الـحـل للـمـيـكـروبـاصـات و الـتـاكـسـيات و الـتـكـاتـك

[YahiaAshraf]

كل عام و انتم بخير

طبعا كلنا شايفين شكاوي الناس من الميكروباصات و التكاتك و التاكسيات و اللي بيدخل المنتدي العام للسيارات هيجد كل يوم كم الشكاوي و خاصة منا لميكروباصات و التاكسيات و التكاتك
و ديه عينة في يوم بس غير شكاوي الناس في المشاركات


http://www.masrmotors.com/vb/showthread.php?t=95058
http://www.masrmotors.com/vb/showthread.php?t=95057

و الموضوع زاد اوي في الفترة الاخيرة و للأسف محدش بيكلمهم و الميكروباصات و التاكسيات و التكاتك عاملين عصابات

سواق ميكروباص يتخانق و هو اللي غلطان و يلم كما تسمي عصابته و بلدياته من المنطقة اللي بيقف فيها زي ما حصل معايا امبارح في الحي العاشر ميكروباص اجرة سوهاج 51619 خبط العربية و بيبجح فيا و كل اللي هناك اللي تبعه اتلموا يحموه و يقولي انت لازم تخاف طب بلاش انا المشكلة في وجود العائلة معاك بيكتفك و مفيش عسكري حتي هناك

كذلك الحال للتاكسيات اللي بتقف في مواقف اول ما يعمل مشكلة يتصل بيهم كلهم يجوا برابطة المعلم ده غير اللي بشوفه منهم و لسه قريب سواق تاكس في زهراء مدينة نصر عند السلاب قدام النقطة الناحية التانية زنق ع ملاكي و سواق التاكس بيزعقله و سواق الملاكي بيقوله فيه حد يسوق كده و تزنق عليا و زعقوا شوية و سواق الملاكي ركب و ماشي و اذ بسواق التاكس جايب ازازة من العربية و طالع يجري يبطحه لولا اني زعقت و نبهت سواق الملاكي كان زمانه سايح في دمه

و كذلك التكاتك اللي سايقها عيال 10 سنين و 12 سنة و ماشيين وسط المدن و ماشيين يخبطوا في العربيات و يا سلام لو في منطقتهم كان زمان بيطلعوا شومة دلوقتي بيطلعوا سنجة من سقف التوكتوك او يسحبه من جنب الكرسي و كل التكاتك اللي يعرفهم يتلموا و يحموه بالرغم انه غلطان
او ماشيين ع الدائري و واخدين حارة شمال كمان !!!

بقي عايش وسطينا عصابات اخطر من العصابات الاجرامية للسرقة او السطو و هم عصابات الميكروباصات و التاكسيات و التكاتك او زي في الحي العاشر عصابات اسيوط او سوهاج و طبعا اللي بيعدي من هناك و عارف او عايش في المنطقة عارف الكلام ده كويس

و طبعا اغلب الحوادث بسبب التلاتة دول بيمشوا عكس و يقفوا في وسط الطريق يركبوا و ينزلوا و اليوتيرن ياخدوه عكس او يطلعوا فوق الارصفة عشان يروح الحارة التانية

طبعا الحل في رأيي بالاضافة لعودة المرور و الامن بقوة و القضاء ع العصابات دي و كاميرات مراقبة ع مدار الساعة في كل ميدان و شارع و شبكة مواصلات بجانب المترو


- الميكروباصات

يتم استخدامها ع الطرق السريعة فقط زي الدائري او السفر صحراوي زراعي
يعني منشوفش ميكروباص واحد وسط المدن
ممكن بعضهم الميكروباصات النضيفة و الفان زي السوزوكي في نقل البضاعة و الأمتعة فقط لا غير

طبعا الغاء ميكروباص ( الترامكو ) نهائي اللي عامل زي القطر و ماشي يشيل في العربيات و الناس و اغلبهم اساسا ماشي من غير نمر و ياما ناس اتصابت و ماتت منهم بسبب طريقتهم و من اكتر نسبة اصابات في المطرية و ما حولها منهم و اللي عايش هناك طبعا هيقولك ع الناس اللي اتكسرت او ماتت بسببهم و محدش قادر يعملهم حاجة غير باقي المناطق
الميكروباصات تشتغل في محافظتهم يعني منلقيش اسيوط و سوهاج هنا بيحملوا و شغالين


