الى ثوار التحرير الان

[abu_ruqayyah]

المشاركة الأصلية كتبت بواسطة mar mar وقولي انت ايه رايك في ده http://www.youtube.com/watch?feature...&v=iT6maQZ1WrY الرقم الحقيقي للمصابين والشهداء بتجميع البيانات من كافة المستشفيات الميدانية الموجودة بميدان التحرير : - مستشفي ميداني (ش طلعت حرب أمام بنك الإتحاد الوطني) د.محمد دنيا 01141234812 - المصابين.. 200 حالة اختناق ، 1 كسر بالعمود الفقري، 10 اصابات بالهروات علي الرأس، 6 خرطوش 3 في العين - مستشفي ميداني (ش طلعت حرب أمام مصر للسياحة) د.محمد إمام 0169279175 - المصابين 150 إصابة معظمها حالات اختناق – خرطوش - مستشفي ميداني (كنتاكي) مستشفي كبيرة - المصابين 350 اختناق ،خرطوش، رصاص مطاطي، كدمات ، 3 حالات وفاة - مستشفي علي مدخل ش طلعت حرب قدام ودوكو د.إسلام 01113556100 ، د.حسن جمال 01522616047 - 120 مصاب نصها اختناقات ، رصاص مطاطي، خرطوش - هناك معلومات حول اختفاء 27 جثة بينهم جثث ثلاث أطباء كانوا يعملون بمستشفي عمر مكرم منهم طبيب امتياز اسمه د.محمد سامي وتم اكتشاف عدم وجود تلك الجثث بمشرحة زينهم وسيارات الإسعاف نقلتهم لمكان غير معلوم .... (هذا هو المصدر الوحيد للمعلومة ولم نعثر علي أي مصدر آخر لتأكيدها أو نفيها ) - مستشفي في مدخل ش التحرير د.شريف هشام 0119080407 - 500 مصاب ، اختناقات ، مطاطي ، رصاص حي - مستشفي عند شركة سفير للسياحة علي رصيف هارديز د.نور 01004441749 - 450 مصاب أختناق ، خرطوش ، مطاطي - مستشفي أول رصيف هارديز من ناحية شارع طلعت حرب د.هشام فؤاد 01111474748 د.أحمد مصطفي 01279403917 - 150 مصاب ،اختناقات ،مطاطي ،كدمات - مستشفي زاوية عباد الرحمن في الممر بجوار هارديز د.طارق سالم 01272244440 - 7 حالات وفاة – أربعة حالات منها برصاص حي وصرح مدير المستشفي أنه من بداية الأحداث حتي اليوم فإن إجمالي حالات الوفاة 45 حالة بهذه المستشفي فقط - حوالي 600 مصاب ،خرطوش،رصاص حي،اختناقات غاز - المستشفي في الصينية بوسط الميدان د.حسين جاويش 01005125889 د.حسني 0127101051 د.أحمد سعيد 01000293699 - 150 مصاب اختناقات وجروح سطحية - المستشفي بالصينية الحجرية أمام المجمع من جهة الباب الرئيسي د.مطفي عبدالكريم 0114461416 د.يوسف - حوالي 200 مصاب مائة منهم اختناقات غاز والباقي مطاطي وخرطوش وكدمات متفرقة - المستشفي الميداني بعمر مكرم د.شريف تيسير 0168932326 - سجلت المستشفي خلال ثلاث ساعات 45 حالة إصابة - مستشفي قصر الدوباره د.بيتر 01227320602 د.أحمد عاطف 0123456185 د.إيفا مديرة المستشفي - حوالي 500 مصاب تشنجات واختناقات وخرطوش بإجمالي عدد مصابين وصل إلي : 3415 مصاب تقريبا .... وعدد حالات وفاة 7 حالات إضافة إلي معلومة لم نصل لما يؤكدها او ينفيها حول 27 حالة وفاة آخرين.

