الحمد لله عملت الشنبر

[mostafa_wahid]

بسم الله الرحمن الرحيم
الحمد لله بعد مرمطة العربية لمدة سنة محتاجة طقم شنبر ,تم عمل طقم الشنبر وان شاء الله يكون كويس
نبدأ من الاول ,اتفقت مع ميكانيكى معرفة موثوق فيه وجه بص وشاف وعاين وقال شنبر مبدئيا لحد ما نفك وقال الكلمة المعتادة (انا قدام بطيخة مقفولة) :D
بعد ما فك الحمد لله مطلعش حاجة غير الشنبر اللى تقريبا مكانش موجود وده كان سبب ان الموتور والشكمان غرقانين زيت ... وكمان غير ان العربية بتاكل زيت كانت بتاكل بنزين بعد يوم معاناه من فك الموتور طلب منى شوية حاجات
طقم شنبر برازيلى من التوفيقية 145 جنية
جوان غطاء تكيهات من التوفيقية 40 جنية
فلتر زيت 15 جنية
احلى جركن زيت التعاون لزوم التليين 4 كيلو ودة بـ 55 جنية ... احلى تحية للتعاون :D
جوان غطا كاريتير الزيت .. وده ملقتوش وعملتوا عند حد بتاع جوانات بـ 25 جنية
جوان وش سلندر ... لأن المحروسة طلعت جايبة جوان قبل كده ودة بـ 20 جنية تقريبا
2 بوجيهات NGK مقاس 16 .. الواحد بـ 15 جنية
واخيرا مصنعية الميكانيكى وكانت 300 جنية
وبعد الكشف والفحص طلع والحمد لله الصبابات كويسة ووش السلندر سليم ... احمدك يارب
نهايتوا علشان مطولش عليكوا ..... الراجل ركب وقفل وجت مرحلة الدوارة ودى اصعب وارزل مرحلة
تدور دقيقة وتبطل ,وتسيبها شوية لحد ما تبرد وتدور تانى تعد 5 دقايق وتبطل وتفضل على كده لحد ما العربية تلين .... المفروض انها تحرق صفيحة بنزين = 20 لتر وهية واقفة فى مكانها
وبعد كده مشيت بيها بالهداوة اول 200 كيلو واخرى فى السرعة 60 .... وبعد كده قرصت شوية وبوصل لـ 80 ... والنهارده روحت للميكانيكى قالى خلاص بقى امشى براحتك وابقى تعلالى بقى لما تكمل 700 او 800 كيلو نقفل التاكيهات وقولت بالمرة ازود زيت فتيس عندوا علشان كان ناقص شوية (اسموا زيت فالفلينا تقريبا والكيلو بـ 15 جنية) ,وطبعا الميكانيكى هوة سايب التاكيهات مفتوحة علشان العربية لما تسخن
وانا الحمد لله مشيت 300 كيلو لحد دلوقتى واستهلاك البنزين اتحسن كتيييييييييييييييييييير ومستنى اكمل الـ 500 ان شاء الله واروح اقيس كبس الموتور ويارب يكون احسن من الاول
الف حمد وشكر ليك يارب ... وربنا ميوريها لحد علشان انا اخدت اسبوع علقة فعلا
وخلوا بالكوا من السخونية علشان دى بتعمل بلاوى كتيييييييييييييييييير

[حسام البورسعيدى]

تمام اوى ع البركه يا باشا .. ويا رب تبقى العمره تمام ...

متنساش بس تبقى تغير الزيت والفلتر بعد التليين (ممكن لما تروحلوا تانى علشان يقفل التاكيهات) .. وابقى خليه يحرق على مسامير وش السلندر لو جايبة رباط (بس مش زياده عن اللزوم) ..

شكرا يا زعيم لعرض التجربة ..

[وليــد]

انا في حيرة يا اخوانا اشتريت برايد 2005 بـ 36000 فبريكة برة وجوة وتكييف عايز شحن ومكنة كويسة .. بعد كده جيت ماشي بالعربية وواقف بيها بسببب مظاهرة لقيتها بطلت مرتين على الحال دا روحت ما كانش قدامي ميكانيكي فخليت سمكري يبص عليها قالي الموتور خفيف وعايز طقم شنبر بـ 800 جنيه والتكييف أصلا ما فيهوش مراوح والعربية آخرها 33000 ومن ساعتها وانا مضايق مش عارف الميكانيكي اللي جابها معايا ضحك عليه ولا ايه انا جبتها من سوق مدينة نصر .. ايه رأيكم ؟

[tameromarw]

المشاركة الأصلية كتبت بواسطة وليــد انا في حيرة يا اخوانا اشتريت برايد 2005 بـ 36000 فبريكة برة وجوة وتكييف عايز شحن ومكنة كويسة .. بعد كده جيت ماشي بالعربية وواقف بيها بسببب مظاهرة لقيتها بطلت مرتين على الحال دا روحت ما كانش قدامي ميكانيكي فخليت سمكري يبص عليها قالي الموتور خفيف وعايز طقم شنبر بـ 800 جنيه والتكييف أصلا ما فيهوش مراوح والعربية آخرها 33000 ومن ساعتها وانا مضايق مش عارف الميكانيكي اللي جابها معايا ضحك عليه ولا ايه انا جبتها من سوق مدينة نصر .. ايه رأيكم ؟

قدر الله وما شاء فعل.. الاسعار متباينه نسبيا ولو غاليه شويه مش مشكله المهم يكون عضميتنها سلام بمعني ان الاساسيات شاسيه وصاج يكون سليم .. والباقي سهل
والحمد لله علي كل حال ناس بتجيب زيرو ويعمل حادثه تخلي العربية تنزل النص بثمنها

[هشام عبد العزيز2012]

عامله ايه معاك دلوقتى