اسوء خدمة صيانة في غبور هيونداي ابو رواش

[mustafa811]

اسوء خدمة صيانة في غبور هيونداي ابو رواش

السلام عليكم

يا جماعة حابب احكيلكم على تجاربي مع غبور هيونداي فرع ابو رواش لصيانة العربيات

اولا : صيانة ال الف كيلو و ده كانت من حوالي 8 اشهر و لاحظت ساعتها شوية مشاكل في العربية و قلت اقوله عليها بالمرة مع الصيانة .. اول مشكلة مشكلة الانذار المعروفة بتاعة كل العربيات ال النترا ال 2012 و ازاي انهم بيطفوا زرار البطارية عمدا علشان ماتعرفش تتعامل مع العربية و تضطر تروحلهم .. ثانيا الابواب كلها بتزيق و السماعات بتطلع زنة و راحت الباشمهندسة نهى فكري قالتلي الابواب ده هياكل و ده مبني تاني لوحده اما زنة السماعات فهي مش سامعاها و اني بيتهيألي و انها علشان ماتزعلنيش هتخليهم يعملوا checkup على السماعات احتياطي .. ثالثا و انا بانفخ قلتلها على مشكلة عندي في ارضية العربية زي ما يكون مسمار عمال بيجري فيها كل مافرمل او ادوس بنزين و راحت قايلالي هياكل برده .. رحت الهياكل و الباشاوات ركبوا العربية و مش سامعين لا تزييق و لا صوت حاجة في الارضية .. انا افتكرت نفسي اتجننت لدرجة اني ركبت واحد ماعرفوش معايا العربية و سمع الاصوات ال انا سامعها و نفس القصة مع ابويا و اصحابي و اخواتي .. المهم فضلت ورا المهندس لغيت لما اعترف انه سامع صوت في الارضية و قالي هنضطر نخلع صالون العربية كله و راح سألني كده بصيغة تهديد : ايه رأيك نخلع الصالون كله و لا تستحمل الصوت .. طبعا العربية لسه جديدة لنج و الاخ بيقولي هيخلع الصالون .. طبعا ماوافقتش و خدت بعضي و مشيت و قلت استحمل الصوت و خلاص

ثانيا صيانة ال 5000 : الكلام ده من اسبوعين و رحت من سبعة و نص الصبح و اول تعليق ليا ان لو عربيتك مفيهاش حاجة طريق ابو رواش كفيل انه يعملك فيها حاجة من كتر المطبات و الحفر .. فتحوا قاعة الاستقبال الساعة 8 صباحا و 8 و نص ابتدوا شغل و مافيش نظام و لا طوابير و كله قام ياخد حقه بدراعه .. و بعدين خدت رقم خمسة مع اني حاجز ثمانية و نص و كنت اول واحد داخل الفرع .. بعد شوية ناداني باشمهندس اسمه مايكل منير و سألني على العربية و قلتله فيها شوية حاجات .. و خدته و طلعنا نبص على العربية .. اولا قلتله عجلة السائق بتفضي هوا و قالي مش شغلنا .. قلتله طب فيه مسمار ملخلخ قدام في الكبوت و قالي هيعمله و ماعملوش .. تلاتة قلتلها على زنة السماعات ال لسه موجودة و زادت عن الاول و برده مش سامعها مع ان اصحابي كلهم سمعوها .. رابعا قلتله التكييف لما اشغله في بداية تشغيل العربية باسمع صوت صفير و الحمد لله ده الحاجة الوحيدة ال عملوها مظبوط .. و قلتله ملاحظ ان التكييف بيفصل كتير اكتر من الاول و ماعملش حاجة .. و قلتله ان طارة الدريكسيون فيها عوجة نص سم .. و انتظرت 4 ساعات في الاستراحة بتاعتهم و طبعا في عز الحر و التكييف ضعيف جدا و احنا في رمضان و سألت بتاع الامن هو التكييف ماله و رد عليا و قالي : اصلهم موطيينه .. المهم ماصدقت اسمي اتنادي عليه و رحت نازل واخد العربية و فريرة الحق اروح قبل المحور مايقف .. و انا طالع طلعة المحور بحوضان سمعت صوت صفير و انا باخد الملف و قلت يمكن الكاوتش و لا حاجة .. بس بعد كذا ملف اكتشفت ان الزوايا حد لعب فيها و عاوزة تتظبط .. و طبعا كان صعب ارجع .. و بعدين و انا باضرب اشارة لقيت دراع الاشارة تقيل على غير العادة .. اخر حاجة بقى انا باركن تحت البيت و باشد فرامل ايد لقيتها تقيلة اوي و العربية بيطلع منها صوت تقريط من العجلتين ال ورا .. و بعد العربية ماكانت بتقف على تالت تكة دلوقتي بتقف على تكة واحدة .. طلعت البيت و مسكت التليفون و كلمة خدمة العملاء احجز ميعاد تاني و قالولي اتصل بيهم في وقت تاني علشان قاعدة البيانات عطلانة .. اتصلت بيهم ال يوم ال بعده و ادوني ميعاد بعديها بتلت ايام و قالولي فيه مهندسة هتكلمك .. و كلمتني المهندسة و قالتلي انت ليه خدت ميعاد و ماجتش علطول .. قلتلها و انا هاشم على ضهر ايدي اذا كان الباشمهندس ال في خدمة العملاء مقاليش البوؤين دوول