طيب يا مرمر دول كانوا واقفين فى الميدان ولا كانوا فى شارع محمد محمود !!
كمان ايه تفسيرلك للناس اللى بيتم القبض عليهم وفى حوزتهم اسلحة بيحاولوا يهربوها داخل مصر !!
وبصي هو انا معاكى ان الشرطة يجب عليها وقف الاعتداء على اى مواطن بيعبر عن رأيه فى ميدان التحرير ودى حاجة كلنا متفقين عليها ، لكن كمان على المتظاهرين عدم الاقتراب من وزارة الداخلية او قسم الاربعين فى السويس او ادارة شمال العسكرية أو مدرية أمن الأقصر او اى قسم ...ولا ايه

[mar mar]

احنا نقعود نلف ندورليه
ما انا قولتللك في ناس مندسه علي الثوار
زي مافي ناس اجاانب مسكتها الدخليه وبتول انها بتضرب في الناس
بس للمعلومه ان في برنامج ناس بوك
واحد قال ان النا اللي اتمسكت دولكلنا زميلا في الجامعه الامريكيا وعمرهم ما يقدروا يعملوا كده
ولو تلاحظ ان كل واحد فيهم خايف ازاي وهما في القسم

[abu_ruqayyah]

والله يا مرمر المشكلة فى الفترة دى اللى احنا فيها ان المعلومات اصبحت كتيرة قوى والاشاعات فظيعة والواحد متخبط مابقاش عارف يصدق دول ولا دول وتبصي تلاقي دا جاب فيدوا ودا يرد بعشرة والاول يرجع يرد بعشرين ...........يعنى المواضيع فيها لغط و جدال كتير جدا ، فأنسب حاجة اننا نعملها ودى من وجهة نظرى الشخصية اننا نهدى على نفسنا شوية ونحاول نقرب من بعض اكتر وما نديش فرصة لحد ان بتلاعب بينا احنا كشعب مصري طيب واصيل ولا نسكت لما الحكومة تضرب متظاهرين فى حالهم ولا نسكت لما ناس تحاول تحرق الاقسام ولا نسكت على مماطلة المجلس العسكرى وكمان ما نعزلهوش مرة واحدة ونخلى البلد ضهرها عريان واحنا مش عارفين مين يمسك وكمان لازم نعرف ان لا انا ولا انتى ولا ميدان التحرير ولا حتى سكان القاهرة وضواحيها هما بس مصر ولازم كلنا لو بنحب بعض ناخد راى بعض سواء بقي نعمل انتخابات المجلس او استفتاءات او انتخابات رئاسية ونحاول ما نحجرش على رأى ابويا وابوكى و الناس اللى هى ملهاش فى السياسة ونعلمهم بشويش وبالراحة ازاى يمارسوا الديمقراطية والحرية ........طب انتى تعرفي ان فى واحد من ضمن المرشحين وبينزل ميدان التحرير واقسملك بالله العلى العظيم ان كانا نفسي يمسك مصر لكن على الرغم انه بينزل ومساند للثوار وكدا وانا بحبه فانا بقول لأ انا مش هحجر على اراء الناس ويوم الانتخابات هنزل اديله صوتى ( ولو انى حسيت للحظة كدا معينه انه بيجامل الثوار عشان مصلحة ومعنى بيجاملهم هنا انه مش بيلوم عليهم فى اى حاجة ولا بيتكلم عن محاولات اسقاط الشرطة ) لكن اهو بيعمل لمصلحته وما اقدرش الومه

[Moh.Osama]

المشاركة الأصلية كتبت بواسطة abu_ruqayyah وكمان ما نعزلهوش مرة واحدة ونخلى البلد ضهرها عريان واحنا مش عارفين مين يمسك

