كيف تغسل سيارتك بالطريقة المُثلي ؟

[hulck2000]

موضوع مميز كل الشكر لصاحب الموضوع .
وتحية تقدير لجميع الاخوه المتفاعلين بالموضوع واللى اضافوا بمشاركاتهم.
واحب اضيف حاجه بسيطه:

1. يفضل بعد غسيل السياره وتمام الجفاف تشميع السياره باستخدام الشمع السائل ومنه انواع كثيره متوافره فى معظم محلات الاكسسوار حيث يتم وضع كميات متساويه وتفرد بواسطة اسفنجه جافه او قطعة قماش نظيفه وبشكل دائرى , ثم تنتظر مده زمنيه قليله لتمام جفاف طبقة الشمع ,ثم باستخدام قطن طبى وهاتك يا دعك بصراحه حتلاقى نتائج مبهره.

بالرغم ان الشمع الجاف يعطى نتائج أفضل بس انا بنصح باستخدام الشمع السائل للسهوله.

• كما يفضل بعد غسيل العربيه استخدام مانع للاحتكاك والصدأمثل WD-40 حيث يتم استخدام هذا الاسبراى ورشه على مفصلات الابواب ,وقفل الشنطه ,وعلى سوست المساعدين والاجزاء الظاهره من عقشة السياره, وسوست الدبرياج والاكسلتير (دواسات البنزين والدبرياج )وادعولى لما له من اثر فعال لمنع اى صوت تزييق فى الدواسات ونعومة الدواسات.
• بالنسبه لكاوتش العربيه جرب استخدام السفن اب او البيبسى بعد الغسيل العادى للاطارات ومتستعجبش حتلاحظ ان الكاوتش اصبح لونه شديد السواد وده عن تجربه مهو لازم الكاوتش يعمل دماغ حاجه ساقعه والجو حر موت.

لكم تحياتى..

[tarbook]

بص يا استاذ momen bondok فى بعض الاشاء هضيفها .
اوعى اى حد يغسل السياره باريال او بيريل او فيرى المواد ديه فيها كيمويات بتاكل البويه بعد فتره فى الاماكن الظاهره للشمس وعدم برده غسل السياره فى الاماكن المشمسه .
فى اى بنزينه قله عايز صابون سايل لغسيل السيارات هيه زجاجه لتر 2.5 جنيه فى اى محطه بنزين وده جميل وسريع .
فى جهاز بيتباع فى السبتيه بتاع ضغط الماء الى بتشوفه فى المغسله ده سعره 170 صينى وده قوى جدا بتوصله خرطوم ماء وهوه بيطلع ضغط ماء مع هواء جامد جدا .
وفعلان حكايه تنظف العجل بزجاجه سفن دى انا جربتها وطلعت فعلان بتخلى الكاوتش بيلمع بس ياعينى لو انتا فى حته فيها تراب انتا هتفهم الباقى .
وبرده نشف العربيه بقطع جينز او بفوطه طريه احسن زى فوط البيت .
ده الى اعرفه عن غسيل العربيه .
وهكون متابع ممكن يكون فى معلومه انا معرفهاش .

[Bendary]

موضوع جميل جدا ومعلومات مفيده رائعة
شكرا لكل من ساهم بمعلومة فى هذا الموضوع
الحقيقه انتوا ما سبتوش حاجه تانى نقولها.

عاوز بس اقول انك حتى لو متعود تغسل عربيتك فى البنزينه او اى حد تانى بيغسلهالك
لازم انت يكون ليك لمستك فى العربيه على الاقل نظافة الصالون وتلميع الطابلوه يوميا
بصراحة التراب جوه العربيه بيبقى شكله يجيب اكتئاب .
انا شخصيا بحس ان العربيه بتبقى مبسوطة وبتجرى معايا لما تكون مغسوله ومتلمعه كويس بره وجوه .

[samirsaid1]

انا حصلت مرتين كنت مستعجل والعربية كانت مركونة من كام يوم
ورحت ماسك الخرطوم ورشتها عشان انزل التراب اللى عليها ونشفتها ومشيت على طول
فهل دة فية مشكله

مع انى محبش كدة وبحب اغسل العربية بمزاج وجردل وشامبو

[ابو حسين]

شكرا لك علي الموضوع