سافرت السعودية ودايخ علي عربية

[TELEBK]

السلام عليكم ورحمة الله وبركاته
بأكلمكم النهاردة من السعودية بعد ماسافرت أنا والأسرة ورحت منطقة إسمها جازان علي حدود اليمن ، المهم البلد ديه من أغلي مدن السعودية في كل حاجة السكن والعربيات وكل حاجة .
المهم مشكلة المشاكل وإللي مقابلاني هيه المواصلات ، هنا فيه تاكسيات وعربيات ملاكي وسيلة التوصيل الوحيدة ، وشغلي بعيد حوالي 30 كم من السكن ، وطبعا مدرسة البنات والمشاوير آخر النهار ، وظهرت مشكلة الإنتقالات وساعات بأصرف في اليوم فوق ال 40 ريال وأحيانا 50 ريال ، يعني 5 ريال في عشرة ريال وهكذا ، ولقيت نفسي محتاج لعربية ضروري .
وإستخرت ربنا ورحت إستبدلت رخصتي المصرية برخصة سعودية بعد ما عملت إختبار تحديد مستوي ، وبعدين محاضرة نظري لمدة ساعتين ونص ، وبعدين إختبار قيادة " وده من أرخم الإختبارت " والحمد لله عديت فيه ، وبعدين إختبار الكمبيوتر والحمد لله برضة عديت فيه وأخدت الرخصة .
قلت الحمد لله أدور بقي علي عربية حتي ولو بالسلف " يعني الواحد لسة مسافر ومقبضتش والحالة ضنك " ، بس غصب عني قلت أتصرف وأشوف عربية ، وسألت علي مكان بيعها قالوا ليه فيه حاجة إسمها " حراج السيارات " ، ركبت يوم الجمعة إللي فاتت ورحته بعد العصر علي طول ، ودخلت حته فاضية فيها شوية عربيات وواحد يمني ماسك ميكروفون وشوية وظهرت بشاير العربيات والناس أصحابها جاية تبيعها ، وبدأت فصول مسرحية مضحكة جدا جدا في البيع ، كل واحد جاي بعربية يعرضها مش مكلف نفسة حتي يغسلها لأ والمصيبة يقعد يقولي العربية مية مية وجميلة وممتازه ، وبتسافر ويحسسك إنه بيبيع سفينة فضاء أو صاروخ يعني إختراع عمري ماشفته ولا ركبته حسسني أكني كنت جاي من مصر وراكب فيها جمل .
والله العظيم العربية من جوه الصالون بتاعها آسف كأنه طالع من صفيحة زباله ، علب كانز ، وورق مقطع ومناديل وإكياس نايلون ، ورمل وتراب في الأرضية ، ده غير منظر الفرش إللي مقطع وإللي مبقع ، وكله كوم وساعات تلاقي حتت مكسورة في التابلوه ، المهم طيب أبص علي الماتور أفتح الكبوت ألاقي العربية غرقانة في الزيت ولما أقوله عليه يبص ويشوفة كأنه بيشوفة لأول مره ، ده غير حالة البادي بتاعها المخبوطة وإللي فوانيسها مكسرة ومش ملكفين نفسهم يصلحوها ، ده كوم وعداد العربية كوم تاني .
هما هنا بيعشقوا التويوتا بكل أنواعها ، لقيت عربية إسمها كارسيدا موديل 94 بأبص علي العداد لقيته عامل 700 الف كم ، وواحدة تانية موديل 93 عاملة 500 ألف كم ، يانهار أسود كل دة ويطلب 17 الف ريال ، لأ والفرسة يتكلم وهوه قاعد وحاطط رجل علي رجل جوه العربية ، ده غير العربيات الكورلا موديل 2000 وإنت طالع كله عامل في العداد فوق ال 150 الف كم ، وأسعار ضاربة في العلالي ، دول علي كده لو جم مصر يتوهموا من شكل ونظافة العربيات فيها ومحدش بيرضي ينزل عن السعر خالص .
فضلت ألف لمدة ساعتين لحد ماجاتلي قرفة نفس ورجعت تاني والناس مبتشتريش حاجة قليل قوي المعروض كويس وبحالة كويسة لكن غالي جدا ، ومش عارف أعمل إيه والمواصلات هنا صعبة والمعروض قليل أوي والأسعار ضاربة في العلالي أوي أوي .
إدعولي ألاقي عربية كويسة وبنت حلال ومكنتها كويسة لإن هنا الصنايعية عباقرة ونظام التصليح عبارة عن تلصيم وخلاص وخصوصا الصنايعية المصريين ، علي لسان كل إللي أسأله يقولي كل مايروح يغير حاجة يلاقي حاجة تانية ظهرت بعدها بيومين .
ونظام القسط هنا غبي جدا ، يعني روحت سألت آخر مازهقت في البنك قالوا ليه ممكن آخد قرض أو أشتري عربية بالتقسيط بعد مرور سنه علي وجودي في البلد ، والحمد لله ياريت تدعولي ربنا يكرمني بحاجة كويسة .

[د.كمال]

الغربه صعبه وقلوبنا معاك ياطلب .....ربنا يسهلك الامور يارب

[أدهم صبرى]

ربنا يوفقك وتلاقى عربيه كويسه.
بالنسبه للعربيات اللى عدادها كبير فى السعوديه ده عادى جداً وحاجه ماتخوفش لإن السعوديه بلد كبيره والمدن بعيده عن بعضها وممكن الواحد السعودى يسافر يومياً 700 كيلو وكمان الطرق هناك مصمم على المواصفات الأوروبيه والأمريكيه يعنى مفيش مطبات تبهدل العفشه وتتعب العربيه.
لو عرفت تشترى عربيه جديده يبقى أحسن.

[TELEBK]

المشاركة الأصلية كتبت بواسطة د.كمال الغربه صعبه وقلوبنا معاك ياطلب .....ربنا يسهلك الامور يارب

يارب إن شاء الله وربنا يعدلها عن قريب ، ومتشكر لمرورك الكريم

[TELEBK]

المشاركة الأصلية كتبت بواسطة أدهم صبرى ربنا يوفقك وتلاقى عربيه كويسه. بالنسبه للعربيات اللى عدادها كبير فى السعوديه ده عادى جداً وحاجه ماتخوفش لإن السعوديه بلد كبيره والمدن بعيده عن بعضها وممكن الواحد السعودى يسافر يومياً 700 كيلو وكمان الطرق هناك مصمم على المواصفات الأوروبيه والأمريكيه يعنى مفيش مطبات تبهدل العفشه وتتعب العربيه. لو عرفت تشترى عربيه جديده يبقى أحسن.

الجديد هنا مشكلة وخصوصا بالنسبة لشخص جاي جديد ، ولسة مكملش فتره طويلة ، وبعدين بتفرق إنت عايز تنزل العربية معاك مصر ولا لأ ، لكن ربنا يسهل إن شاء الله وأديني موصي ناس كتير تشوف ليه حاجة كويسة بإذن الله .