بخصوص اسخراج رخصه خاصه

[مبارك القناوى]

اتعلم سواقة كويس وبلاش تدفع رشوة

[0o_MAGIC_o0]

المشاركة الأصلية كتبت بواسطة sayed2077 مينفعش دلوقتى خالص لازم 18 سنه انت عارف انا كنت زيك كده وكنا جبنا العربية وكان فاضل حوالى 4 شهور على ما اجيب ال 18 سنه طبعا عدو كانهم اربيعين سنه وحتى اول ما جبت ال 18 كان فى وقفة العيد الصغير اللى فات وكان بكرة العيد ههههههههههه قعدت مستحمل اسبوع العيد ده بالعافية لغاية ما عادى الايبوع من هنا رحت انا ناطط لهم بالعربية من هنا وطلعت الرخصه وربنا معاك بقى لغاية ما تتم ال 18 بص نصيحه منى لو عندكوا العربية خلى والدك يسيبهالك وتسوقها جنب البيت فى خلال الكام شهر دول هتبقى بريمو وصدقنى سيبك من كلام المدربين والبتاع الرك كله على التدريب انت عارف انا اول ما سوقت كنت بمشى على الاول ودايس نص دوسة دبرياج وسايب بنزين اصلا وكنت بقول يااااه مال العربية سريعه كده ليه هههههههههههههه دلوقتى فى نفس الشارع اللى كنت بعمل فيه كده بقيت بجيب الرابع واقول ماكنش ينفع تبقى العربية اسرع شويه هههههههه ياااااااااه كانت ايام سوده هههههههههههههههههه ولعلمك انا اول ما تعلمت اتعلمت فى الشوارع الضيقة او بمعنى اخر الحوارى وبمعنى اخر شوارع وحوارى دار السلام وما ادراك دار السلام وبعد كده طلعت على الكورنيش وبعد كده على الادئرى وربنا يستر طريقك وطريقى

ههههههههههههههه .... بتفكرنى و الله بالى بيحصل معايا .. يعنى مثلا علشان اطلع البطاقه ...انا اصلا مواليد 7 والدى ربنا يكرمه مسجلنى 10 .. قولت مش مشكله هانت كلها 3 شهور ... و رحت اول يوم هطلع بطاقه بقى .. اينعم مش عارف هعمل بيها ايه بس اهوه حاجه كويسه ... حصل مشكله فى اول يوم خليتنا نأجل الموضوع ده حوالى اسبوع ... شويه و بقوا شهر و نص .. هههههه ... و على اما طلعت كانت روحى طلعت معاها ...
_________________________ _
" كنت بمشى على الاول ودايس نص دوسة دبرياج وسايب بنزين اصلا"


ههههههههه ... بدايه كويسه
_________________________ ____
انت فعلا عندك حق خلاص هسوق عربيتنا فعلا الكام شهر دول او السنه الا شهرين
بس ربنا يستر لو حصل حاجه هقوله ان انت الى نصحتنى

المشاركة الأصلية كتبت بواسطة corsair لازم تتم سن ال 18 سنة وبلاش تدفع رشوة احنا مش عايزين نرجع للعصر ده تاني اتمرن كويس واعمل اقماع علي شكل حرف S وعلي شكل مربع مكسور منه ضلع وان شاء الله هتنجح من غير اي رشاوي

انت صح ... انا مكنتش اقصد انى ادفع انا بتأكد ان هل فعلا يمكن استخراج الرخصه بطريقه مشروعه او غيرلتحت ال 18 ولا لأ ؟؟؟ ليس الا ... و على فكره انا ثورجى جدا ... و ربنا يحفظ مصر علشان الاحوال متسرش ... شكرا اخى العزيز على النصيحه الغاليه

المشاركة الأصلية كتبت بواسطة tonsy1979 ربنا يصبرك بس بكرة تزهق من السواقة واللى بيسوقوا

من كتر تشوقى للسواقه بدون حذر من اى شرطى يوقفنى او خلافه ... جعلنى اشعر بانها اشبه بالمستحيل و ان مش ممكن ازهق منها ...

