بشرى لرغايين المنتدى .. افتتاح مقهى (مصر موتورز) لصاحبه المعلم حسام البورسعيدى ...

[حسام البورسعيدى]

بالحق يا ابو عمر ...

كان جه فى دماغى موضوع كده بقالى فترة عاوز اقولك عليه ...

معظم الحكايات فى ادب الرحلات كانت عن السكة الحديد ومغامراتك فيها ..

بس عمرك ما قلتلنا حاجة عن انواع القطارات ..

وبما انى عمرى ما ركبت قطر (اوعى حد يتريق احسن ادفعكوا تمن المشاريب) .. فمعلوماتى عنها ضعيفة جدا ..

وكونى عمرى ما ركبت قطر ده ليه اسبابه .. ان مثلا فى بورسعيد رحلات القطارات قليلة ومواعيدها غير مناسبة وبيكون اسهل ركوب السوبر جيت ..

فكنا عاوزينك يا كبير بحكم خبرتك الطويلة فى السكة الحديد والقطارات تكلمنا اكتر عنها ..

يعنى مثلا حضرتك فى حكاياتك كنت بتقول الاسبانى والفرنساوى وغيره .. ايه بقى الفرق بينهم ..

وكمان انا اسمع ان فيه قطارات بتمشى بالفحم (اعتقد البخارية) وقطارات بالديزل و..و ..

ياريت بقى يا كبير تشرحلنا الكلام ده ....


وصباحك فل يا سيد الكل .......

[خالدخليفة]

ههههههههههههههههههههههههه هههه
سبب السفر الكتير بالسكة الحديد انى صعيدى وكرامتى بتوجعنى ومحبش حد يقل ادبه عليا وبكره التدخين فكنت لما بسافر او اركب الميكروباس اعمل لى 30 مشكلة لحد م نوصل فقررت استخدام القطار والبلاد اللى مواعيد القطار فيها غير مناسبة زى بورسعيد والاسماعيلية والمنصورة ودمياط فكنت بركب اتوبيسات الحكومة وانا رايح (السوبر جيت ووشرق الدلتا ووسط الدلتا وماشابه ) وانا راجع ان وجدت القطار كان بها
وان لم يوجد قطار فالميكروباس وبئس المصير
وكنت اسأل السائق قبل الركوب / ممنوع التدخين والا مسموح
فان قال ممنوع ركبت وان قال مسموح بستنى اللى بعده وهكذا
وعموما عينى ياعم حسام جهز الشاى التقيل على م اكتب المقال هنا مش فى ادب الرحلات علشان خاطرك بس

[حسام البورسعيدى]

المشاركة الأصلية كتبت بواسطة خالدخليفة ههههههههههههههههههههههههه هههه سبب السفر الكتير بالسكة الحديد انى صعيدى وكرامتى بتوجعنى ومحبش حد يقل ادبه عليا وبكره التدخين فكنت لما بسافر او اركب الميكروباس اعمل لى 30 مشكلة لحد م نوصل فقررت استخدام القطار والبلاد اللى مواعيد القطار فيها غير مناسبة زى بورسعيد والاسماعيلية والمنصورة ودمياط فكنت بركب اتوبيسات الحكومة وانا رايح (السوبر جيت ووشرق الدلتا ووسط الدلتا وماشابه ) وانا راجع ان وجدت القطار كان بها وان لم يوجد قطار فالميكروباس وبئس المصير وكنت اسأل السائق قبل الركوب / ممنوع التدخين والا مسموح فان قال ممنوع ركبت وان قال مسموح بستنى اللى بعده وهكذا وعموما عينى ياعم حسام جهز الشاى التقيل على م اكتب المقال هنا مش فى ادب الرحلات علشان خاطرك بس

عنيا يا باشا ..

واحلى كوباية شاى صعيدى من ابو تلات معالق شاى ده (شاى الانتحار) ههههههههههه



وفى انتظار المقال يا كبير .. ويا ريت تعمل نسخة منه فى ادب الرحلات برضه ..

[خالدخليفة]

