تقرير عن لوجان 2015 بعد 12000 كيلو

[vetifa]

انا باكتب الموضوع دة عشان الناس اللي عايزة تعرف أداء العربية بعد فترة استخدام مناسبة
عدد الكيلوات:12000
تاريخ الشراء: 5-2015

العيوب:
1- التكييف ضعيف... في شهر 8 لما كانت الحرارة بتوصل 40 كنت لازم اشغله علي 3 عشان احس اني مستريح.... لو فيه حد راكب في الكنبة اللي ورا مش هايحس بالتكييف خالص.
2-السحب بيتأثر بالتكييف بس لما اكون مشغله علي 3.
3- استهلاك البنزين عالي نسبيا لو مشاوريك جوة البلد زيي...انما لو برة المدينة كويس.... يعني انا روحت الساحل عملت 250 كيلو تقريبا ب 20 ليتر بنزين.
4-الباور بتاع الدريكسيون تقيل نسبيا.... يعني مقارنة بالعربيات اللي في نفس الفئة.... انما مش مشكلة جامدة... انا باحس بيه بس وانا طالع من الركنة.
5-صوت الموتور عالي سنة..... وبيعلي جدا لما السرعة تعدي 130.
كان عالي قبل 3000 كيلو انما دلوقتي احسن كتير.
6- الاتزان مش تمام اوي ... اعتقد نتيجة لعلو العربية.

المميزات:
1- العفشة كويسة جدا.....انا باروح اماكن مش متسفلتة كويس وانا سواقتي مش مثالية وباجري وخدت بيها حفر ومطبات كتير والحمد لله مش سامع اصوات غريبة.
العربية قعدتها مريحة وواسعة جدا من جوة والشنطة كبيرة .
2-عالية....عمرها ماحكت في مطب.
3-عضمها ناشف.... عربية النترا قديمة دخلت فيا من ورا.... يادوب بس الاكصدام بتاعي طلع من مكانه ورجعته في ساعتها في حين ان كبوت عربيته اطبق.
4- الفرامل كويسة.... في كذا موقف اثبت جدارة و الحمد لله عمرها ماخذلتني.

في المجمل العربية كويسة جدا بالنسبة لسعرها... وكنت هاشتريها تاني لو الزمن رجع.

[turbom]

مشكور علي التقرير