ثالثا رحلة العودة لاصلاح ماافسدوه في صيانة ال 5000 : رحت اول واحد و خدت رقم واحد و طلعلي المرة ده باشمهندس اسامة اديب و حكيتله القصة و قلتله على صفير العجل و دراع الاشارة التقيل و تقريطة فرامل اليد و المسمار الملخلخ .. بداية القصيدة قالي المسمار ده سنسور و المفروض يبقى مخلخل و طلع الكلام ده فشنك .. و كمل و قال العربية هتخلص الساعة 12 .. فقلتله ده انا لما عملت شغل الدنيا كلها و صيانة الخمسة الاف و اشتكيت حاجات كتير في العربية ماخدتش كل ده .. يبقى هتاخد في الحاجة البسيطة ده 4 ساعات ؟؟ .. المهم طلعت استريح في الاستراحة و التكييف برده و لا اكنه شغال و لقيت عربيتي راكنة تحت قدامي في خانة رقم واحد .. نص ساعة عدت و ماحدش قرب من العربية و عربيات الناس كلها ابتدوا يشتغلوا فيها مع اني جاي اول واحد و واخد رقم واحد .. عدت نص ساعة كمان و ماحدش قرب من العربية .. فنزلت لاسامة و قلتله و رد : دوول شغالين فيها على فكرة .. و قلتله اذا كان مفيش حد قرب منها و قالي تلاقيك مش واخد بالك .. و طلعت انتظر تاني و عدت نص ساعة و ماحدش جه جنب العربية و نزلت ادور على مدير الفرع .. و باسأل موظفة الاستقبال هو فين ؟؟ قالتلي بخوف و ترقب : و انت بتسأل عليه ليه ؟؟ قلتلها مش شغلك و شاورتلي علي مهندس اسمه احمد فريد او رفيق حاجة كده .. و رحت اشتكيله و قالي ازاي ده يحصل و ان في ظرف دقايق عربيتي هتخلص و راح قال لاسامة و نبه عليه .. و طلعت انتظر نص ساعة تانية و فوجئت ان 80 في الميه من الناس ال كانت جايه معايا خلصت عربياتها و استلموها و انا ماحدش قرب من عربيتي .. و رحت واخد بعضي و رايح استلم عربيتي بالعافية و الشرر بيطق من عينيا لافاجأ ان الباشمهندس احمد فريد ده مدير الاستقبال مش الفرع و ان العربية امر الشغل بتاعها ضاع في حتة او حاجة من هذا القبيل .. و قلتلهم هاتوا العربية بناقص الفيلم ده و خدوني على مدير الفرع او كبير المهندسين زي مابيسموه و كان اسمه باشمهندس عثمان و قعدني في مكتبه و قالي ثواني و العربية تخلص و كان راجل محترم و ذوق و بعتلي مهندس مخصوص للعربية .. و بعد نص ساعة جه المهندس و قالي العربية زي الفل .. و قلتله ازاي يعني و الفرامل التقيلة ال بتكلبش العربية عند اول تكة و صوت التقريط ؟؟ باشمهندس عثمان كبير المهندسين قالي ده شيء طبيعي و انها الاول كانت مريحة .. طب و الزوايا ؟؟ قالي مظبوتة .. طب و دراع الاشارات التقيل ؟؟ قالي مش تقيل و قالي الحاجات ده بتريح مع الوقت .. و قمت امشي و قلت اخلص من شوية النصابين دوول .. بس قبل مامشي قلت اتمم على العربية .. و اكتشفت ان الغطيان بتاعة البلف بتاعة الكاوتش مش موجودة و باقول للمهندس ال ماسك العربية و قالي هي كانت كده .. و يا سبحان الله كان فيه خبطة في العتبة و صورتها قبل ما العربية تدخل الصيانة مباشرة و كان ظاهر فيها غطا البلف .. و غاب ربع ساعة كده و جابلي من عنده جوه اي غطيان و كل واحد شكل .. المهم طلعت اجرب العربية و لقيتهم عالجوا صفير العجل مع الملفات و معنى كده انهم ظبطوا زوايا .. و برده صوت تقريطة فرامل اليد راح بس لسه بتكلبش عند اول تكة .. اما دراع الاشارات لسه تقيل

