يبقى انت اكيد فى مصر!!!

[ماجد شاهين]

. لو سالت سواق تاكسى على عنوان وبدل ما يدل...ك قالك امشي ورايا.. يبقى مصري.. (وعلى فكرة ساعات بيغير اتجاهه عشان عنده رغبة صادقة يوصلك وخايف تتوه)

. إذا سمعته بعد أن يضحك يقول " خير اللهم إجعله خير " .. فتأكد أنه مصري ...

. لو إتصلت بيه في التليفون , وقال لك من غير مناسبة " كل سنة وإنت طيب " .. فتأكد أنه مصري ...

. لما تقابل واحد علامة وعمره مايقول "ما أعرفش!"فتاكد انه مصري

. لما تنزل تلاقي واحد ساند على عربيتك واول ما يشوفك يضحك ويقولك لا موأخذه يا باشا

لو دخلت عليه وكان بياكل ولو حتى عيش وبصل لازم يقولك اتفضل الأكل ويعيدها عليك ثلاث أربع مرات

. و لما عربية تعمل حادثة فى الطريق الصحراوى أو الزراعى , و فى ثوانى تقف لها خمسين عربية ينقذوا المصابين و يعدلوا العربيات و لو اضطروا يشيلوهم من على الأرض ........................ هم دول المصريين

. لما تلاقي ناس بتقضي العيد فى المقابر مع حبايبهم اللي ماتوا يبقي أكيد في مصر

. لما تلاقي سيدة في الرايحة والجاية عمالة تدعي لأولادها ... تبقى دي أم مصرية وطموحاتها وأحلامها الشخصية فى الحياة إن ولادها يبقوا مبسوطين

. لو شفت واحد وقف فجأة و هو ماشى فى الشارع و مد ايده على حتة عيش مرمية على الأرض وقام رافعها لراسه قبل مايحطها جنب الرصيف... يبقى الواحد (او الواحدة) ده مصرى.

. لو شفت عامل اول ماخد اجرته قام رافعها لراسه و بص فوق و حمد ربنا قبل مايحط الفلوس فى جيبه ... يبقى مصرى.

. لو اديت لواحد فلوس وبدأ يعدها بصوت عالي وبدأ بقوله الله واحد .. ومع الورقة الثانية : مالوش تاني، ومع الورقة الثالثة: العدد ثلاثة .. يبقي أكيد مصري ابن مصري

. لو شاورت لتاكس ووقفلك فى نص الطريق عشان تركب حضرتك بمزاج يبقي أكيد مصري

. لما تيجي تدفع الأجرة لواحد أول مرة تعرفه، يحلف عليك تخلي بأه

. لما تلاقي خناقة فى الميكروباس والأصوات عليت كل واحد فيهم بيحلف إنه يدفع للتاني ثمن التذكرة

. لما تلاقي ست البيت بتحوش برطمانات المربي الفاضية سنين طوال بدون استخدام يبقي أكيد دي مصرية

. ولما تلاقى شعب فى اكبر ازمه بيمر بيها ... مابيناسش يضحك
ويضحك اللى حوليه
وكل العالم يتكلم عليه ....
يبقى انت اكيد تقصد اعظم شعب .... شعب مصر
منقول

[Felefel Ahmed]

والله يا أ/ ماجد كلامك ده جميل وبيهون الأيام والضغوط اليوميه فى العمل والشارع
وبحييك تانى لأن الموضه دلوقتى ان كل الناس تعمل زووم على الغلط من أجل ال like يعنى كل الناس بتكتب سلبيات وهدفهم هو اللآ شيئ بس ده ليه تأثير نفسي رهيب علي الأنسان , فيه بحوث بتركز علي علاقه عوامل التحفيز بالسلوك البشري وردود الفعل
لما تقول لأبنك كل يوم (اوعي تسقط فى الأمتحان , اوعي تسقط فى الأمتحان ) غير لما تقوله ( انا عيزك تجيب درجات عاليه وتفضل مشرف أبوك) أو بهزار (لازم تجيب 99% انت زكي يا ..... ومخك نضيف)
العقل الباطن بيتأثر بكلمه (سقوط) ولازم يحتك بيها , يعنى يا ينجح علي الحركرك يا يسقط وكلمه (زكي , 99% , مخك نضيف.....) ليها تأثير لأن العقل الباطن بيحرك المخك ويزود كفائته استنادا علي المحفزات الخارجيه
نفس الكلام بعيوبه ومميزاته فى الأخلاقيات العامه وسلوك القياده
أسف علي الأطاله وشكرا لحضرتك

[crime]

والله يا استاذ ماجد فكرتنى بايام جميله ف مصر مفتقدنها اوى الايام دى

تقبل فائق تحياتى واحترامى

[bebonet]

لا تقلق احنا لسه بخير جدا جدا جدا
والله مصر احسن بلد مش عشان انا مصرى لا عشان هى دى الحقيقه اللى بيكرها العالم

[aymangalal]

هو ده اللى بيميز المصريين عن سائر بلدان العالم
والحمد لله على مصريتنا الجميله