المقالة (9)
أنواع القطارات

أخويا الصغير حسام البورسعيدى طلب منى مقالة عن انواع القطارات
وانا طبعا مقدرش اتأخر عليه
ومحبة فيه هكتب المقالة دى هنا مش فى موضوع أدب الرحلات
والقطارات فى مصر والعالم انواع كتير ونبدأ أولا بالقطارات خارج مصر
وهى كلها كهربائية زى مترو الأنفاق هنا (طبعا انا بتكلم عن اوروبا والدول المتقدمة )
وفى منها اللى بيمشى على شريط واحد مش شريطين زى عندنا واسمه قطار المونوريل او المغناطيسى وده عبارة عن شريط واحد يمر القطار فوقه ويسير بمجال مغناطيسى قوى وتصل سرعته الى 600 كيلو فى الساعةوهو يعمل فى اليابان فقط وان كانت الصين هذه الأيام بتجهز قطار تصل سرعته الى 800 كيلو فى الساعة (شوف ياأخى العالم القادرة المفترية ربنا ع الظالم والمفترى )
وطبعا قطار البخار ده اصبح ماضى زى كل انواع القطارات فى بلدنا اصبحت ماضى أيضا ماعدا مترو الأنفاق
المهم
نيجى للمحروسة بلدنا
والقطارات فى بلدنا انواع
طبعا مترو الأنفاق كلكم عارفينه
واما مترو مصر الجديدة ومترو الرمل فى اسكندرية فده حاجة تكسف
لانى اكتشفت ان مترو مصر الجديدة الممل فى مسيره اسرع من مترو اسكندرية
تصوروا
ولانى من مشجعى السكة الحديد فذات مرة ركبت المترو من محطة الرمل حتى باكوس وصل فى ساعتين ثم اكتشفت انها ساعة بالميكروباس و تلت ساعة بقطار ابو قير
وبداية نقول
انشئت سكك حديد مصر وتحديدا خط اسكندرية القاهرة عام 1853
واما قطارات السكة الحديد بمصر
فأنواعها كالأتى
اولا / قطارات الوحدة (الضواحى )
وهى القطارات التى تنقل الركاب فى المسافات القصيرة والتى حل محلها مترو الانفاق فى القاهرة ومثل خط المرج /شبين القناطر
وخط اسكندرية / ابو قير
وخط بنها / الزقازيق & وخط الزقازيق / الاسماعيلية
وخط طنطا / المنصورة & وخط المنصورة / دمياط
وخط المنيا / سوهاج & وسوهاج /قنا
وهى قطارات عبارة مجرد عربة قطار بها كراسى ومتشكرين منكم على كده وكويس ان فيها كراسى
ثانيا القطارات المكيفة
وهى الاسبانى والفرنساوى والنوم
والفارق بين الاسبانى والفرنساوى فى نوعية الكراسى وتنجيدها والحمامات
وبين الدرجة الاولى والتانية فى حجم الكرسى نفسه
يعنى واحد تخين جدا مينفعش يركب درجة تانية هيتحشر حشرة عمك حنفى فى اتوبيس السيدة زينب وهتبجى (هتبقى ) سفرية مطينة بطين الليلة دى
واما النوم فعبارة عن كباين وكل كبينة مغلقة على المسافر فيها
وفى منها كباين بسريرين ومنها كباين بسرير واحد
ولايجروء اى حد يفتح عليك باب الكابينة
لان اصلا كمسارى القطارات دى بيبقى واقف بره القطار منتظرك ومعاه كشف فيه رقم تذكرتك واسمك وبمجرد غلق باب القطار
ممنوع الاقتراب الا لو فى حالة الخطر او انت ضربت له الجرس
وكان شيطانى يقول لى ياسلام ياواد ياخالد لو مرة تركب تلاقى معاك فى نفس الكابينة واحدة خواجاية
لكن لاحظت ان كل مرة اسافر وحدى او معايا واحد صعيدى بلدياتى يفضل يرغى طول السكة ويقول القاف جيم والجيم دال وشغلانة م يعلم بيها الا ربنا
ولما سالت قالو ان مستحيل الحجز للمصريين ييجى مع ست ابدا الا لو كانت مراته وبناء على البطاقة وقسيمة الجواز وساعة السفر تجيب بطاقتها معاها
هههههههههههههههه
طب والاجانب ؟؟؟؟؟
قالو ان الاجانب مسموح ليهم اى حاجة
واخيرا انواع الجرارات
افضل جرار اشتغل فى مصر كان الألمانى الابيض الكبير وماركته هينكل و...ده دخل الخدمة فى عهد السادات مابين اعوام 1972 وحتى عام 1975 ولازال يعمل بكفائة حتى الآن وهو الذى يسافر دائما بقطارات النوم والقطارات المكيفة (دلوقت دهنوه كحلى لكنه معروف فهو اكبر الجرارات حجما )
ثم الامريكانى الازرق وهو يعمل على خطوط الضواحى فقط لانه بطىء نسبيا ولم يعمل ابدا على الخطوط السريعة الا فى عهد منصور الذى راينا فى عهد العجائب
ثم الامريكانى المارلبورو وسماه الركاب كذلك لان الهيئة دهنته احمر فى ابيض وهو جرار قوى ولكن ليس بكفائة الهينكل
ثم الامريكانى الحديث وهو احد جراير منصور سامحه الله وانتقم منه شر انتقام بسبب هذه الجرارات
والأن مع الصور
وهى بالترتيب
القطار الفرنساوى
ثم النوم (معلش هو بعيد شوية لكن مع تكبير الصورة هتبان العربيات الخضرا )
ثم الجرار الهينكل
ثم على اليمين (قطار الضواحى
وعلى اليسار (الاسبانى )
ملحوظة / الصور فقط منقولة من عدة مواقع واما الموضوع من دماغى

[خالدخليفة]

ونكمل صور القطارات
دى صور الجرارات
وهى بالترتيب
جرار الضواحى
الامريكانى القديم
الامريكانى الحديث (مجايب منصور )
المارلبورو
قاطرة مناورة