فات اسبوعين و مفيش حاجة ريحت بل دراع الاشارات بقى اتقل و فرامل اليد لسه بتكلبش عند اول تكة .. و قلت لما ادخل الانترنت و اشوف ايه الطبيعي بتاع فرامل اليد .. و اكتشفت ان الطبيعي ان فرامل اليد تكلبش العربية تماما عند 3 تكة مش من اول تكة و معني كده انها مشدودة اوي .. طب انا ليا بقى سؤال بحق ربنا و بحق الصيام في رمضان .. لو المعلومة التافهة المنتشرة في كل حتة على الانترنت مايعرفهاش كبير مهندسين هيونداي يبقى ايه العمل ؟؟؟؟؟

بصراحة انا هامسك الشكوى ده و اكتبها بالاجنبي و ابعتها لهيونداي في كوريا و نشوف ايه النصب ال احنا عايشين فيه ده و نظام الفهلوة و طرقعة الناس و في رمضان كمان .. اللهم اني صائم و منتظر ارائكم و لو اني اشك ان حد هيضيع وقته في قراية كل ده

و تعليقي على النترا الجديدة 2012 عموما انها عربية جميلة جدا من حيث الشكل الخارجي و الميكانيكا بس عفشتها ناشفة سنة و الصالون من جوه واسع و شكله حلو لكن كله بلاستيك و رديء في الصناعة و قطع غيارها غالية موووووت و ماقلتش حتى الان و ده علامة استفهام كبيرة و خصوصا اني حاسس اني دفعت في العربية ده اكتر من حقها

[محمد فيصل]

عوض الله عليك وقوعك من ضمن ضحايا غبور اكبر نصاب فى مصر
عليك بمعالجة مشاكلك عند اى مركز صيانة معرفة او الميكانيكى والكهربائى الذين كنت تتعامل معهم فى السابق
عليك ايضاً :بحسبى الله ونعم الوكيل فى كل متكاسل او متقاعص عن اداء عمله والاستهذاء بقيمة وقت الغير

[mr_astra]

زى ما قال استاذنا محمد فيصل حاول تحل المشاكل البسيطة خارج التوكيل
ومعتقدش ان شكوى من مواطن فى مصر تعمل تاثير للشركة الام فى وكيل قوى بالنسبة ليهم زى غابور

[Marlborooo]

متشكرين علي نقلك تجربتك المريرة وان شاء الله كل اللي في العربية يتعمل

وعندي رأي ما حضرتك تجرب تتعامل مع فرع تاني

وانا موافق مع حضرتك ان العربية مبالغين في سعرها

واحد ايرباج بسعر ،2 ايرباج بسعر
فرامل abs بسعر

المفروض الحجات ديه استاااااااااندر وليس كمااااااااليات

[mustafa811]

و الله يا جماعة انا طول مانا ماشي سامع تزييق الابواب و صوت المسمار ال في الارضية و زنة السماعات و مستحمل دراع الاشارات التقيل بس عزاؤي الوحيد ان لو ودتلهم العربية تاني هيفشخوها و ساعتها مش هاسامح نفسي .. انا هاصبر لصيانة العشرة و اروح اجرب فرع تاني و ربنا يسهل

و نصيحة لاي حد عاوز يشتري العربية ده يفكر كويس لان سعرها مغالي فيه و قطع غيارها غالية .. و فيه خيارات لو رجع بيا الزمن كنت اخترتها زي الفورد فوكاس و السوبارو و على فكرة اسعار قطع غيار هيونداي اغلى من الشركات ده .. و عاوز اقولكم اصلا ان ال بيأمن على العربية دلوقتي مع شركة محترمة مايشغلش نفسه بسعر قطع الغيار

و شكرا لردودكم