- التاكسيات :

زي ما هما وسط المدن لكن مع زيادة الرقابة عليهم و كاميرات المراقبة هتساعد في ده و طبعا لازم يكون فيه حل للعدادات اللي بقوا يلعبوا فيها و مشوار تركبه كل يوم بـــ10 تلاقي تاكس يقولك 25 ج احنا مش راكنين الفيل قبل ما نركب التاكس يعني


- التكاتك :

مصيبة لوحدها بلد المليون توك توك طبعا بعد انتشارها و بعد التسبب في انتشارها اعتقد انه من الصعب القضاء عليها و لكن ليس مستحيل فهناك حلين ياما تتاخد التكاتك دي و يدوا اصحابها تعويض و يتمنع اي توك توك في المدن
ياما التكاتك تكون في الارياف و المناطق المعزولة او المناطق اللي مينفعش دخول مواصلات فيها و منشوفش واحد منهم برة و برده يكون عليهم رقابة
و الافضل من وجهة نظري الحل الأول و هو القضاء ع التكاتك بمصادراتها مع دفع تعويض للتوكتوك زي ما اتعمل في التاكسيات القديمة


ده الحل من وجهة نظري

لو حد عنده حلول تانية يا ريت يشاركنا بيها ع الاقل ممكن نتوصل لأفضل الحلول و نوصلها

لأن كده بقي كتيير اوي اللي عايشين فيه


منقوووووووووووووووول للاهميه

[sherifabden]

اولا التكاتك دي لازم تتلم كلها وتتحرق بجاز ***** لانها اس المصايب كلها .. ثانيا المكروباصات دي سواقينها بلطجية اصلا وبالذات المكروباص ***** اللي اسمه الترامكو دا اصلا مش مكروباص دا دبابة ماشية .. بجد عربية ***** واللي سايقينها ***** منها وهما اصلا شوية ***** ..... معلش .. اللهم اني صائم ...

[Hisham.Elgazzar]

اللهم صلى على سيدنا محمد


ماينفعش خناقات ومشاكل مع الميكروباص والتوكتوك

ماحدش بيفهمهم الا اللى راكب معاهم كتير زى حالاتى

وطبعا لازم السواقة تكون بطريقة دفاعية وماتتعاملش مع الناس خليك مركز فى السواقة

[zing0]

بالنسبة للتكاتك:
أرى أن الحل الثانى أنسب, يعنى لو إشتغلت فى المناطق النائية و الأرياف و المعزوله و التى يصعب دخول المواصلات العامه لها, تبقى كده المشكله إتحلت و برضه مقطعناش عيشهم, بس متوصلش لدرجة الأوتوسراد و الدائرى و الكورنيش. و أحيانا صادفنى واحد أمام القريه الذكيه فى أكتوبر!!!!!

بالنسبة لميكروباصات الترامكو على وجه الخصوص, فعلاً سواقينها فرحانين إنهم سايقين مدرعه و بأشوفهم فى حلوان ( التخطيط العمرانى لحلوان على شكل شبكه و طبعاً مليااااااااان تقاطعات) تلاقيهم فى التقاطعات و لا بيهدى و لا بيبص جنبه حتى, تقولش سايق قطر, و صاحب الملاكى دايماً هو اللى غلطان لو موقفلوش.

ربنا يرحمنا منهم

[sayed2077]

طيب لما يلغوا الميكروباصات داخل المدن اللى عاوز يروج مكان يروحوا ازاى مش كل الناس معاها عربيات خاصه انا معاك ان لازم يحصل رقابة بس فى نفس الوقت مش نوقف الميكروباصات علشان احنا اصحاب العربيات الخاصه نمشى براحتنا كمان للاسف احنا فاهمين ان السواقه ان لازم كل واحد يعمل اللى عاوزوا للاسف ده غلط المفروض كل واحد بيسوق يسوق بطريقة دفاعة بمعنى انه بيسوق وهو بيخلى باله كان كل واحد عاوز يخبطه فبكده بيكون بيحافظ على نفسه وعلى غيرة بس لو كل واحد فاكر وهو سايق ان هو الصح وانه زى الفل هيحصل زى ما بيحصل دلوقت كل واحد راكب عربيه شديده يسوق ويقول فى سره الراجل يخبطنى او بمعنى اخر ضربوا الاعور على عينه قال خربانة خربانه