المشاركة الأصلية كتبت بواسطة hazem_khidr ما تسمعش الكلام دا يا ما سمعناه و احنا صغيرين وما بيحصلش و اللي يقول عنده او كان عنده رخصه مؤقته قوله انت كداب

شكرا يا غالى على المعلومات و ربنا يصبرنى

شكرا لتفاعل أحلى اعضاء لاجمل منتدى ...

[حسام البورسعيدى]

انا كنت زيك كده فى يوم من الايام برضو .. وقتلت الموضوع ده بحثا ..

والخلاصة ان مفيش اى حاجة اسمها رخصة مؤقته لاقل من 18 سنه ..

لازم علشان الرخصة تطلع تتم 18 سنه للاسف ..

وبعدين احمد ربنا ان الموضوع دخل دماغك اليومين دول وانت فاضلك مجرد شهور ..

انا اتعلمت السواقة تماما وانا عندى 10 سنين .. ومن ساعتها وانا بعد السنين وبحلم باليوم اللى همتحن فيه امتحان المرور واطلع الرخصة ..

بس طبعا صبر حوالى 8 سنين حاجة صعبه .. فقررت انى اجازف وبدأت استعمل عربيتى بشكل يومى من اول 16 سنه وبعد مناقشات مع اهلى اللى كانوا بيخافوا جدا عليا من المرور .. وفى الفتره دى اتمسكت حوالى 3 او 4 مرات فقط .. والحمد لله كانت بتعدى على خير وبدون غرامات (الكلام ده فى بورسعيد) ...

حتى انا فاكر مره من المرات بعد ما كنت ماشى على الشمال وفجأه لقيتلجنه قدامى ومفيش اى فرصه انى الحق اركن ع اليمين قبل ما حد يشوفنى .. قمت مبطل العربية وعملت كانها عطلانه ونزلت ازقها انا وصاحبى اللى كان معايا .. بس طبعا على مين .. عرفوا فورا انى بمثل عليهم .. وانتهى الموضوع بمكالمه تليفون لواحد حبيبى وسابونى امشى .. الطريف انى بعد ما قعدت امثل ان العربية عطلانه .. قمت مدورها وطيران ههههههههههههه ..


عموما اللى انا اعرفه على الاقل عندى فى بورسعيد ان اللى بيدخل لجنه بدون رخصة قياده او معاه رخصه خاصة وسايق عربية اجره بيدفع 50 جنية .. ودى حاجة اعتقد اسمها تصالح فورى .. وطالما الموضوع 50 جنيه يبقى مفيش اى مشكلة .. لما تركب العربية أمن على احلى ورقة بخمسين جندى .. وتخليك لطيف مع المرور فى اللجنه علشان يتعاطفوا معاك لزوم اللجان ربنا يبعدك ويبعدنا عنها .. وده لغايه ما تطلع الرخصة .. بس ده مش فى كل الاحيان وساعات لما الظابط يبقى رخم يصمم انه يسحب رخصة العربية ولما تستلمها من اداره المرور تدفعلك غرامة حوالى 200 - 300 جنية (انا بقولك على اللى بيحصل فعليا مش نص قانون المرور)





دى يا معلم خلاصة تجربتى باختصار حبيت اقولهالك بما انى كنت عامل زيك كده فى يوم من الايام ... وعموما حاول تسوق العربية فى اماكن امنه شويه وبعيده عن لجان المرور الكام شهر دول لغاية لما تطلع الرخصة باذن الله


تحياتى ....

[qqoorr]

والله العظيم انا لما قريت الموضوع ده كأني بقرأ قصة حياتي انا في 3 ثانوي و هتم 18 في شهر 8 و نفسي أطلع الرخصة من بكره

[أحمد عثمان محمد]

أحترس

أى حد يقولك أدفع رشوة يبقى عاوز يلبسك فى حيطه و يطلع هو بمصلحة
:fun_Whis pering: