اقفله تلات مرات علشان تشغل ماكينات الرفع كمان