احنا ليه مش عايزين نفصل بين الدور السياسى والدور العسكرى للمجلس فى حال انه ساب الحكم يبقى كمان هيسبى الدور العسكرى لا طبعا الدور العسكرى ده ملاوش علاقه بالدور السياسى وانا لم بنتقد المجلس بنتقده فى الدور السياسى اللى بيلعبه اما الدور العسكرى فده محدش يقدر يقول عليه حاجه فاريت نفصل بين الدور العسكرى والدور السياسى

[dr.wael7yran]

بص يا باشا ..
اولا شكرا للاسلوب الراقي في الحوار ..
و ثانيا دي محاولة جادة و كويسة انه احنا نحاول نفهم اللي بيحصل حوالينا ..
انا من اكتر المؤمنين بنظرية المؤامرة ..
و اكيد اكيد مصر دلوقتي مليانة عملاء و خونة من فصيلة شعللها و ولعها ..
ده اكيد بيحصل ..
التاريخ اثبت الكلام ده و انه بيحصل من 5000 سنة و مفيش اختلاف عليه ..
بس مع كامل احترامي لخطورة العامل ده .. ده لغاية دلوقتي عامل ثانوي موش اساسي في القصة اللى احنا فيها دلوقتي ..
يعني المليونية اللي قامت يوم الجمعة دي كان سببها العملاء و الخونة ..
و لا المجلس العسكري و تلكؤه في تسليم السلطة ..
و وثيقة السلمي اللي اصروا ينزلوها اسبوع قبل الانتخابات و مخلياهم فوق القانون ..
بلاش الكلام على المليونية و السياسة و الكلام الكبير اللي لا انا و لا غيري كتير بيفهم فيه ..
فيه 200 واحد قرروا يعتصموا في التحرير ..
مصابين ثورة .. شباب صايع .. عملاء و مدفوع لهم .. اي حاجة ..
ناس قعدت و اعتصمت ..
زي ما ناس كتير في مصر كلها بتقرر تعتصم ..
مين بقى اللى قفل دماغه الميري و قرر يمسح بالناس دي الارض و يخليها عبرة لمن يعتبر ..
العملاء هم اللي ضربوا الداخلية على ايديها علشان تفتري على الناس دي ..
الدول اللي بتخطط هي اللي وسوست للمجلس العسكري في ودانه انزل امسح الارض بالناس دي ؟؟؟
الناس جالها ذهول و غضب ..
لسه في حد بيفتري على حد ..
لسه - بعد الثورة - الناس اللي فوق فاكرينا هنمشي بالعصاية و الضرب على القفا ..
و جت الناس ..
تضامنا مع كرامة الناس اللي اتبهدلت في الميدان ..
موش مهم الناس دي اتجاهم السياسي ايه و عملاء و لا لأ..
المهم السلطة اللي احنا وافقنا عليها لحمايتنا بعد الثورة اتصرفت ازاي مع الناس دي ..
بالقانون و العقل و المنطق ..
و لا بالخرطوش و المطاطي و الغاز المسيل للدموع ؟؟؟
بتقول يا مجلس يا عسكري دول عملاء و خونة ..
ممكن جدا ..
بس اثبت بقى يا افندم ..
و هات دليلك على الناس دي و افضحهم في التليفزيون و على النت و في كل حتة ..

انما علشان هم وقفوا في المكان اللي هو رمز الثورة ..
و علشان انت باشا و عايز تلم الموضوع قبل ما يكبر ..
تدي امر و انت حاطط رجل على رجل ..
خلصوا على الصيع اللي في الميدان و الموضوع لسه صغير ..
و خليهم عبرة ..

