عايز اشتري نوبيرا

[welo_wal]

عايز اشتري نوبيرا في حدود 50000 الاسكندرية
ممكن اعرف ايه عيوب النوبيرا ولما اشتري اتأكد من ايه قبل ما اشتري وعايز اعرف النوبيرا احسن ولا اللانوس

[Elsebily]

أولا ابعد تماما عن الاوتوماتيك في النوبيرا لانه الفتيس الاوتوماتيك في النوبيرا الكل بيشتكي منه وهتغيره كل شوية ثانيا بالسعر ده هتجبلك نوبيرا من 2005 ل 2007 وحالتها كويسه ثالثا اتاكد من المقصات لاني في الغالب بيكون فيه مشاكل فيها وغير كده بقي زيها زي اي عربيه تانيه من حيث الكشف زي فبريقه بره وجوه ولا لا وحالة الموتور والعفشه وهكذا وعامة هي عربية كويسه جدا وكتير بيشكروا فيها وربنا يوفقك وتلاقي عربيه كويسه تريحك وميكونش فيها مشاكل وطبعا مفيش ادني مقارنة بينها وبين اللانوس لاني دي فئة ودي فئة تانيه خالص (طبعا النوبيرا اعلي ) وعامة من وجهة نظري انا الشخصية اني مبرتحش للانوس واما بركبها بحس انها متجمعه في ورشه وياريت اصحاب العربيه ميزعلوش بس عامة حسب راحتك الشخصية انت وعامة النوبيرا المانيوال واللانوس بيتفقو انهم الاتنين مش فيهم عيوب جوهرية يعني

بالتوفيق

[nubira]

السلام عليكم ورحمة الله وبركاته بداية التوفيق من الله وربنا يوفقك للخير اشنء الله وانا مقدرش اقولك تتأكد من ايه قبل ما تشتري من الناحية الفنية لاني مش متخصص ولكن الافضل ان يكون معاك متخصص اثناء الشراء ويكون معرفة شخصية وموثوق فيه فأثناء قيامي بشراء سيارتي من 8 شهور كان معايا اثنين متخصصين موثوق فيهم ولفينا من الساعة 9 صباحا وحتي قبل المغرب علي كل النوبيرا اللي في السوق بالرغم من ان العربية اللي معايا شيفينها من اول النهار ولكن كنا بنلف لجس نبض السوق من حيث الاسعار لان سعرها كان عالي عليا لانها موديل 2008 فابريكة ولكن في النهاية توكلت علي الله والحمد لله ربنا وفقنا للخير ولكن اللي اقدر انصحك بيه الاتي :
1 ـ دعاء دخول السوق .
2 ـ ما تتوقفش علي موضوع سنة الصنه قوي فالمبلغ اللي انت بتتلكم فيه ممكن يجيب لك نوبيرا 2006 او 2007 رشة بره وممكن يجيبلك مثلا 2003 او 2004 فابركية بالكامل فهنا متخليش عامل سنة الصنع يغرك اكثر لان النوبيرا من 2000 وحتي نهاية تصنيعها في 2008 السيارة واحدة في كل حاجة فخلي الاهم بالنسبة لك حالة السيارة والموتور وعدد الكيلومترات اللي مشيتها العربية وطابق العداد علي حالة العربية لو مكتوب فيه ان العربية مشيت مسافة قليلة هيبان علي شكل العربية وعلي سبيل المثال ونا بشتري كنت بخلص في نوبيرا 2004 مانيوال علي 54000 جنيه نهائي في السوق لانها مكل سيدة الو دي دهان مصنع جوة وبرة وماشية 50000كم في حين كان قدامي 2006 ارخص من كدة ولكن مش نفس الحالة .
3 ـ بالنسبة لموضوع الفرق بين النوبيرا واللانوس فالفرق شاسع ولا وجه للمقارنة فمن حيث القوة والاتساع للصالون والشنطة والفخامة والثبات والتكييف كل ده محسوب للنوبيرا طبعا بلا جدال .
4 ـ واخيرا ودي نصيحة مني بحكم عملي بالقانون تأكد من اوراق العربية وذلك بمطابقة رقم الشسية والموتور اللي في الرخصة علي الرقم المدقوق علي شاسيه العربية من الداخل تحت المساحات علي قطعة الاستلس الموجودة داخل الكبوت او علي الموتور وشاسيه العربية نفسه وتأكد من بطاقة الشخص اللي بيبيع لك وطباقها مع الرخصة والتوكيلات وانا بفضل في ظل غياب الامن وكثرة النصب في الوقت الحالي انك تعمل حسابك تسجل العربية شهر عقاري وتنقل ملكيتها في الشهر العقاري الموجود في السوق وقت شرائها ولا تكتفي بعمل توكيل لان التوكيل الي بيعمل هولك البائع ما يمنعهوش من اصدار توكيل لشخص اخر عن ذات السيارة .
وفي النهاية ربنا يوفقك لما فيه خير لدنياك واخرتك .
وحسن الختام السلام عليكم

[mhemeda]

اتاكد من حاله العربيه عامه و البويه يعني رشه بره و افتح الموتور و وشوف العربيه جايبه زيت و لا ايه من جوان وش التاكيه و المقصات مش بتبقي بايظه ولا حاجه الجلب هي اللي بتبقي بايظه و عايزه تتغير