تاريخك مع العربيات

[ahm2000]

ياريت يا جماعة كل واحد يحكيلنا عن العربيات اللي إمتلكها و إيه العربية اللي عجبته و إيه العربية اللي ندم إنه جابها و إيه الأسباب وإيه العربيه اللي يتمنى إنه يعاد تصنيعها بتكنولوجي جديد

أنا هبدأ بنفسي أنا أول عربية ركبتها كانت سكودا 84 كانت ناعمه بالنسبة لوقتها بس عيوبها كانت كتير منها إن الموتور بتاعها ورا وقطع الغيار قليلة والسحب تعبان مووووت
تاني عربية كانت جولف رابيت فتحة سقف وجنوط سبور وإكصدامات يعني من الأخر حبيتها جداً بس منهم لله الميكانيكية اللي مش بيفهموا في العربيات دي وبهدلوها لحد ما يعتها .. ومريت بفترة مع الفيات القديم كل أنواعه ما عدا الـ 131 و الـ 126 يعني 124 و 125 و 127 و 128 و 132 و ريتمو وبعدين فورد فيستا 96 كانت تحفه وهي جديدة بس للأسف طبعاً انتم عارفين الفورد و سوقها وخدمتها وقطع غيارها في مصر هي متعبتنيش في حاجة للأمانة بس أحياناً كنت بسأل على قطع غيارها من باب الفضول وكنت بزعل أوي لما كنت أسأل على حاجة و مالاقيهاش. بعتها وجبت أكسنت 1300 موديل 2005 عربية جميلة وفيها كل اللي كنت محتاجه يعني فيها تكييف و شنطة و 4 أبواب وقطع غيارها منتشرة وسعر قطع الغيار رخيص أوي كانت عاجباني جداً بس عيوبها لا يمكن نغفلها الصاج ضعيف جداً السحب بتاعها تعبان شوية يمكن علشان هي الـ 1300 وحالياً إدعوا لي ربنا يكرمني في الأحسن أنا بفكر أجيب سكودا أوكتافيا أو بيجو 406 فوق 2003 العربيتين دول بعجبوني جداُ يعني بجد لو كنت أقدر أجيب الإتنين كنت جبتهم

أسف إذا كنت طولت عليكم

كلمونا بقى عن خبراتكم أو تاريخكم مع العربيات ..

[hazem_khidr]

موضوع لذيذ يا اهم 2000 و فرصه ان الواحد يدردش مع الناس
انا كان عندي فيات 132 2000 زمان و كانت و لا تزال بالنسبالي من افضل سيارات ركبتها
و فضلت معايا فتره طويله و كان في نفس الوقت معانا فيات 125 و بعدين بيجو 505
و بعدين 132 تاني و بعدين سويفت و في الوسط جبنا ياريس و بعدين لانسر
و بصراحه كل العربيات اللي ركبتها كنت معجب بيها بس ال 132 ما تتعوضش بصراحه
و ال 505 كنت بحبها اوي لشكلها الهجومي و سحيها و راحه ركوبها و ال 125 كنت بحبها
لكن ممكن هيا و السويفت يبقوا في نفس الدرجه من الحب و اقل من كل العربيات اللي ركبتها
و كان زمان معانا 124 و الفا روميو الفاسود بس كنت صغير مش بسوق
و رغم اني كان نفسي اجرب الالفا روميو بصراحه في اوربا و الدول المتقدمه بيقولوا
(لو ما كنتش سايق الفا روميو يبقي انت لسه ما سوقتش عربيات)
و طبعا كان عندنا بيجو 504 زي اي مصري ما كان له الحق في امتلاك 504
لكن اكتر عربيه اتعلقت بيها هيا ال 132
و اكتر عربيه كانت سلسه في القياده كانت السويفت
و اكتر عربيه مريحه في ركوبها كانت ال 505
واللانسر حاليا بتجمع بين العربيتين دول بالنسبالي
لكن برضه مش بنفس الكفائه

[ahm2000]

المشاركة الأصلية كتبت بواسطة hazem_khidr موضوع لذيذ يا اهم 2000 و فرصه ان الواحد يدردش مع الناس ... ... لكن اكتر عربيه اتعلقت بيها هيا ال 132 ...

مير سي يا حازم على الرد

و سبحان الله أنا قابلت ناس كتير إتعلقوا بالعربية الـ 132 لما امتلكوها في مرحلة من حياتهم تفتكر نعمل دعوة لإعادة تصنيعها زي اللادا

[mmouneer]

موضوع جامد وشكرا لطرحك للفكره الجميله ديه
وبالنسبه ليا اول عربيه ركبتها وتعلمت عليها كانت فيات 128 عربيه غنيه عن التعريف بالطبع
بعدين سنه 1998 اشتريت بولو 98 زيرو ومن وقتها أثرني حب العربيات الهاتش باك لان سنه 2000 ركبت ابيزا 98 وهيا طبعا زي البولو اللي أخدها اخويا وبعدين سنه2004 اشتريت كورسا 95 بس كانت عربيه مش كويسه وخسرت جامد لحد ما بعتها لأني من الاول ما ركزتش وأنا بشتريها (أضحك عليا للاسف) وبعدين سافرت قطر وركبت هناك جريت ويل هوفر عربيه شبه الاسبرانزا تيجو 4*2 عربيه جميله وعاليه وسلسله في السواقه بس يعيبها سوء الخامات المستخدمه وكنت بشم ريحه البلاستيك بتاع التابلوه من شده الحراره ز
لما رجعت من قطر اشتريت تاني ابيزا 98 لسابق تجربتي بيها عربيه جميله اعتماديه عاليه مشاكل قليله واستهلاك بنزين قليل حوالي 750كم في 45 لتر بس يعيبها غلاء قطع الغيار وتقل في عجله القياده والدبرياج بس من الاخر عربيه رائعه
بس وهيا ديه حكايتي مع العربيات

[matmm]

انا بقى ركبت عربية واحدة الى هيا الاودى80 معايا من سنة 2002 بقالها 8سنين وكان حلمى انى اظبطها ولما ابتديت اظبطها موتور ودوكو وفرش جوة ولسا هكمل ترويش بقى اتعزرنا وهبيعها بس مش قادر اقولكم انا متعلق بلعربية دى اد اية على طول بترفع راسى المهم انا مركبتش غيرها بس وهيا دى قصة حياتى يا عمم الحج هههههههههههههههههههه موضوع جميل تسلم