الناس معجبهاش الكلام و نزلت تضامنا مع الناس دي ..
و ال 200 بقوا الف
و الالف بقوا عشرة
و وصلت لمليونية تانية ..
تعمل ايه انت بقى يا مجلس يا عسكري ؟؟؟
تعتذر مثلا .. حاشا لله
تلم الموضوع و تحاول تهدي في الناس اللي المفروض هم اللي جايبينك و مديينك الشرعية... استغفر الله
تتكلم مع الناس بالعقل .. عقل مين .. دول شوية بقر و بلطجية و قلة مندسة ..
اكتر من 200 الف بني ادم في التحرير عملاء و خونة و اجندات خارجية ..
طب تعمل ايه يا مجلس يا عسكري يا حامي حمى الوطن ..
اه .. مفيش غير الحل الوحيد اللي الناس دي بتيجي عليه .. الضرب
اديهم على دماغهم
التحرير لازم يفضى و باي تمن ..
اصابات .. وفيات .. عيون بتضيع .. مستقبل بيروح .. موش مهم ..
و كأننا شوية بقر ..
و كأنه لا قامت ثورة .. و لا بلد اتغيرت .. و لا نيلة ..
و اروح انا الطبيب ..اللي لا ليا في السياسة و لا غيره .. و رايح بس اؤدي واجب انساني ..
و الاقي اكتر من 1000 مصاب ..
1000 مصاب يا ابو رقية ..
1000 عميل و خاين و قلة مندسة ..
1000 يا ابو رقية ..
الف بني ادم يا راجل ..
من خيرة شباب مصر ..
دكاترة
مهندسين
مدرسين
محامين
محاسبين
بنات
اطفال ..
كله مصاب في عينيه او في ايديه او في جسمه ..
طب ليه ؟؟؟؟
علشان بيقولوا لأ ...
علشان موش موافقين علي المجلس العسكري..
طب هو ايه المجلس العسكري علشان لما اقولله لأ يكون جزائي الموت .. هو مين ؟؟؟؟؟
هو مؤسسة وظيفتها الاساسية انها تحميني ...
موش تموتني علشان يقعدوا هم في كراسيهم ..


بس يا ابو رقية ..
بعد اللي حصل مع مبارك مفيش واحد هيسيب مكانه بالذوق ..
الا لو كان نضيف و تاريخه مشرف ..
زي عصام شرف كده ..
عايزني امشي .. هامشي ..
انما ده عارف انه لو مشي .. هتتفتحله الدفاتر القديمة هو و اللي معاه ..
فهيمسك فيها بايديه و سنانه لغاية لما يجيب واحد يداري عليه ..
و موش مهم ال 4500 مصاب ..
و موش مهم ال 35 واحد اللي ماتوا ..
و ان شاء الله يغور الشعب ده كله في داهية بس هو ماحدش يقرب منه ..
الناس دي لو فعلا قلبها علينا اوي كده ..
كانوا استقالوا من اول شهيد دمه راح بسببهم .. و سابوها للي فعلا هيعرفوا يحافظوا عليها ..

انا كانسان ماليش اي اتجاهات سياسية ..
بس عشت كام يوم صعب جدا وسط المصابين خيرة شباب مصر ..
و باكرر
خيرة شباب مصر ..
بقولك هي دي دماغ اللي انت عايزه يفضل يحكمك ..
تغور انت في داهية انت مالكش تمن عندي.. المهم افضل انا قاعد في الكرسي بتاعي ..
موافق على كده طظ فيك .. موش موافق على كده طظ فيك برده ..
نفس دماغ مبارك ..
و نفس دماغ كل طاغية ميهموش الا مصلحته و بس ..

و انا بقولها لكل عضو في المجلس العسكري ..
دم اي بني ادم مات في ميدان التحرير يساوي مليون واحد زيك ..
و عينين اي شاب راحت في الميدان تساوي كل اللي هيحصل فيك واكتر ..

و لو انت مريحنا و معيشنا احلى 10 شهور عدوا على مصر ( و ده محصلش طبعا )
فكفاية عليك اللي انت عملته في الاسبوع اللي فات ده ..
علشان تغور .. و تتحاكم .. و تدفع تمن دم الناس اللي ماتت دي ..
و يجيي اللي فعلا المصري عنده .. دمه تمنه غالي اوي ..
غالي اوي اوي اوي ..

اللهم قد بلغت .. اللهم فاشهد ..