انا من الاغلبية الصامته وعايز اتكلم

[تامر ديزل]

السلام عليكم
كل سنه وانتو طيبين
اعرفكم بنفسي انا مواطن مصري من الاغلبية الصامته
قررت اني اتكلم باسمي وباسم من يحب اويوافق على كلامي من زملائي في الاغلبية الصامته
النهارده الناس عماله تتكلم عن القوي السياسية في مصر وتقول مين اللي عمل الثورة الليبراليين ولا الاسلاميين 6ابريل ولا الاخوان
وبعدين يرجعوا يقولو مين اقوي واكثر شعبية الاسلاميين ولا الليبراليين
وكله شغال دش
واللي يقولك اصل الاخوان هايسيطروا على البرلمان عشان كده الليبراليين واقفين لهم وبيقولو الدستور قبل الانتخابات يردوا الاسلاميين من تحت لتحت اصل الليبراليين عايزينها تبقي مسخرة ومفتوحة على البحري
وكان مصر مافيهاش الا الاسلاميين او الليبراليين وناسيينا خالص
هوا دا ينفع يارجاله
طيب ماتيجوا نشوف من وجهة نظر احد مواطني الاغلبية الصامته ايه هيا تقسيمة القوى في مصر ونشوف ادلة على الكلام ده وكمان شرح بسيط للاحداث اللي مرت وبتمر على البلد وكمان لو حد عنده راي او تعديل مافيش مانع لحد مانوصل لنظرية مظبوطه عن القوى المؤثرة في السياسة المصرية حاليا وتوقعاتنا ايه للي جاي
القوة الاولى : الاغلبية الصامته (الكتله الحيوية)
هي عصب المجتمع المصري تشمل كل المصريين الشغالين والحاصلين على اي قدر من التعليم ولديهم مصدر دخل ثابت او متغير انما موجود مصدر دخل كبير او صغير يقدروا من خلاله تامين مطالبهم اليومية وتكوينهم الثقافي مزيج من القيم الدينية والتقاليد الاجتماعية وما تيسر لهم الاطلاع عليه من وسائل الثقافة من الكتب المتداوله والصحف والبرامج التلفزيونية ودول موجودين في كل مكان من العريش الى اسوان من شرم الشيخ الى الاسكندرية وطبعا انا مش كاتب الاماكن دي من باب الانشاء زي من المحيط الى الخليج ولكن هيا دعوه لانك تفتح عينيك وتشوف الشعب المصري اللي الناس بتتكلم عليه مش هما بس اللي في التحرير او بييجوا ف التلفزبون انما الشعب اللي هوا الشعب يريد .... موجود في المصانع والغيطان وفي اعماق الصعيد وفي الارياف والمدن الكبيرة والصغيرة
نرجع تاني
القوة الثانية : التيار الاسلامي
هم افراد من المجتمع المصري كانوا في يوم من الاغلبية اياها (الصامته) وبعدين كل واحد منهم شاف انه ماينفعش يبقى صامت ولازم يغير نفسه ويحاول يغير اللي حواليه وشافوا ان المنهج الامثل هوا المنهج الاسلامي لان احنا مش لازم ننكر ان الاسلام بفروضه وتعليماته متغلغل في طبيعة الشخصيةالمصرية ومتاح لنا بشكل يومي الاذان شغال خمس مرات الشيوخ شغالين دروس واحاديث فكان لازم يخرج من المجتمع او من الاغلبية تيار ذو نزعه دينيه متحمس لتغيير الاوضاع الى الافضل وعنده ايمان انه سيكون له جزاء من الله في الدنيا والاخرة حتى لو تعرض له الطغاه او المخالفين لمنهجه
وهنا انقسم التيار قسمين جماعة بتقولك العودة للاصول هي افضل طريقة فلازم كله يكون على طريقة السلف الصالح في حياتهم ومعاملاتهم وحتى مظهرهم ومن هنا جاءت تسمية السلفيين
القسم الثاني جماعة بتقولك المحتمع النهاردة غير من الف سنه فلازم يكون فيه منهج اسلامي (مودرن ) حلو كده وسهل ومبسط ويكون العملي فيه اكتر من النظري ونقرب كده للناس ونضحك ف وشهم والدقن دي اذا كانت هاتخوف الناس بلاش منها ومافيش مانع نقدم تنازلات في القشور علشان نوصل الفكر الدعوي للمجتمع وده تقريبا ملخص بالبلدي لفكر الاخوان وعن تجربه مش بقول وخلاص لاني مشيت معاهم سبع سنين
القوة الثالثة : الليبراليين
يعني المتحررين وهما بردوا من الشعب وكانو في يوم (صامته) متحررين من ايه ياعم يقولك من القيود الدينية والاجتماعية العتيقة اللي هيا في نظرهم سبب نكسة البلد وهيا اللي مرجعانا ورا ويللا بينا نطلع لقدام نجيب المبادئ والافكار الغربية التي كانت سببا في التقدم الغربي ونطبقها هنا ونقب على وش الدنيا حرام الوضع اللى احنا فيه ده
