هام وبعد التجربة: طريقة ضبط حساسية جهاز الإنذار

[melsheshtawy]

إخوانى الأعزاء
إسمحولى بأول موضوع ليا أحاول أتكلم فى موضوع معقد شوية وهو طريقة ضبط حساسية جهاز الإنذار .. وطبعا أنا مكتبتش الموضوع غير لما جربت وإن كان ليا بعض الملاحظات هذكرها فى آخر الموضوع
فى البداية أنا هشرح إللى عملته بشكل أقرب إلى اللغة العامية عشان يكون واضح للجميع وبعيدا عن الترجمة الحرفية للكتالوج إللى كتير مننا مكنش فاهمها
نبدأ بسم الله
الخطوة الأولى : بعد ما حضرتك تفتح السيارة تدخل جواها وتقفل الأبواب وتحتفظ بالمفتاح فى إيدك (برة الكونتاكت) ومن الأفضل عمليا فى الوقت ده فصل الريموت عن المفتاح لو هم فى ميدالية واحدة ولاحظ لمبة الإنذار الموجودة فى التابلوه هتلاقيها بتنور وتطفى بسرعة

الخطوة التانية : دلوقتى حضرتك جوه العربية والمفتاح فى إيدك تنتظر حتى تدخل العربية فى وضع مانع السرقة (وهو حوالى 30 ثانية) بالمناسبة أثناء الوقت ده لو فتحت الباب إشارات الإنتظار هتشتغل لكن متحاولش تفتح الباب دلوقتى وعشان تتأكد إن السيارة فى وضع مانع السرقة هتلاقى نور الإنتظار نور مرة واحده وطفى واللمبة الحمراء إللى فى التابلوة بتاعت الإنذار (إللى فوق زرار المرايات) بدأت تنور وتطفى ببطء

الخطوة الثالثة : بعد ما ينور الإنتظار ويطفى مرة واحده ضع المفتاح فى الكونتاكت هتلاقى نور الإنتظار بدأ ينور ويطفى بشكل مستمر أثناء ذلك قم بفتح الباب وغلقة مرتين ثم إبدا فى فتح الكونتاكت على الوضع On أو بمعنى آخر لحد ما العدادات تنور ثم قم بإطفاؤة (الرجوع هنا هيكون لحد الوضع ACC لا تضغط على المفتاح وتحاول توصيه إلى lock قم بذلك 3 مرات فتح ثم غلق ثم فتح ثم غلق ثم فتح ثم غلق)

الخطوة الرابعة : بعد إتمام الخطوة الثالثة بشكل صحيح لاحظ اللمبة الحمراء بتاعت الإنذار هتلاقيها منورة بشكا ثابت (مش بتنور وتطفى) وهنا تكون السيارة مستعدة للبرمجة (تعديل الوظائف الإختيارية)

الخطوة الخامسة : بما إننا هنا بنتكلم عن حساسية جهاز الإنذار يبقى هختصر الجدول الموجود فى الكتالوج وندخل على موضوعنا وهو كما ورد بالكتالوج 8 ضغطات على زرار Lock ولاحظ إن فى كل دوسة العربية هتزمر معاك مرة وأحيانا مرتين بعد ما توصل للضغطة رقم 8 كده إنت هتبدأ تعدل فى الحساسية

الخطوة السادسة : ركزوا معايا فى الخطوة دى بقى إفتح الباب وإقفلة هتلاقى العربية زمرت مرة إفتح وأقفل هتلاقيها زمرت مرتين إفتح وإقفل هتلاقيها زمرت 3 والمرة الأخيرة هتزمر 4 مرات ودول الأربع حساسيات بتوع جهاز الإنذار (كل حساسية بيعبر عنها بعدد الزمارات)

الخطوة السابعة : لتثبيت أى حساسية أترك السيارة لمده 30 ثانية هتلاقيها إشتغلت جهاز الإنذار أو هات المفتاح على الوضع On برده هتلاقى الإنذار إشتغل

ملحوظة هامة : الدوس على زرار Lock أقل من العدد 8 سوف يؤدى إلى تعديل خصائص أخرى للسيارة (يرجى مراجعة الكتالوج فى هذا الشأن) لذلك تأكد من كل دوسة بسماع صوت الزمارة

فى النهاية أرجو أكون قدمت حاجة مفيده فى أول موضوع ليا أو على الأقل ساعدت فى فهم بعض طلاسم الكتالوج وللعلم أنا بردة جربت ده على سبيل العلم بالشئ ورجعت العربية تانى على الحساسية الرابعة عشان زى ما حضراتكوا عارفين فى بلدنا الأطفال أحيانا بيبقى مزاجهم اللعب فى العربيات إللى بتذمر لكن أنا حبيت أعرف التجربة عشان لو رحت مكان مش آمن أو حاجة أقدر أضبط الحساسية وأولا وأخيرا ربنا هو الحارس وإحنا بس بناخد بالأسباب

كنت هنسى ... إللى يحاول يجرب ميغلطش غلطتى ويسيب أى زجاج مفتح عشان أنا خلصت الموضوع وطلعت عرقان جدا جدا من الحر داخل السيارة

[ahmed hammad]

بصراحة مجهود ممتاز تشكر عليه انا هجرب وهقول علي اللي حصل شكرا شكرا شكرا

[mhamdy75]

جزاك الله خيراً

وتم التثبيت

[eng/walaaeldeen]

السلام عليكم
الله يعطيك العافيه معلومات مفيده
والله المستعان

[ahmed hammad]

الأخ الكريم لقد قمت بتنفيذ خطواتك كلها ولكني وجدت الآتي:
1- بعد تنفيذ الخطوة الثالثة لم أجد اللمبة الحمراء ضوئها ثابت ولكن تنور وتطفي.
2- نفذت باقي الخطوات باستخدام الريموت يعني بعمل lock من الريموت وقمت بفتح الباب مرة واحدة وثبت علي كدة زي ما حضرت قولت.
3- عند محاولة فتحي الباب بدون اي مفتاح أو ريموت لا اسمع صوت الانذار ولكن عن فتحي الباب بالمفتاح ثم افتح الباب اجد صوت السرينة اشتغل ولا يقف حتي اضغط علي unlock من الريموت أيضا والسرينة شغالة حاولت اشغل العربية مستجابتش للتشغيل لغاية م صوت السرينة وقفته من unlock
4- يا ريت تقولي ايه الغلط اللي وقعت انا فيه أو الخطوة اللي نسيتها انا نت عايز اخلي الانذار يشتغل بمجرد ان اي حد يفتح الباب من غير مفتاح السرينة تشتغل واسف علي الاطالة