كلام كويس وهدف نبيل
طيب تلاقيهم فين تلاقيهم اساتذة جامعات وشخصيات لامعة او ادباء وفنانين (فنانين محترمين مش هلاسين) وتلاقيهم ميسورين نسبيا وناس محترمه اوي بس علاقتهم بالدين يعني هنقول من متوسطة الى ضعيفه وهما يتميزوا عن الاسلاميين بحاجه حوارهم هادي وكلامهم بالقلم والمسطرة ولذلك تلاقيهم في كل الجرايد والتلفزيونات وعلى النت
طيب وفيه كمان زي ما قسمنا الاسلاميين قسمين اصوليين ومودرن جوا الليبراليين قسمين ناس محترمه زي اللي ذكرناهم فوق وناس تانيه عايزاها مراجيح لا اصول ولا مراجع ولا اي نيله اعمل كل اللي في نفسك حريتك تنتهي حيث تبدأ حرية الاخرين انت حر مالم تضر وشغالين بدون اي منهج
القوة الرابعة : المؤسسة العسكرية
ودي هيا المؤسسة الوحيدة المنظمة في مصر بينضم اليها سنويا افراد من الاغلبية وبيادوا خدمتهم ويطلعوا تاني انما العصب الاساسي هما الضباط وضباط الصف (المتطوعين) الضباط الرافد الرئيسي لهم الاغلبيةالصامته بتاعتنا ومن بعدها الاسر الليبرالية بنسبه ضعيفة ولم يكن للتيار الاسلامي نصيب في ضباط الجيش
بمعني اي واحد كان له ملف في امن الدوله كان مستحيل ينضم للجيش وطبعا الاسلاميين كلهم كان ليهم ملفات وبالنسبة للمتطوعين فكلهم من اغلبيتنا الجميلة
القوة الخامسة : شلة الفاسدين
ودول ناس معجبهمش التسلسل الاجتماعي اللي طلعوا فيه وقرروا يحرقوامراحل كتيير علشان يبقوا اصحاب نفوذ فتخلوا عن القيم الدينية والاجتماعية والليبرالية وكله في سبيل انهم يطلعوا لفوق
ودول هتلاقيهم تجار مخدرات وتجار اغذية فاسده ومسرطنه وموظفين كبار وصغيرين مرتشين ومختلسين وممكن تحط معاهم البلطجية والحرامية والنصابين وحط معاهم بتوع ال0900 وفرقة كبيرة وسبحان الله تلاقيهم يتعرفوا على بعض بسهولة ويمشوا مصالح بعض وحاجه ولا العصابه وبالمناسبه هما دول القوة اللي كانت بتحكم في الثلثين سنه الاخيرة اوقبل كده بخمس سنين كمان يعني قوة لايستهان بيها
القوة السادسة والاخيرة : المهمشين
ناس في الضياع واحنا اللي ضيعناهم وسبناهم لحد ما بقوا مش لاقيين ياكلوا ولا حتى عارفين يسرقوا عشان ياكلو ودول حاليا مش كتير للدرجه ولكن في ازدياد
طب تلاقيهم فين تلاقيهم في الاشارات شايلين المناديل وانت بتقفل ازاز عربيتك علشان متشتريش منهم علبة مناديل مكسب الواحده فيها شلن او واحد عايز يمسح عربيتك وياخد اي حاجه ياكل بيها وانت مش طايقه او جارك توفي وساب ايتام وامهم ست شريفةمش عارفه تعمل ايه وغيرهم وغيرهم ودول ماعندهمش رفاهية الفكر السياسي لانه اذا جاعت البطون تاهت العقول
انا طولت عليكم
اشوفكم بكره ان شاء الله ونتكلم عن الثورة وكل قوةمن دول عملت ايه واعتصام 8 يوليو بدأ ازاي ومليونية 29 يوليو حكايتها ايه وبردوا مممكن نتكلم عن القوى دي كانت فين ايام مبارك وليه ظاهرة دلوقتي
عايز اقول حاجه مهمة دي خواطر واحد كان صامت وزهق ............لوحد عنده تعديل انا عاوز نتناقش ونتكلم كلامنا احنا مش الكلام اللي بيتقال قدامنا ونردده
ايه المشكلة لو كل اللي قلته طلع غلط مافيش مشكلة مانا ساعتها هاتعلم الصح منكم
سلامو عليكم

[حازم شاهين]

تحليل جيد و بداية موفقة

فى إنتظار البقية

[MmFFoR]

موضوع متميز و مش عارف اعترض عليه

مش معناه اني تخصص اعتراض و لكن الموضوع فعلا كويس

[mf]

المشاركة الأصلية كتبت بواسطة mmffor موضوع متميز و مش عارف اعترض عليه مش معناه اني تخصص اعتراض و لكن الموضوع فعلا كويس

الحمد لله اخيرا

[The MERCURY]

مع تحياتى للاخوة mmffor & mf86
اسمحولى اقولكم انا اعترض

انا بس بهزر معاكم ، و احب اقول لكاتب الموضوع dieseltrucker
لا فض فوك
برغم انى مش هاسيبك و هانكش معاك فى شوية حاجات كده انته كاتبها ، بس لما تخلص.
بس انا عجبنى اسلوبك و هدؤك و بانتظار المزيد